¹ Khu lwa yako , lwa shituma shikali shya vashahidi shikhuvotokane, lekhi khulekhane ni shiindu shyoosi , shyinyala khukhulitohitsa , khali vwooni vwu khu nalanyinyanga. Lekhi khwilukhake khuvirhira mu likhutsira mu malivirhi kali imberi weerhu. ² Lekhi khuheense vuluunji vweene khu Yeesu, woyo wi lisuuvira lyeerhu lirhulakhu khurhula mulirhaanga khutuukha mu limalilikha.Yeesu yayikhala nuunundi haluveka lu mukhono musaatsa khu shisako shyu vwaami shya Nyasaaye. ³ Kanakani khu ka Yeesu yavirhilamu; khuli yatsilirila khwikhutsira mu vuhimwa khurhula khu vaandu vooni! Muvule khuwakhu tsingulu mu miviri chyeenyu anho khukhutsa mwooyo. ⁴ Mushiri khulwaana nu khutuukha khushikha shyu khuhiingana nu vwooni khutuukha khurhaatsa masahi; ⁵ khaandi mwayivilira litinyilitswa livoolerana na munye khuli vaana: "Mwaana waanje, uvule khulechelitsa lwu Mwaami Nyasaaye a khuchelihitsaanga, anoho khukhutsa mwooyo lwa akhusalilitsaanga, ⁶ Mwaami Nyasaaye achelihitsaanga muundu wa ya yaansa,khaandi ashutaaanga vuli muundu woosi wavuchiliraanga khuva mwaana weewe." ⁷ Mutsyaanyinye khwikhutsira mulinyakhana lyoosi lya muvirhilamu, nu khukavukula khuli ni paapa wenyu umusalilitsaanga.Nyasaaye amukholera khuli vaana veeve; shichira nu mwaana shina wa ise weewe avulaanga khumushuta shivoko shyu khumuha vucheri? ⁸ Navutswa mwaava vukhuvula khuhelwa vucheri, vwa vaandu voosi vasalilitswaangwa nu khusaangamu, khu kamanyikha shyumuli vaana veeve va tooto taawe; navutswa muli vaana vaheywa. ⁹ Khaandi khwali na vapaapa vu mumuviri cheerhu khukhuha vucheri, na khutse khwava hulira nu khu vichehitsira:khu lero ni khali khaanga mu vunyiikhi khu tuukhana khumuhurira nu khwichehitsa khu Nyasaaye weerhu uchiraanga nu khunyoola Rooho khaandi khuva mwooyo? ¹⁰ Va paapa veerhu vakhwivula vakhusalilitsaanga khu matukhu matiitiiti, khu londekhana khuli valolaanga nu vulahi; navutswa Nyasaaye akholaanga ndyo ni lyeenye khu khukhonya, khu khusaange mu vutakatiifu vweevwe. ¹¹ Lwa khu salilitswaangwa, inyiinga yeene yeyo khu hulilaanga vuchuungu khuvirha khuva nu vuyaansi.Navutswa matukhu ni ka khavirha , nu khumali khu salilitswa mu injira khuli yeyo, voosi khunyoola shihaanwa shyi mireembe, khurhulana khulimenya lyi likhola lyu vuluunji. ¹² Shichira yaka munyiire makhono keenyu ikulu khaandi musiinjire vuluunji! ¹³ Mutsyanyinye khuchenda khu injira inuunji, khu khali shyileenje shyalema shyilivula khulemera likali, navutswa shihone. ¹⁴ Mwenye khumenye ni mireembe na vaandu voosi, khaandi mumenye limenya litakatiifu; shichira muundu avulakhuho uliitsa khulola Mwaami, vuchira khuva mutakatiifu. ¹⁵ Muchelitse khulola ndi muundu avulakhuho unyala khuvula khunyoola tsimbavasi tsya Nyasaaye.Mukhahaanikhu muundu khunyola vwiyaangu vu khuva mululu, khukhola vaandi vanyakhane , shichira vululu vweevwe. ¹⁶ Muvule khuhaanakhu vwiyaangu khu muundu vu khukhola mwiima mutaamaanu kwi shifwavu anoho khuvula khurhwekhitsa likhola lyu vuluunji, khuli Esau, lwa yakuulitsa vunyali vweevwe vu mwaana mukhuluundu yali ni yaheelwa, khu lu khwenya khu heerwa shyukhulya isahani indala. ¹⁷ Nikamali khwikholekha mwamanya ndi Esau yenyaanga paapa weewe amukaasitse ; navutswa paapa weewe yambakhana khumukaasitsa, shichira yali na vula vwiyaangu vwu khwikanira, khali niiva yalila malika niyenyaanga akaasitswe. ¹⁸ Shichira shyu mutuukhi khu shyikulu shyu khutiira khu, shyikulu shyakhaanga muliro, nu khu lileesi lyimwaamu, nu khu shyisuundi, nu khwi imbuutsa ili. ¹⁹ nu khu mwooyo kwi shisiliva khaandi hu mwooyo kwahulilikhana.Lwa vaandu vahulira mwooyo kweene yoko, nu ku lomolomaanga, va kuvoolera nu khuyaansa vavule khu hulira likhuuva liindi; ²⁰ shichira shyivali vanyala khuloonda lilako lyaheerwa livoolaanga, "khali niiva murhuku kulatiira khu shyikulu, ku lalaswa na machina anoho kulaswe nu muvanu khu tuukha lwa ku khukhutsa. ²¹ Ni kyirikali, viindu vya kholekha ha vuundu heene yaho,vyali vyu khu rhikhitsa, khali Muusa navoola, "Ndechelaanga nindia." ²² Navutswa mu mali khutuukha khu shyikulu shya Sayuni, khaandi mu litaala likali lya Yerusalemi lyu mwikulu, ha tsingerosi tsinyiikhi tsyakanilaanga . ²³ Mumali khutuukha mu shyikhalo shyu vuyaaansi vunyiikhi, shya vaana va Nyasaaye vakhuluundu khwivulwa, va miira kaavo ka haandiikwa mwikulu.Mumali khutuukha khu Nyasaaye, mukhalachiri wa vaandu voosi mu shivala, khaandi khu myooyo chya vaandu valahi, vakholwa khuva vaseretse. ²⁴ Mumali khu tuukha khu Yeesu, wachira lilakano lihya ni livaho; khaandi khu masahi ka miitswa ka kholaakaanga viindu vilahi muno, khuvirha masahi ka Abili. ²⁵ Khu lwa yako, muvule khwambakhana khu hulikitsakhu woyo ulomolomaanga.Yavo vambakhana khuhulikhitsa woyo ,wahaana likhuuva lyeelye litakatiifu khu vaandu khu lirova, shyivali vihononokha taawe.Khunyala khwihononokhakhu hati munjira shina, niiva khulambakhana khuhulikhitsa woyo ulomolomaanga khurhula mwikulu! ²⁶ Mwooyo kweekwe kwa techeritsa shivala mumatukhu keene yako , navutswa nuunundi yalaaka, "Shyinyala khutecheritsa khaandi shivala shyonyene taawe; navutswa ndatecheritsa khali likulu." ²⁷ Makhuva "Khali" kamanyinyaanga havulavu ndi vindu vyaloongwa , viliitsa khunuywanyinywa nu khurhulitsaho, khu viindu vikhanyala khuvula khunuyanyinywa vilitsilira khuvaho. ²⁸ Khu lwa yako, cheendi khusanditse , shichira khunyooli vwaami vukhanyala khunuyanyinywa taawe.Cheendi khusaale khu Nyasaaye munjira inyala khu muyaansinsa, khumuhe luyali nu khurhia. ²⁹ Nyasaaye weerhu ali khuli muliro ku saambaanga nu kulaliitsa shiindu shyoosi.