¹ inyuma wi vindu yivi paulu yarula mu litala lya athene natsia mu litala lya korintho. ² iweneyo yanyolayo muyahudi yalangwa akwila,yivulwa mulitala lya pontia, ,naye yali naruli khuvwangu yuvu mushivala shya italia numukhali wewe pilisila,shichila mwami wa varoma claudia yali nahani lilako vayahudi vosi varule mulitala lya varoma,paulu yatsia navo, ³ na shichila vakholanga mihinzi milala,yatsia namenya navo,nivahinzila,shichila vosi vanavanga mahema. ⁴ vuli litukhu lilisabato milisinagogi,paulu yahangalitsana mulimoloma navo,nachelitsa khuhombelitsa vayahudi na vakuriki khusuvila. ⁵ lwa sila na timateo vitsa khurula makedonia,paulu yatsuvwa mu mwoyo nalolekhitsa khu vayahudi ndi yesu ni kristo. ⁶ navutsa lwa vayahudi vamuhangalitsa nivamunyeka, paulu yasungusula inguvu yeye khuvo navavolela, masayi kenyu kave khu mirwi chenyu munye vene,ndi munihu.khurula lwenulu nzitsa khu vandu vitsihili. ⁷ yarulayo niyinjila munzu mu mundu yalangwa titius yusito,mundu yasalanga nyasaye.inzu yeye yali himbi khu lisinagogi. ⁸ krispa yali mwimilili wi lisinagogi,yasuvila mu mwami,halala na vandu vinzu yeye; vandu vu mulitala lya korintho lwa vahulila yaka,vasuvila khandi nivinwa mmatsi. ⁹ mwami yamoloma na paulu mu maloro ku vutukhu namuvolela ukharia tawe, navutsa wilwatse, ukhahonjela tawe; ¹⁰ shichila ndi halala niwe,na avulaho mundu akhusalilitsa,shichila ndi na vandu vanyikhi mulitala yili. ¹¹ paulu yamenyayo muhika mulala ni mieli sita,niyekitsanga likhuva lya nyasaye. ¹² lwa galliyo yamihitswa khuva gavana wa varoma mu lusomo lwa akaya,vayahudi valangana halala,nivakumila paulu nivamuhila mushina, ¹³ nivavola,mundu uyu avolela vandu vasale nyasaye munjila indamanu ya malako kakayanga. ¹⁴ lwa paulu yali nali himbi khukhunula munwa amolome,gallio yavolela vayahudi,munye vayahudi,niva ni kakilikali,muyalanga mundu uyu shichila vindu vitamanu inoho vutamanu vundi vwa yakhola,nyala khumuhulikhitsa. ¹⁵ navutsa shichila yaka ni marevo khulondekhana na makhuva,na miira na malako kenyu munye vene, mumale makhuva kenyu.shindenyi khuva mukhalaki wi vindu yivi tawe. ¹⁶ nayavakhunga khurula mu shina. ¹⁷ vakuriki vosi vakumila sosithene,mwimilili mukali wi lisinagogi, nivamulandula imbeli wi shina.na gallio khali yahenda khu mwoyo khu kavakhola tawe' ¹⁸ paulu lwayali niyakhamenyayo matukhu manyikhi,yasimukha nalekha vamwavo,niyambukha natsia mushivala shya siria na pilisila nende akwila.nashili khwambukha khurula mulitala lya kengurea,yavekwa liswi lyelye khulondekhana khuli yali niyisuhi. ¹⁹ lwa vatukha mulitala lya efeso,paulu yalekha pilisila na akwila iweneyo, navutsa ye mwene yatsia mulisinagogi nahangalitsana nukhumoloma na vayahudi. ²⁰ lwa vamureva atsilile khumenyakhu navo matukhu manyikhi,paulu yambakhana. ²¹ lwayali navalekhanga,yavola,ndakalukha khandinyasaye nava nayanza.khu lwa yako paulu yambukha natsia mu litala lya efeso. ²² lwa paulu yatukha kaisalia,yatikulukha natsia yerusalemu khutsia khuha vandu vilivukana milembe,nakholomokha natsia mulitala lya antokia. ²³ lwa yamenyayo matukhu mati,paulu yasimukha navirila mutsisomo tsya galatia na firigia,natinyiritsanga valondi vosi va yesu. ²⁴ na muyahudi mulala yalangwa apollo,yivulwa alekisandaria,yitsa efeso.yali mmolomi mulayi khandi yali yamanya vulayi tsimbaso tsyahandikwa. ²⁵ apollo yali niyekitswa munjila yu mwami.khandi yilwatsa nitsingulu tsinyikhi khandi yekitsa makhuva ka kilikali khulondekhana khu yesu,navutsa yamanya vutsa libatisa lya yohana lyonyene. ²⁶ apollo yaranga khwilwatsa mulisinagogi vuchila khuria.navutsa lwa pilisila na akwila vamuhulikhitsa, vamuvukula nivamuhila haluveka nivamwivalila injila ya nyasaye mu vunyukhu. ²⁷ lwa apollo yenya khwambukha khutsia mulitala lya akaya,vamwavo vamutinyiritsa khandi vahandikila valondi va yesu vali mulitala lya akaya vamwinjilitse. lwa yatukhayo,yavakhonya muno yavo vasuvila khuvirila khu tsimbavasi. ²⁸ shichila yakura vayahudi likali imbeli wa vandu vosi,navanyinya khuvirila khu mang'odo ndi yesu naye kristo.