1 Khu lwa yako lwa li suuviritswa lyu khwinjira mu shivala shyu khuhuluukhira mu lyi shishiriho, cheendi khuve vacheri vu khwirhiikhitsa, khu muundu alivula khuvakhuho mu munye , uliitsa khurhamirwa khwinjira mu lihuulukha lya khwa lakwa. 2 Khali khutse khwa yirwaatsirwa Ivaanjeeri, khuli vo vahulira,vahulira likhuuva navutswa shyi lyaali nu vukhala vwoosi khuvo taawe,shichira lwa vyirwaatsirwa, vaandu valihulira vambakhana khuli vuchilira nu khulitsukanyinya ni lisuuvira. 3 Khutse va khwa suuvira navo va khwiinjira mu shivala shyu khuhulukhiramu shya khwalakwa shyeene yesho.Kali khuli ya voola, "Ndali nu vurhima ni ndisuuha: Shyi valiitsa khwiinjira mu shivala shyaanje shya vaha vahuluukhiremu taawe?" Nyasaaye yavoola makhuuva keene yako, khali niiva yali na mali muhiinsi kweekwe kwu khuloomba shivala. 4 Mahaandiiko Matakatiifu kavoolaanga hawuundi makhuuva khulondekhana khu litukhu lya saba: Nyasaaye ya huluukha khu litukhu lya saba, na mali muhiinsi kweekwe kwoosi." 5 Makhuuva malala meere kalomolomwa khu khaandi :"Shyi valiitsa khwiinjira mu shivala shyaanje,shy vaha vahuluukhiremu taawe!" 6 Lwa lilaaka lyu kwiinjira mu lihuluukha lyeene yero lishyiriho,, na yavo vahulira Ivaanjeeri ni yirwaatswa khuvo shivinjira mu shivala shyeenesho shichira khuvula khusuuvira. 7 Nyasaaye yaviikha haluveka litukhu liindi lyayalaka nu khuvoola,"Leero ,ndavoola khulondekhana khulyo mihika minyiikhi nichyavirha khuvirhila mu Tawuti, khuli kahaandiikawa mu Mahaandiiko Matakatiifu: "Niiva mulahulira nuunundi mwooyo kwaanje Nyasaaye, muvule khuva vatiinyu mu myooyo cheenyu." 8 Niiva Yoshwa yakhavere yamala khuvaha vaandu lihuluukha lya Nyasaaye yali ni ya laaka, Nyasaaye shyi yakha lomolome makhuuva khaandi khulondekhana khu litukhu liindi lyu khuhuluukha taawe. 9 Khu lwa yako, lyarhikala lihuluukha lyi Lisapato lya Nyasaaye yavikhira vaandu veeve valiitsa khunyoola. 10 shichira muundu wiitsa khunyoola lihuluukha khurhula khu likhola muhiinsi kweekwe, khuli Nyasaaye ya huluukha, lwa yali namali khukhola muhiinsi kweekwe. 11 Khu lwa yako, nu vulahi khuchelitse khu nyoola lihuluukha lyeene yero; khulivula khuva nu muundu mu khutse wiitsa khurhamirwa khunyoola lihuluukha lyeene yero, khuli vo varhamwa, shichira vambakhana khu suuvira. 12 Likhuuva lya Nyasaaye lili nu vulamu ni tsingulu; nu vuuchi muno khuvirha shivaavi shyuuchi tsimbeka tsyoosi.Likhalaka nu khutsoma ha vuundu hoosi, khali hu murhima nu mwooyo kwakanirhaanga,khali hi vikuumba nu vuhaale vyakanirhaanga.Likhaviritsa nu khumanya likoomba ni tsinganakani tsili mu mwooyo kwu muundu. 13 Shivulakhuho shiindu shaloongwa shili mwooyo shi nyala khuviswa khu Nyasaaye! Alolaanga vuli shiindu shyoosi hawoosi, shya yaloomba mu shivala; khaandi naye wa khwiitsa khuvoolere vuli shiindu shyoosi shya khwakhola. 14 Khu lw yako, lwa khuli nu Mukali wa vasaliisi voosi watsya na tuukha mwikulu, uli Yeesu, nali Mwaana wa Nyasaaye, nu vulahi nu khusinjiire ni tsingulu mu lisuuvira lya kkhwiyama. 15 Mukali wa vasaliisi mwene wuyu shyali unyala khuvula khukhulolera tsimbavasi.Akhulolera tsimbavasi mu vutetekhere khu luveka luundi, khuli nu mukali wa vasaliisi voosi wachelitswa mu vuli shiindu shyoosi khuli khu chelitswaangwa; navutswa shyi ya kholakhu vwooni vwoosi taawe. 16 Khu lwa yako, nu vulahi nu khuvere ni lisuuviritsa lyu khwisuunda hiimbi khu shisako shyu vwaami vwa Nyasaaye shyi tsimbavasi, ha khunyala khuvelererwa nu khulolelwa tsimbavasi mu matukhu ka khuvirhila mu vutinyu.