¹ paulu yatsililila nuluchendo lwelwe natukha mu mutala ka deribe na lusitura,mulondi wa yesu mulala yaliyo yalangwa timoteo mwana wu mukhali muyahudi yali niyasuvila, navutsa ise wewe yali mukuriki. ² vamwavo vosi vali lusitura na ikonia vamoloma vulayi khuye. ³ paulu yenya khuchenda naye, khu yamuvukula namusheva shichila vayahudi vali mutsimbeka tsyenezo, shichila vosi vali vama nya ise wewe nu mukuriki. ⁴ vachenda nivavirila mumatala, vahanananga malako ka valonda ka varumwa vali nivaviritse na vasakhulu vali yerusalemi. ⁵ khu muvukana kanyola tsingulu mulisuuvila khandi nikametekha isavu vuli litukhu. ⁶ paulu na valina veve vakhalakanyinya mutsisomo tsya firikia na galatia, shichila roho yali navakayi khwilwatsa likhuva lyosi mulosomo lwi ivuhindi. ⁷ lwa vatukha himbi mulitala lya misia, vachelitsa khwinjila mu litala lya bizinia, navutsa roho yavikalila, ⁸ navavira misia, nivatukha mu litala turoha. ⁹ paulu yalola malolo vutukhu;yalola mundu khurula makedonia nasinjile,namusayanga navola, hambakhu makedonia ukhukhonyekhu. ¹⁰ lwa paulu yalola malolo kenako,vwangu khwaranga khwirechekha khutsia makedonia,shichila khwalola ndi nyasaye akhulangi khutsi khuvilwatsila ivangeli. ¹¹ khwambukhila mu liaro nu khurula mulitala lya turoha,nukhutsia vulunji khutukha mulitala lya somoturake, na litukhu lilondakhu nukhutukha nehapoli. ¹² khurula iweneyo khutsia nukhutukha filipi,litala likali lyu lusomo lwa makedonia, lya varoma vamihanga,nukhumenyakhu mulitala lyenili matukhu manyikhi. ¹³ litukhu lilisabato khwarula ilwanyi wi shilivwa shali himbi khumuchela,hakhwakanakana khunyala khunyola havundu hukhusala.khwikhala hasi nukhumolomela vakhali vali nivakanileho. ¹⁴ mukhali mulala yalangwa lidia,yakulitsanga tsinguvu tsya zambarao, khurula mu litala lya tsiatira,yasala nyasaye,yakhuhulikhitsa.nyasaye yikula mwoyo kwekwe khuhulikhitsa kosi ka paulu yekitsa. ¹⁵ lwa yinwa mmatsi halala na vandu vinzu yeye,yakhusaya navola,niva muloli ndi musuvilifu khu mwami,hambi mumenye munzu mwanje.naye yakhunikilitsa. ¹⁶ na katukha,lwa khwali nukhutsitsanga havundu hu khusala, khwakana nu mukhana murumwa yali nilitimoni lyu vukhumu,naye yalerelanga varuchi veve tsisendi tsinyikhi khuvirila khu mihinzi chu khuvolela vandu kitsa kikholekhe. ¹⁷ mukhali yoalondanga paulu halala na khutse nalangilitsa, navola,vandu yava nivarumukhimili va nyasaye ali ikulu muno. vamwilatsilanga injila yu vohonyinyi. ¹⁸ yakhola yaka matukhu manyikhi.navutsa paulu,yasinyikha naye,niyishevukha navolela litimoni yelo, khulaka mulira lya yesu kristo urule mu mukhana uyu. na lyarulamu isa yeneyo. ¹⁹ lwa varuchi veve valola vwiyangu vu khuyola tsisendi vuwele, vakumila paulu na sila nivava khwesesa nivavahila musokoni imbeli wa vimilili vali nivaliyo, ²⁰ nivavahila khu vakhalaki, nivavola,vandu yava nivayahudi, nae vasumbulanga muno mwitala lyeru yili. ²¹ vekitsanga mima chya malako keru ka voroma kavula khuhuchilila inoho khunyala khuvula khukhola. ²² na shituma shyosi shya vandu vahambana navo nivinjilila paulu na sila:na vakalaki varandula tsinguvu tsyavo, nivalaka valandulwe tsindovoshi. ²³ lwa vali nivakhamala khuvalundula ni mishaaliti, vavasyuva munzu ya vavohe ni valaka musikali avalinde vutinyu. ²⁴ lwa yanyola lilako yelo,musikali yavasyuva munzu ya vavohe yu mukari navohela vilenje vyavo hakari hi tsifulemu tsindidoho tsi misala. ²⁵ himbi muvutukhu hakari lwa paulu na sila vali nivasalanga nivimba tsyinyimbo tsyukhwitsominya nyasaye,na vavohe vandi vavahulikhitsanga. ²⁶ nonoho shivala shyarenga,na muse kwi inzu ya vavohe kwatechelitsa: nonoho miliango chyosi chikukha,na mimyololo chya katukha khurula khu mikhono chya vandu nichyikwa hasi. ²⁷ musikali wi inzu ya vavohe yavukha narula mutsindolo nalola miliango chyi inzu ya vavohe nichyikukhe chyosi,yatsomola shivavi shyeshye niyenya khwiyira mwene,shichila yali ninganagani vavohe vilukhe vosi. ²⁸ navutsa paulu yalangilitsa nu mwoyo mukali, navola, ukhisalilitsa tawe,shichila vosi khushili munu. ²⁹ musikali yarumanyinya valere tsitaha navatsukha niyinjilamu,narenga nu vurii,ya kwa imbeli wa paulu na sila, ³⁰ navarulitsa ilwanyi, navareva,vandu munye,khole shina ndukhe khunyola vuhonyinyi? ³¹ vamuvolela,suvila khu mwami yesu yesu,na ulahonyinywa,yiwe,halala na vandu vinzu yoyo. ³² vamwilwatsila likhuva lyu mwami, halala na vandu vali vamenya munzu yeye. ³³ musikali mwenoyo yavavukula mutsisaa tsyenezo tsyuvutukhu, navokitsa makule kavoye halala na vandu vosi vinzu yeye vinwa mmatsi vwangu. ³⁴ yalera paulu na sila munzu mwemwe,navalombela shyukhulia nivalia,nasangala likali halala na vandu vinzu yeye,shichila vasuvile mu nyasaye. ³⁵ lwa mbasu kwatukha,vakhalaki varumanyinya likhuva khu vasikali, nivavola,lakhuli vandu yavo vatsi. ³⁶ musikali yavolela paulu makhuva kenako, navola,vakhalaki varumi likhuva khwinze muvohole mutsi.khu lwayako ruli ilwanyi,mutsi ni milembe. ³⁷ navutsa paulu yavavolela,vakhulandule havulavu vuchila khukhuyala,nakhutse khuli varoma,nivakhusyuva mu mushivoho.lwenulu venya khukhuvoholola muvwivisu? auwa, lekha vene vitse vakhwimilile vakhurulitse ilwanyi. ³⁸ vasikali vavolela vakhalaki makhuva yaka,na lwava hulila ndi paulu na sila ni varoma vali nuvuri. ³⁹ vakhalaki vitsa nivavaseva tsimbavasi,nivavarulitsa mushivoho,nivavavolela vatsi ihale varule mulitala. ⁴⁰ navo varula munzu ya vavohe nivatsia minzu mwa lidia,lwa valola vamwavo,vavatinyiritsa nivasimukha nivarula mwitala.