¹ lwa vakhalakanyila mu matala ka amufipoli na appolinia,vatukha mu litala lya tesalonike,lisinagogi lya vayahudi lyaliyo. ² na paulu, khuli kwali mwima kwekwe,yinjilamu narevana navo marevo khulondekhana khuli mang'odo kavolanga. ³ yakhunula tsimbaso khandi niyivala, katukhana kristo asalilitswe khandi yisimukhe khurula mu vakhutsu; na khandi yesu, wa ndilwatsa wuyu, naye kristo. ⁴ valala khuvo vasuvila nivungana halala na paulu na sila,khali isavi ingali ya vakuriki vasala nyasaye,khandi khali valala khu vakhali vimilililanga. ⁵ navutsa valala khu vayahudi vavula khusuvila,vizula imbotokha,nivavukula vandu vali ni miima mitamanu khurula musokoni nivavavunjelitsa halala.nivaranga shileche shyu khulera vukoyanu mu litala likali.vinjilila jason munzu mwemwe nivakhavanga khurulitsamu paulu na sila vavalere ilwanyi khu vandu. ⁶ lwa vavula khuvanyolamu,vakhwesesa jason na vamwavo vandi nivava hila imbeli wa vimilili vi litala,ni vakhuva tsikhwili, nivavola,vandu vakalukhanyinyanga shivala ikulu hasi vatukhi hanu khandi; ⁷ vandu yava jason avinjilitse munzu mwemwe:vachaya malako ka kaisali,khandi vavolanga khuli nu mwami wundi alangwangwa yesu. ⁸ vahenditsa mwoyo shituma shyosi halala na vimilili vi litala lwa vahulila vindu yivi. ⁹ navutsa lwa vavukula tsisendi tsyukhuvasinjilila khurula khu jason na veshe,vavavoholola vatsi. ¹⁰ vutukhu vwenovo vamwavo varuma paulu na sila nivatsia mu litala lya bereya.lwavatukhayo, vinjila mulisinagogi lya vayahudi. ¹¹ vandu va berea vali vandu valayi khuvira vandu va tesalonike,shichila viyema likhuva nu mwoyo mulala,nivahenzilitsa tsimbaso vuli litukhu kholola nikava ka paulu yekitsanga ni kakilikali. ¹² khu lwa yako vanyikhi vavo vasuvila,khali vakhali valala vakuriki vasala nyasaye khandi vasatsa vanyikhi. ¹³ navutsa lwa vayahudi va tesalonike vamanya paulu yilwatsanga likhuva lya nyasaye mu litala lya berea, vatsyayo khukhola shileche nivavwanyinya mulilo mushituma shya vandu. ¹⁴ na vwangu,vamwavo varuma paulu khutsia khu luchinga lwi inyanza,navutsa sila na timateo varikala mu litala lya berea. ¹⁵ yavo vali ni vimilila paulu vamuhila ihale khutukha mulitala lya athene: lwa vali nivalekhanga paulu iweneye, yavavolela vatsi vavolele sila na timateo vitsi vwangu khuli kanyalikha. ¹⁶ lwa paulu yali navalindanga mu litala lya athene,mwoyo kwekwe kwikosa shichila yolola vifwanani vi misambwa vyaizula mulitala lyenelo. ¹⁷ khu vuli litukhu mulisinagogi yavolelana na vayahudi na vandu vandi vasalanga nyasaye,khandi khali musokoni na vandu vosi vanyolekha yo. ¹⁸ valala khu vekitsi vasomela vucheli vwa mekitso ka va epikuria nende sitoiki,vahangalitsana khandi nivamoloma na paulu.valala khuvo vareva, ni shina shyu mundu wimolominyinga uyu achelitsanga khuvola? vandi vavola, afwana khuli mundu alanga vandu valonde vanyasaye vacheni, shichila yali niyalwatsanga ivangeli khulondekhana na yesuni lisimukhukha khurula mbakhutsu. ¹⁹ vavukula paulu nivamuhila mushikhalo shya areopagu,nivavola,khuvolelekhu mekitso shina macheni kawekitsa yaka? ²⁰ shichila vindu vyawekitsa nivicheni khumaroyi keru.khu lwayako khwenya khumanya makhuva khulondekhana ni vindu vyenivi. ²¹ vandu vamenya mulitala lya athene na vacheni vamala vwiyangu vwavo khwilwatsa inoho khuhulikhitsa khulondekhana khu shindu shicheni. ²² khu paulu yasinjila hakari hu vwali vwa areopagu navola, munye vandu va athene, ndola mulimenya lyenyu lyosi mwakumila idini. ²³ shichila lwambiri havundu hosi nimbetsa vijo vyenyu vyamusalakhu,ndoli vwali vwahandikwakhu. khu nyasaye ukhamanyikhane.shya munye musala vujila khumanya, naye wamwilwatsilanga nundi. ²⁴ nyasaye yalomba lilova ni vindu vyosi vilimu,naye nu mwami wi likulu ni lilova,shamenya mumatempeli kumbakhwa ni mikhono chya vandu tawe. ²⁵ khandi shyarumikhilwangwa ni mikhono chya vandu,khuli yenya shindu shyosi,shichila naye uhetsanga vandu vulamu,myuya chyu khwesesa khandi vuli shindu shyosi. ²⁶ khurula khu mundu mulala yalomba vuli ihili yavandu khumenya vuli havundu hosi mulilova,yamanya khale matukhu ka venyekhanga khumenya,khandi havundu havitsa khuva nivamenyanga; ²⁷ khu vatukhe khukhava nyasaye,khandi haundi vanyole khuli vikombanga khumumanya.naye shyali ihale wene na shya mulala weru tawe. ²⁸ shichila muye khuli mwoyo,khuchendanga khandi khuliho; khuli mulala muhandiki wi tsyinyimbo yavola,khutse khuli vutsa khuli vana veve. ²⁹ ,shichila khuli vana va nyasaye,shikakhutukhile khukanakane ndi nyasaye ali khuli izahabu,inoho ifeza,inoho lichina-vindu vyavazwa khandi vyu mundu yakanakana. ³⁰ khu matukhu ku vusilo,nyasaye yikhola alola tawe;navutsa lwenulu yenya vandu vosi havundu hosi vikanile. ³¹ yaka kali ndio shichila nyasaye yaviritsa khale litukhu lyayitsa akhalakile lilova lyosi muvulunji,khuvirila khu mundu wa yarovala.nyasaye yahana shimanyilo shyu mundu uyu khu mundu wosi khuvirila khumwisimukhitsa khurula mbakhutsu. ³² lwa vandu va athene vahulila makhuva ka vakhutsu khwisimukha,valala vakholela paulu shihehenye,vandi nivavola khulakhuhulikhitsakhu khandi khu likhuva yili. ³³ inyuma wa kenako,paulu yarula mu shikhalo shyavo. ³⁴ navutsa vandu valala viyunga naye nivasuvila, mulala khuvo yali dionisiu mulala khu vishakhalo shya areopago,mukhali yalangwa damara,khandi na vandi halala navo.