¹ Khu lwa yako lisuuvira nu khuva ni limanya lya tooto lyi viindu vya khu lindiliraanga khunyoola, khaandi nu khuva ni lisuuuviritswa nu khuvula lihayahayitsa mu viindu vi khalolekhaanga. ² Lisuuvira nalyo lyachira Nyasaaye na vuchirirra lyilolekhitsa lya vakuuka veerhu vamenyaanga mu matukhu kali kakhale. ³ Khuvirhila khu lisuuvira khumanya ndi viindu vyoosi vya loombwa khuvirhila khu likhuuva lya Nyasaaye, khutuukha viindu vilolekhaanga shyi vyaloombwa khu viindu vilolekhaanga. ⁴ Khu lisuuvira , Abili yalerera Nyasaaye shihaanwa shyi shyi suviriro shyilahi khuvirha shya Kaini, shya yalolekhitsirwa khu yali muundu muluunji, Nyasaaye yalolekhitsa khu vihaanwa vyeevye:khali niiva yakhutsa khu vyo a shyi lomolomaanga. ⁵ Lisuuvira nalyo lyachira Enoko na haminywa nu khupulukhitswa khutsya mwikulu, vuchira khulolakhu likhutsa."Shyi ya lolekhakhu khaandi, shichira Nyasaaye ya murhulitsa khulirova."Nashili khuvukulwa khutsya mwikulu, ya lolekhitswa yali ya yaansinsa Nyasaaye. ⁶ Avulakhuho muundu unyala khu yaansitsa Nyasaaye nakhali ni lisuuvira; shichira muundu wisuundaanga hiimbi na Nyasaaye, khurhaanga yenyekha ave ni lisuuvira ndi Nyasaaye aliho khaandi ahaanaanga vihaanwa khu yavo vachelitsa khumukhaava nu mwooyo kwoosi. ⁷ Lisuuvira nalyo lyachira Nuhu na cherihitswa na Nyasaaye khulondekhana khu viindu vyali ni vitsaanga khwi kholekha mu matukhu kali kyitsaanga khuvaho, na vyali ni vishili khukholekha.Nuhu yalonda nu khurhwekhitsa malako ka Nyasaaye, ni yumbakha lyaarho, mwa ye halala na vaandu vyi insu yeeye, vahonyinyirhwamu.Shivala shyakhalachirwa khurhulana khu keene yako, na Nyasaaye na mukhola Nuhu khuva wi likhola lyu vuluunji imberi weewe khuvirhira mu lisuuvira. ⁸ Khu lisuuvira Abrahamu lwa yalaangwa , yahulira ma na rhula khutsya ha alinyoola khuva ni myaandu chyeechye; naye yarhula natsya wakhamanyi wa yali na tsitsaanga. ⁹ Khu lisuuvira yakholekha muundu wu khumenya mu shivala shyisuuviritswa, khuli muundu mucheni, nu khumenya mu maheema halala na Isaka na Yakobo, ni vali vyi myaandu chyi lisuuviritswa tsana halala naye. ¹⁰ Shichira Abrahamu yaliindirira lyitaala likali lya Nyasaaye mweene yarhaanjitsa musinji kwalyo khaandi na lyumbakha, lyitaala likali lyilivaho mihika ni mihika. ¹¹ Lisuuvira nalyo lyachira Sara na suuvira ndi Nyasaaye aliitsa khurhwekhitsa lilaka lyeelye.Khu lwa yako , yahelitsa, khali niiva yali yavirha mihika chyu khwivula. ¹² Khali niva Abrahamu yali yahwa tsingulu tsyu khwivula , vyitsukhulu vanyiikhi vyivulwa khuvirhila khuye, khuli tsing'ereng'aani mu malesi, khaandi khuli muyeshe khu luchiinga lwi inyaansa. ¹³ Lisuuvira nalyo lyachira vaandu veene yavo voosi ni vakhutsa, vuchira khunyoola viindu vya Nyasaaye yali ni yalaaka aliitsa khuvaha; navutswa vavilolera ihale weene vutswa, ma ni viinjilitsa viindu vyeene yevo.Vavuchilira havulavu ndi vo, vali vacheni khaandi ni vaandu virhukha khurhula mu shivala shyaavo khu lirova khunu. ¹⁴ Shichira vaandu valomolomaanga makhuuva khuli yaka vamanyinya vakhavaanga khuli vanyala khunyoola shivala shyaavo veene. ¹⁵ Khaandi valava ni vali ni inganakani yu khwitsukhitsa mu shivala shya varhulamu, khani vakhavere nu vwiyaangu vwu khukalukha. ¹⁶ Navutswa khuli lwa kali, vikoombaanga khunyoola shivala shilahi muno, nishili shivala shyu mwikulu.Khu lwayako, Nyasaaye shyanyala khulolakhu tsisoni , lwa vamulaanga Nyasaaye waavo taawe; shichira yavaloombera khale litaala likali. ¹⁷ Khu lisuuvira Abraham, lwa yacheritswa , ya haana Isaka , ave isadaka yi shisyuviriro shyu mulukha: Yee mweene nu mweene yavukula lisuuviritswa nu vuyaansi yali na rhulitsa mwaana weewe muderwa wa yali yanyoola khu lilaka; ¹⁸ Nyasaaye yali yavoolera Abrahamu, "Uliitsa khwivula vyitsukhulu vanyiikhi khuvirhila khu Isaka." ¹⁹ Abrahamu yali yamanya ndi Nyasaye ali nu vunyali , khali khwisimukukhitsa vaandu khurhula mu likhutsa -- khaandi , khuvoola kyirikali, khali, Abrahamu, shyiyiira Isaka taawe shichira yamanya na kalukhitsirwa. ²⁰ Khu lisuuvira khulondekhan khu viindu vitsaanga Isaka ya kaasitsa Yakobo na Esau. ²¹ Khu lisuuvira Yakobo, lwa yali na khutsaanga ya kaasitsa vaana va Yosefu vuli shya mulala:Yakobo ya sikama , lwa yiinama khwitiirha khu ipikolo yeeye, na saala khu Nyasaaye. ²² Lisuuvira nalyo lyachira Yosefu, inyiinga yi likhutsa lyeelye lyali ni lituukhi hiimbi, ya lomoloma makhuuva ka vaana va Israeli khurhula mu Misiri, ma na haana lilaaka khu vikuumba vyeevye. ²³ Khu lisuuvira lwa Muusa lwa yivulwa , vivuli veeve va mu visa mweeri chyivaka, shichira valoola yali mwaana mulahi; khaandi shyi varhia khu munwa kwu mwaami ya haana. ²⁴ Khu lisuuvira Muusa , lwa ya tuukha nu khukwa muhiindira, yambakhana khulaangwa mwaana wu mukhaana wa Farao; ²⁵ ya rhovola khusaanga mu likhuvitswa shivi lya vaandu va Nyasaaye , khuvirha khuva nu vuyaansi vwu vwooni khu inyiinga itiitiiti. ²⁶ Yaloola lyinyekwa shichira Kristo lyivere lyu vurhuchi vukali khuvirha vurhuchi vwi livikhiro lya Misiri, shichira yaheensa imberi khu shihaanwa shyitsaanga. ²⁷ Lisuuvra nalyo lyachira Muusa narhula mu shivaala shya Misiri, vuchira khurhia Mwaami wa Misiri shyayali anyala khumukhola.Muusa yambakhana khukalukha inyuma, khuli muundu uloli Nyasaaye ukhalolekhaanga taawe. ²⁸ Lisuuvira nalyo lyachira Muusa na rhaanjitsa mulukha kwa Pasaka; khaandi navoolera vaandu khuvekha masahi khu milyaango, khu ingerosi ilerhaanga likhutsa ilivula khwira vaana vakhuluundu vyishiyaayi va Vaisraeli. ²⁹ Lisuuvira nalyo lyachira Vaisraeli ni vava nu vunyali vu khwambukha Inyaansa Imuuchi vwaangu, khuli vacheendanga khu lirova lyuumakanu.Navutswa lwa Vamisiri vachelitsa khwambukha khuli vo, vamilwa ni inyaansa. ³⁰ Lisuuvira nalyo lyaachira masisi kyi litaala lya Yeriko nikayongovera haasi, lwa Vaisraeli vali nivavotokhaane khulyo khu matukhu saba. ³¹ Lisuuvira nalyo lyachira Rahabu, yali nali mukhali wu khokhola vulaaya niyihononokha khwiirwa na vaandu vakhalondaanga malako ka Nyasaaye taawe; shichira yiinjilitsa vaandu varhunikhitsi mu mireembe vali nivarhuli Israeli , khwitsa khurhunikhitsa. ³² Ndakhatsirire khurhoova vaandu vaandi vali vyi lisuuvira? Vwiyaangu vunjehi vu khulomoloma makhuuva khu Gidioni, Paraka, Samusoni, Yefutsa , Tawuti, Samweli, na vaporofeeti. ³³ Lisuuvira nalyo lyachira nivalwaana vivala viindi vinyiikhi, khaandi ni vavikuurha.Vachira ka tooto ni kakholekha , ni vanyoola shya Nyasaaye yali ni ya laaka aliitsa khu vaha , khaandi ni lyikalira minwa chyi tsikutunyi khu valya; ³⁴ ni vatsiminya miliro milulu, valoombwa khuva vi tsingulu lwa vali ni vali vatetekhere muno, khaandi nivi hononokha khwiirwa ni shyivaavi, vali ni tsingulu khukwaana mu mahe, nu khukuurha vasikali vi vivala vya vaserhaanga. ³⁵ Lisuuvira nalyo lyachira viikho va vaandu vakhali vali ni vakhutsa khale, nivisimukukhitswa khurhula mu likhutsa.Navutswa vakhali vaandi lwa vambakhana khuvoholorwa, vatambitswa ,khu vanyoole lisimukukhitswa lilahi khurhula mu likhutsa. ³⁶ Vaandi vakholelwa shiheenyeheenye nu khu hulwa, nu khuvohwa khu minyololo nu mucheera. ³⁷ Valaswa machina nu khurhemakanyinywamu haakari nu musumeno.Vaandi ni virhwa khu shyivaavi; vifwaala tsinguvu tysa masero ka makoondi ni kyi tsimbuli.Vachelitswa,nu khunyakhitswa nu khukholelwa vutaamanu. ³⁸ Vaandu vi lirova likhatukhana khuva navo, vamenya mu livotokhana mu shangalangwe, nu mu vikulu, nu mutsimbangaywa nu mbuko vwi lirova. ³⁹ Yava voosi lwa vali vamali khulolekhitswa khu lisuuvira lyaavo , shyi vanyoola lisuuviritswa tsana, ⁴⁰ shichira Nyasaaye ya vikhira khutse shindu shili shilahi khuvirha yava vuchira khutse vakhukhatukhana khukholwa vatukhanu.