¹ Malako ka vayahuuti, kali vutswa khuli shiniini shyi viindu vilahi vyali ni vitsaanga khwiikholekha -- nikhali, shyi vinyala khuva ni viindu vya tooto taawe. Vihaanwa vilala vyeere vishyi tsiririraanga khukholwa khu matuukhu koosi vuli mihika.Khu lwa yako, Malako shyikanyala khuloomba vaandu va saalaanga khu Nyasaaye khuva vaseretse khuvirhila khu vihaanwa vyi milukha vya vasaaliisi valerhaanga vuli muhika taawe. ² Niiva kakhavera ka kyirikali vaandu va saalaanga khuvirhia vihaanwa vyi milukha shyi vyakhasinjiritswe khuhaanwa? Shichira vaandu va saalaanga munjira yeene yeyo va khanihitswe lulala khurhula mu vwooni vwaavo ma shyi vakhatsiririre khuva nu vwooni mu myooyo chyaavo. ³ Navutswa milukha chyeene yecho chyi tsiririraanga khu kholwa vuli muhika khwitsukhitsa vaandu vwooni vwaavo. ⁴ Shichira masahi kyi vihuunwa ni tsimbuli, shyi kanyala khurhulitsaho vwooni mba. ⁵ Khu lwa yako , lwa Kristo yali nali hiimbi khwiitsa mu shivala, yavoolera Nyasaaye: "Shyuwikoombaanga khu kholerwa milukha nu khuheerwa vihaanwa taawe, navutswa wa noombera muviri; ⁶ shyu uyaansitswakhu ni vihaanwa vyu khusaaambwa anoho vihaanwa vyu khurhulitsa ho vwooni taawe. ⁷ Nalwo lwa ndavoola, Nyasaaye, Inse ndi hanu khukhola lyeenya lyoolyo, khuli kahaandiikwa khulondekhana khwinse mu shitabu shya Malako." ⁸ Lukhurhaanga Kristo yavoola, :Khali shyuli ni liikoomba lyu khukholerwa milukha nu khuheerwa vihaanwa, vihaanwa vyu khusaambwa nu muliro ni vihaanwa vyu khurhulitsa ho vwooni taawe." Kristo ya voola ndyo, khali niiva vihaanwa vyeene yevo, vihaanaangwa khulondekhana khu Malako. ⁹ Kristo yavoola khaandi , "Yiwe ni Nyasaaye, inse ndi hanu, khukhola lyeenya lyoolyo." Khu lwa yako Nyasaaye urhulitsaaho vihaanwa vyi milukha chyoosi chya matukhu kali ka khale, khaandi wavikha mu vwiyaangu vwi vihaanwa vyeene yevo, shyihaanwa shya Kristo. ¹⁰ Khuivirhila mu vulaaliri vweene yovo, khwakholwa khu va vanihu khurhula mu vwooni, khu virhila mu shihaanwa shya Kristo ya haanwa, shyu muviri kweekwe mweene lulala lwonyene vutswa. ¹¹ Vuli musaaliisi woosi wa Vayahuuti, akholaanga mihiinsi chyeechye chyu vusaaliisi vuli litukhu, khaandi atsyanyinyaanga khukhola hali khanyiikhi milukha milala mweere.Navutswa milukha chyeene yecho, shyi chyinyala khwoochitsa khu vwooni taawe. ¹² Navutswa Kristo, yakholekha shihaanwa lulala lwoonyene shichira vwooni, shihaanwa shiri ni tsingulu mihika ni mihika, khaandi ma ni yikhala haluveka lwu mukhono musaatsa kwa Nyasaaye. ¹³ Kristo ashiliyo, khali nuunundi khutuukha lwa Nyasaaye amukuurhila vatsuku veeve. ¹⁴ Khuvirhila mu shihaanwa shilala shyeene yesho yamala khukhola yavo vanihitswaangwa khurhula mu vwooni vwaavo, khuva vaseretse mihika ni mihika. ¹⁵ Rooho Mutakatiifu, akhuhaniraanga vushahidi vweevwe khaandi khu makhuuva keene yako.Lukhurhaanga avoolaanga, ¹⁶ "Mwaami Nyasaaye avoolaanga, Yili nalyo lilakano lya ndiitsa khukhola navo mu matukhu kiitsaanga, ndiitsa khu vakhola vamanye malako kaanje mu myooyo chyaavo khaandi nda kahaandiika mu tsinganakani tysaavo." ¹⁷ Mwaami Nyasaaye avoolaanga khaandi, "Shyi ndiitsa khwitsukhitsakhu khaandi vwooni vwaavo, ni vikholwa vyaavo vitaamaanu taawe." ¹⁸ Lwa valiitsa khuva ni vamali khusamiikhwa khurhula mu vwooni vwaavo, shihaanwa shyu khurhulitsa ho vwooni, shyi shileenyekha khaandi taawe. ¹⁹ Khu lwa yako vasuuviri vashyaanje, khuli nu vuvoholole vwa tooto vwu khwinjira Havuundu Hatakatiifu Heene khuvirhila mu likhutsa lya Kristo Yeesu. ²⁰ Kristo yakhwikulira injira impya , injira ichirhaanga nu khuva mwooyo, khuvirhila mu luvaala --- nakhwo khuvoola, khuvirhila mu muviri kweekwe mweene. ²¹ Khuli nu musaaliisi wi tsingulu, wusinjiriraanga insu ya Nyasaaye. ²² Lekhi khwisuunde hiimbi na Nyasaaye nu mwooyo kwa tooto khaandi ni lisuuvira lya kyirikali, ni myooyo chyanihitswa khurhula mu vwonekhu vwoosi vwali nu vuli mu tsinganakani tsyeerhu tsyu mukari ni miviri chyochitswa na maatsi malavu tswee. ²³ Lekhi khumenye khulondekhana khu lwi lisuuviritswa lya khwiyama,shichira Nyasaaye yalaka aliitsa khurhweekhitsa lilaaka lyeelye , naye nu musuuvirwa. ²⁴ Khucheritse khukhonyana veene khu veene mu vuyaansi ni mihiinsi chyili milahi. ²⁵ Khu khalekhakhu mwiima kweerhu mulahi kwu khuvukaana halala, khuli vaandu valala vakholaanga.Niikhali kweenyekha khutinyirhitsana veene khu veene khali kha nyiikhi muno, shichira mumanye ndi litukhu lyu Mwaami khukalukha lili hiimbi khutuukha. ²⁶ Khuvulakhuho shihaanwa shyi shisuuviriro shyi milukha shyinyala khurhulitsa vwooni, niiva khutsiririra nu khukhola vwooni nu khwamanya khale vucheri khu londekhana khu ka tooto. ²⁷ Navutswa shiindu shyarikala shyonyene ni khulindirira nu khurhia likhalachilwa lyenyekhaanga khwitsa nu muliro kuliitsa khutivitsa vaandu vahinganyinyaanga Nyasaaye. ²⁸ Muundu wambakhanaanga khu loonda malako ka Muusa, akhutsaanga vuchira khulolerwakhu tsimbavasi khuvirhila khu vushahidi vwa vaandu vaviri anoho vavaka vavoola. ²⁹ Muundu ulechelitsaanga Mwaana wa Nyasaaye, uchyayaanga masahi kyi lilakano lya Nyasaaye kachira na samiikhwa khurhula mu vwooni,khaandi anyekaanga Rooho uhanaanga tsimbavasi, aliitsa khusaliritswa vululu vurhina? ³⁰ Khwamanya woyo wavoola,"Khurhunjitsa shisaalya ni mihiinsi chyaanje ndamurhunjitsira; khaandi woyo wavoola khaandi, "Mwaami Nyasaaye aliitsa khukhalachira vaandu veeve." ³¹ Ni shyindu shyukhurikhitsa , khunyolekhana mu makhono ka Nyasaaye Uli Mwooyo nuli nu vwooni. ³² Mwitsukhitse khuli mwamenyaanga mu matukhu kavirha. Mu matukhu keene yako, lwu vulavu vwa Nyasaaye vwa mwaakhira, mwikhutsira ; navutswa lwa mwanyakhanaanga nu shyu mwakhutsa mwooyo taawe. ³³ Mu tsinyiinga tsiindi mwanyekanyirwa khu luhya nu khutaambitswa, na lwuundi mwasaanga mu litaambitswa na yavo vali vatambitswaangwa. ³⁴ Mwanyakhana halala nu vaandu vali va vohwa mucheera;khaandi lwa vamuyaaya myaandu chyeenyu chyoosi mwasaangala nu mwikhutsira, shichira mwali mwamanya mushiri ni shindu shiindi shyilahi shyeene shyiliitsa khuvaho na munye mihika ni mihika. ³⁵ Mukhava vwu khurhia nu khusuuva vuluviriri vyeenyu vuli na matanyi makali mba. ³⁶ Mwenyekha muve ni likhutsira, khu mukhole lyeenya lya Nyasaaye khaandi munyoole shya yalaka. ³⁷ Mahaandiiko Matakatiifu kavoolaanga, "Harhikale hatiitiiti vutswa, woyo wenyekhaanga khu kalukha aliitsa khwiitsa, khaandi shya lachelevakhu taawe. ³⁸ Navutswa muundu wi liikhola liluunji waanje alamenyera mu lisuuvira:Khaandi na kalukha inyuma mwooyo kwaanje shyu ku lamuyaansa. ³⁹ Navutswa khutse shyukhuli mu yavo vakhutsa myooyo nu khwishevukha inyuma mu vutivi; navutsa khuli mu yavo vali ni lisuuvira khutuukha mu vuhonyinyi vwu mwooyo.