¹ Khu lwa yako, khutuukhana khu loonda vulahi vweene ka khwahulira, khu khuvule khukoyanyinywa nu khu kalekha. ² Niiva makhuuva kyi tsingerosi tysavoolera vaakuuka veerhu, ka loolekha khuva ka tooto; khaandi muundu yambakhana khu ka suuvira anoho khu kaloonda, yasaliritswa khuli kenyekhaanga, ³ khu khunyala khwihononokha mu njira shiina, niiva khulalechelitsa vuhonyinyi vu khu chenyinya khuli vweene yovo? Mwaami naye yali wa rhaanga khu lomoloma makhuuva khu vuhonyi vweene yovo, khaandi vaandu va muhulira na lomolomaanga, va khusuuviritsa ni ka tooto. ⁴ Khali Nyasaaye ya haana vushahidi, lwa ya khola vilolekhitso ni viindu vyu khu chenyinya vinyiikhi lukanu nu lukanu; khaandi lwa ya kavulira vaandu vihaanwa vyirhulaanga khu Rooho Mutakatiifu, khuloondekhana khu vulaaliri vweevwe mweene. ⁵ Shyali ni Nyasaaye naye yaha tsingerosi vunyali vu khwamiiha shivala shyihya, shyiliitsa khwiitsa ---shivala shya khu lomolomakhu. ⁶ Nikhali khuli na vahaandiika mu Maandiiko Matakatiifu ha kavoolaanga, "Muundu ni shiindu shiina kachila wamu heendera mwooyo; mwaana wu muundu nu wiina wa ulindaanga?" ⁷ Ni yiwe mweene wamuloomba muundu khuva nu vunyali hati vutswa khu tsingerosi, niiwe wamuloomba khuva ni itaachi yu vukhumi nu khuheerwa luyali; ⁸ khaandi nu mukhola khwamiiha vuli shiindu shyoosi nu viviikha haasi hii vileenje vyeevye."Kavoolaanga ndi Nyasaaye yaloomba muundu khwamiiha vuli shiindu shyoosi. Nikhali , vuli shiindu shyoosi shivalitsirwaanga mu. Navutswa nuunundi, khushiri khuloola muundu ni yamiihaanga vuli shiindu shyoosi. ⁹ Navutswa khulolaanga Yeesu, waloombwa nu vunyali ha tiitiiti vutswa haasi khu vwi tsingerosi, khu khuvirhira mu tsimbavasi tsya Nyasaaye, ave na khutsiraanga vuli muundu woosi. ¹⁰ Vwali vulahi khuNyasaaye, shichira viindu vyoosi vyaloomberwa ye khuvirhira muye , Khuleerha vaana va nyiikhi mu vukhumi, nu khumukhola mu tuukhiru khuvirhira khusaaliritswa. Yeesu naye mukali uchiraanga vanyoole vuhonyi vwaavo. ¹¹ Yeesu naye utakassaanga, khaandi vaandu vatakasaanga khurhula mu vwooni vwaavo, vali na Paapa mulala. Nako kachilaanga Yeesu khuvula khulola khu tsisoni tsyoosi, khu valaanga vasuuviri vashaanje. ¹² Lwa avoolaanga, "Yiwe Nyasaaye, ndiitsa khuvoolera vasuuviri vashaanje ka wakhola; Ndiitsa khu khwi tsoominyira mu tsinyimbo mu lyivukaana lyaavo." ¹³ Yeesu amu vooleraanga khaandi, Ntsitsaanga khu suuvirira mu yiwe Nyasaaye." Avoolaanga khaandi, "Ndi hanu na vaana va yiwe Nyasaaye waamba." ¹⁴ Khu lwa yako , shichira vaana vavetsaanga vasaanji mu masaahi ni inyama, ni ndyo mweene asaangaanga mu kaatsana, khu khuvirhila mu likhutsa atuukhe khu mwoononyinya uyu uli ni tsingulu tsyi likhutsa, naye nali Shetaani. ¹⁵ Shichira shyi yihaana khu khoonya tsingerosi , navutswa yihaana khuvoholola vaandu voosi vali vamenya limenya lyaavo lyoosi mu shyivoho shyu vurhukwa vu vurhii vwi likhutsa. ¹⁶ Mu ka kyirikali Yeesu shi yihaana khuva vukhoonyi khu tsingerosi, navutswa yihaana khu vitsukhululu vya Aprahamu. ¹⁷ Khu lwayako ka mutuukhira khu fwaananyinywa na va mwaavo veeve mu tsinjira tsyoosi, khu atuuke khuva musaalisi mukali wi tsimbavasi, nu musuuvirifu mu muhiinsi kweekwe khu Nyasaaye , kwu khulerha vusaamiihi vwu vwooni vwa vaandu. ¹⁸ Lwa Yeesu yavirhila mu lyinyakhana khaandi mulichelitswa, ali nu vunyali vwu khukhonya yavo voosi vachelitswaangwa.