¹ Khu lwa yako, vasuuviri va shyaanje, vatakatiifu , va musaangaa mu mulaango kwi mwikulu, kwa Nyasaaye yamulaangira.Mukanakanekhu shiindu khuloondekhana khuli Yeesu, yali murumwa khaandi Mukali wa vasaalisi voosi wi lyiyama lyeerhu. ² Yeesu yali mu suuvirwa khu Nyasaaye, yali ya murhovola akhole muhiinsi yuku, khuli Muusa khaandi yali mu suuvirwa mu muhiinsi kweekwe munsu ya Nyasaaye. ³ Yeesu yavoolwa khuva wu vukhumi vunyiikhi khuvirha Muusa, khuli muumbakhi wi yinsu aherwaanga litsoominywa khuvirha insu yeene. ⁴ Shya insu yoosi yumbakwaangwa, yumbakwa nu muundu; navutswa Nyasaaye naye muumbakhi wa vuli shiindu shyoosi. ⁵ Muusa yali musuuvirwa mu muhiinsi kwu vurhumikhi muunsu mwa Nyasaaye yoosi, na lomoloma makhuuva khuloondekhana khu viindu vya Nyasaaye, aliitsa khuvoola mu matukhu kiitsaanga. ⁶ Navutswa Kristo yali mu suuvirwa, khuli Mwaana usinjiriraanga insu ya Nyasaaye. Khutse veene khuli insu yeeye, niiva khulatsiriirira khuva ni lisuuviritsa ni tsingulu mu ka khuliindiliraanga khulola. ⁷ Khu lwa yako khuli Rooho Mutakatiifu avoolaanga, "Niiva mulahulira nuunundi mwooyo kwa Nyasaaye, ⁸ mukhava vatinyu mu myooyo chyeenyu, khuli vaakuuka veenyu vakhoola lwa vahiinganyinya Nyasaaye, khulitukhu lya vali nivali mu shyaangalaangwe lwa va mucheritsa." ⁹ Nyasaaye avoolaanga, Vanjeritsirayo ni vambiikha mu macheritso, khali niiva vali ni valoola ka ndakhola ¹⁰ khu mihika makhomi kane.Khu lwa yako, ndiivihirirwa ni likhula yiri, khaandi nimboola, "Vuli khase khoosi vakoyana mu tsinganakani tysaavo. Shi vamanyakhu shiindu shyoosi khulondekhana ni ka kholaanga taawe,' ¹¹ Khuli ndiisuuha mu vurhima vwaanje: "shyi valiinjira mu shivala shyaanje shyandavaha khuhulukhiramu taawe." ¹² Muheense munye vamweerhu, khase mwooyo mutaamaanu kwu livula khusuuvira ku khanyolekhana khali khu mulalakhu mu munye, akhavaho wu mwooyo kweene yoko ku likalukha inyuma nu khulekha Nyasaaye ali mwooyo. ¹³ Navutswa mutsuvana veene khu veene vuli khatsotso, mu inyiinga yi lilaangwa ni shi laangwa leero, khu akhavaho khali mulala ukholwa mutinyu nu vukaadi vwu vwooni. ¹⁴ Shichira khu khukholerwe vasaanji na Kristo, niiva khulakumira likali vuluviriri vwakhwali navwo mu liirhaanga khutuukha khu shiheri. ¹⁵ Mahaandiiko Matakatiifu kavoolaanga, "Niiva mulahulira nuunundi mwooyo kwa Nyasaaye, muvule khuva vatiinyu, khuli vakuuka veenyu vakhoola lwa vamuhiinganyinya." ¹⁶ Ni vaanga wiina vahulira mwooyo kwa Nyasaaye, ni vamuhiinganyinya? Ni vaandu voosi va Muusa yarhulitsa mu shivala shya Misiri. ¹⁷ Ni vaanga wiina va Nyasaaye yavukulira vurhima khu mihika makhomi kane? Ni vaandu vakhola vwooni, nivali yavo vakhutsira mu shyangalangwe. ¹⁸ Lwa Nyasaaye yi suuha na voola, " shyi valiitsa khwiinjira mu shivala shyaanje shya vaha vahulukhiremu taawe!" ---ya lomolomaanga khu vaanga wiina? Yavooleraanga vaandu vali ni vamuhiinganyiinye. ¹⁹ Khu lwa yako, khulolaanga ndi varhamirwa khwiinjira mu shivala shyeene yesho; shichira vambakhana khusuuvira.