¹ Vuli Mukali wa vasaliisi voosi, arhovolwaangwa khu rhula mu vaandu veeve mweene, ma aheelwa muhiinsi ku khurhumikhila Nyasaaye khusinjirira vaandu, khuhaana vihaanwa khaandi khuhaana tsisadaka tsyu khusaamba vihaanwa khuvwali tsyukhurhulitsa vwooni. ² Lwa ye mweene ali mutetekhere mu vuli shiindu shyoosi, ali nu vunyali vukhuva muhooma na yavo vakhamanyakhu shiindu shyoosi khaandi vakholaanga viindu vitaamaanu. ³ Khu londekhana khu shivune yishi , khali yee yenyekha khurhulitsa isadaka yu musaango khu vwaali.Shikali nu yu vwooni vweevwe wonyene, navutswa shichira vwooni vwa vaandu. ⁴ Avula khuho muundu unyala khwi vukulira luyali lu khuva mukali wa vasaliisi mweene. Navutswa khutuukha ave yalaangwa na Nyasaaye, khuli Haruni yali ni yalaaangwa. ⁵ Khaandi nindyo kristo shyi yivukulira luyali mweene khu kholwa musaliisi mukali, navutswa yaloombwa khuva musaliisi na wuyu wamuvoolera, "Yiwe uli Mwaana waanje, leero mali khu khwivula, mali khuva Paapa woowo." ⁶ Kali khuli Mahaandiiko Matakatiifu kavoolaanga hawuundi, "Yiwe uli Musaliisi wi mihika ni mihika, mu injira indala yeene, khuli Melikitsedeki." ⁷ Lwa Yeesu yali na shiri mwooyo haasi hanu mu muviri, yasaala nu khulira nu mwooyo mukali khu Nyasaaye, wali nu vunyali vwu khu muhonyinya khurhula mu likhutsa. ⁸ Khali niiva yali Mwaana wa Nyasaaye, navutswa yi yechitsa khulonda malako ka Nyasaaye khuvirhila mu lyinyakhana lyeelye. ⁹ Lwa Yeesu yakholwa museretse, yamanya nakwa isieveye yu vuhonyinyi vwi mihika ni mihika khu vaandu voosi valondaanga malako keeke. ¹⁰ Nyasaaye yamurhovola khuva mukali wa vasaliisi voosi muinjira indala yeene, khuli Melikitsedeki. ¹¹ Khuli na makhuuva manyiikhi ka khunyala khuvoola khulondekhana khu yaka; navutswa shyuvuli vutoro khumuvoolera koosi taawe, shichira mwasuluhala mu lyimanya. ¹² Khali niiva khu lwa nuunundi mwenyekha muve nu muli veechitsi, mushyenya muundu khu mweechitsa makhuuva ku khurhaanga, ka mwenyekhaanga muve nu mwamanya khulondekhana khu likhuuva lya Nyasaaye.Vukhala vwu khulya shyukhulya shyitinyu, mu shiri vu khung'wa maveere. ¹³ Muundu ungw'eetsaanga maveere ashiri mwaana mutoro, vuchila khumanyakhu shiindu shyoosi khulondekhana khu lyikhola lyu vuluunji anoho viindu vitaamaanu. ¹⁴ Navutswa shyukhulya shyitinyu, khu luveka luundi ni shya vaandu vahiindira ,vamanya munjira indahi vwavukhani vuliho haakarhi hi shiindu shilahi ni shitaamaanu.