¹ Khu lwa yako lekhi khu ka lukhira mu meechitso, ka khweechitswa mulirhaanga khu loondekhana khu Kristo.Lekhi khutsitsachirira khu londa viindu, vinyala khuchira khuhindire mu lisuuvira.Lekhi khurhike khukhola viindu vitaamaanu, khaandi viindu vyachira nu khwikanira khurhula mu vutaamaanunu khu suuvira mu Nyasaye; ² khuli meechitso kwu musiinji khu londekhana khu lipatiiswa nu khu vikhilwakhu makhono; khu lisimukuha khurhula mu vakhutsu ni likhalachirwa lyi mihika ni mihika. ³ Niiva Nyasaaye alayaansa, khuliitsa khukhola keene yaka. ⁴ Shichira nu vutinyu vaandu vambakhana khuloonda lisuuvira lyaavo, vanyala khukholwa munjira shina khwiikanira khaandi? Vacheenda khale mu vulavu vwa Nyasaaye; vatsaamakhu shihaanwa shyirhulaanga mwikulu, nivanyoola Rooho Mutakatiifu; ⁵ vali vamanya mu limenya lyaavo ndi likhuuva lya Nyasaaye ni lilahi, khaandi nivanyoola tsingulu tsya matukhu kaliitsa khuvaho. ⁶ Niiva valiitsa khwambakhana khulonda lisuuvira lyaavo,shyuvuli nu vutoro khuvaloomba vikanire khaandi, shichira vakalukhiraanga khuvamba Mwaana wa Nyasaaye , va mutaamaanyinya imberi wa vaandu. ⁷ Nyasaaye akasitsaanga malova kang'wetsaanga maatsi,ka imbala ikhumbaanga khuko vuli inyiinga kachira viraakwa vimera, khu lu khuhonyinya vaandu insala vachira ni viraakwa --yuku nokwo mulimi kunyola likaasitswa khurhula khu Nyasaaye. ⁸ Navutswa mulimi tsana nu kumera mahwa ki vikuunga na marakalu, nalova keene yako kavula vukhonyi vwoosi na khuli kali ni shyilamo.kweene yoko kutukhana khusaambwa nu muliro. ⁹ Navutswa valina veerhu va khwayaansa, khali niiva khulomolome ndyo, khuli ni lisuuvira mu viindu vili vilahi muno,khu lwa munye --viindu virhulanaanga khu vuhonyinyi. ¹⁰ Nyasaaye nu wa tooto.Shyanyala khwivirira mihiinsi chyeenyu nu vuyaansi vwamuli navwo khu liirha lyeelye, shichira mwakhonya vaandu veeve , na khaandi mu shyivakhonyaanga. ¹¹ khwikoombaanga nu mwooyo kwoosi khulola ndi vuli muundu woosi khu munye , atsililiraanga nu mwooyo kweene yoko khutuukha khu limala, khu ka muliindililaanga khunyoola mu lisuuvirhitswa kaliva ka tooto. ¹² Shyikali khwenyaanga munye khukwa vakara taawe, navutswa mwikoombe nu khweeka khu yavo vasuuvira khaandi vayikhutsira, khu munyoole shya Nyasaaye yalaka. ¹³ Lwa Nyasaaye yaloomba lilaaka lyeelye na Abrahamu, yisuuha khukhola ka yali ni ya laaka aliitsa khukhola.Yarhumikhila liirha lyeelye mweene khwisuuha, shichira shyukhwlikhuho na wuundi uli nu vunyali khumuvirha taawe. ¹⁴ Nyasaaye yavoola, "Ni kyirikali, ndiitsa khu khukaasitsa khaandi nu khu khukhola wiivule vitsukhululu vyinyiikhi." ¹⁵ Abrahamu yikhutsira khu yaka, nanyola shya Nyasaaye yali ni yamulaaka. ¹⁶ Lwa vaandu visuuhaanga, varhumikhira lyiira lyu muundu uli nu vunyali vunyiikhi khuvavirha ; khali lyisuuha lyeenero limala vuhingani vuvetsaho vwoosi. ¹⁷ Nyasaaye lwa yenya khukhumanyanyi havulavu ndi yali nashiri khukalukhanyinya kayeenyaanga khuvarhweekhitsira yavo valinyoola shya yali ni yalaaka. ¹⁸ Nyasaaye shyali unyala khuvoola vuveehi taawe! Lilaaka ni lisuuha lyeelye, ni viindu viviri vinyala khuvula khu kalukhanyinywa.Khutse khwirukhiraanga mu Nyasaaye khu khumenye mu mireembe.Lilaaka lyeelye lyenyekhaanga khutinyiritswa, khu khunyoole khuvirhila mu lisuuviritswa shiindu shyili imberi weerhu. ¹⁹ Khuli ni lisuuviritswa lyeene yero, khuli ni inaanga yi myooyo cheerhu.Ni lyi mireembe khaandi lya tooto, khaandi livirhiraanga mu luvaala lwi liteembeeri lyu mwikulu khutsya khutuukha mukarhi mwa Havuundu Hatakatiifu, ²⁰ ha Yeesu akhwimilira khwinjirayo havukono herhu; khaandi naye waloombwa khuva Mukali wa vasaliisi voosi mihika ni mihika, munjira indala yene, khuli Melikitsedeki.