1 mulivukana lya antokia, valimu vaporofeti na vekitsi.vali baranaba,simioni { alangwa nigeri },lukia khurula mu litala kirene,manaheni [ yali niyalelwa nu mwamihi herode ], na saulu. 2 lwa vali nivasalanga nu khuhonga khulia shukhulia,roho mutakatifu yavola,munzahulile baranaba na saulu, khukhola mihinzi cha ndavalangila. 3 lwa vali vakhamala khuhonga vuchila khulia shukhulia,nukhusala,nukhuvavikhila mikhono vandu yava,vavaruma. 4 khu lwa yako baranaba na saulu,lwa vali nivakharumwa na roho mutakatifu, vatsia nivatukha mu litala lya seleukia; khurula iweneyo vambukha nivatsia saipurasi. 5 lwa vali nivali mu litala lya salamis, vilwatsa likhuva lya nyasaye mu masinagogi ka vayahudi: na vali yohana khuli mukhonyani wavo. 6 lwa vali nivakhavira havundu hosi mu shisulu shya saipurasi khutukha mu litala lya pafosi,,vanyolayo mundu mukhumu, muyahudi yali muporofeti wu vuvehi, lira lyelye yalangwa bari- yesu. 7 mukhumu mweneyo yali mulina wu mwamihi wi shisulu shya saipurasi,yalangwangwa serigia paulu,naye yali mundu wu vucheli vunyikhi.khu mwamihi mwenoyo yalanga baranaba na saulu, shichila yenyanga khuhulila likhuva lya nyasaye. 8 navutsa elymas, mukhumu [ nindio lira lyelye nilikalukhanyinywe livolanga ] yavahinganyinya, niyenyanga khwikalila mwamihi avule khulonda lisuvila. 9 khu saulu, {ulangwa khandi paulu,} niyitsule roho mutakatifu yumikha tsimoni tsyetsye khuye, 10 navola, o yiwe mwana wa ibilisi,waitsula tsinganu tsyosi tsyu vuvehi nuvutamanu,yiwe mutsiku wu vulunji vwosi,khandi uchelitsanga vuli inyinga yosi khukalukhanyinya kakilikali ku mwami khuva vuvehi? 11 henza mukhono ku mwami kuli khwiwe,na ulavekhula,shulalolakhu liuva khu inyanga indidi.nonoho,lwoshosho ni shisundi vikwa khu elyma;niyanza khukhava mundu amukumila mukhono amuchenditse. 12 lu mwamihi yalola kali nikokholekhe, yasuvila,shichila yali nilichenya khu mekitso ku mwami. 13 paulu navalina veve varanga luchendo niva nina muliaro khurula mu litala lya pafosi,nivatukha mu litala likali lya periga lili mu pamufila.na yohana yavalekha nakalukha yerusalemi. 14 paulu na valina veve vachenda nivarula mu litala periga nivatukha mu litala lya antokia lili pisidia.litukhu {lyukhuhulukha} lilisabato vatsia mulisinagogi nivikhala hasi. 15 lwa vali nivakhamala khusoma malako ka musa nende mang'odo ka vaporofeti, valindi vilisinagogi varumanyinya likhuva nivavola, vamweru,numulikhu likhuva lyosi lyu khutinyilitsa vandu munu, muvavolele. 16 khu paulu yasinjila nichela nu mukhono kwekwe navola, vandu visiraeli na munye va mwaria nyasaye, hulikhitsi. 17 nyasaye wa vandu yava visiraeli yarova vise veru khandi najikungula vandu inyinga lwa vamenya mu shivala shya ekepeti, khandi nu mukhono kwi tsingulu yavimilila navarulitsamu. 18 khu mihika makhomi kane yikhutsila khu miima chavo mushangalangwe. 19 lwa yamala khutivitsa tsihili saba tsyamenyanga mushivala shya kanani, yahana shivala shenesho khu vandu veve vamenyemu. 20 inyuma wi vindu yivi yavaha vakhalaki khu mihika himbi tsimia tsinne na makhomi karanu khutukha khu muporofeti samweli. 21 vamanya nivasava vahelwe mwami, na nyasaye yavaha sauli mwikhula wa khishi, mundu khurula mu luvamba lwa benjameni, navamiha khu mihika makhomi kanne. 22 lwa nyasaye yamurulitsa khu vwamihi, yamihitsa dauidi khuva mwami; nalolekhitsa khu daudi navola, nyoli daudi mwikhula wa yesse, mundu wu mwoyo kwanje kuyanzi,alarwekhitsa lyenya lyanje lyosi. 23 khurula mu lwivulu lu mundu uyu khulondekhana khuli nyasaye yalaka, yakhola yesu khuva muhonyinyi wa visiraeli. 24 yesu nashili khwitsa yohana yilwatsa likanila khuvirila mulibatiswa khu vandu vosi visiraeli. 25 lwa yohana yali namalanga mihinzi chyechye, yareva, mukanakananga inze ndi wina? inze shindi naye wamulindanga tawe. navutsa hulikhitsi,aliho yitsanga inyuma wanje, khali inze ndukhanekhu khumunavulakhu vilaro vyevye tawe. 26 munye vamweru,vana vu lwivuli lwa aburahamu,khandi yavo khu munye vamuritsanga nyasaye,likhuva khulondekhana khu vohonyinyi yuvu lyarumwa khukhutse. 27 shichila vandu vamenya yerusalemi na vamihi vavo shivamunyanya tawe,khandi shivamanya makhuva khulondekhana khu vuporofeti kasomwanga vuli litukhu lilisabato nivamukhalakila. 28 khali kava shivali nishivune shyu kwenya yiirwe,vareva pilato ndi yesu yiirwe. 29 lwa varwekhitsa vindu vyang'odwa khulondekhana khuye, vamurulitsa khumusala nivamuvikha mu shilindwa. 30 navutsa nyasaye yamwisimukhitsa khurula mmbakhutsu. 31 yalolekha matukhu manyikhi khu yavo vayarula navo galilaya khutukha yerusalemi.vandu yava navo valolekhitsi veve khu vandu. 32 khu lwa yako khumuvolela makhuva malahi ku vunyanzi,khuli nyasaye yalaka vise veru, 33 nyasaye arwekhitsile khutse, vana vavo,khuvirila khwisimukhitsa yesu khandi; khuli kang'odwa musabuli yakhavili,yiwe uli mwana wanje,litukhu lya lero mmali khu khwivula. 34 na khulondekhana khumwisimukhitsa khurula mmbakhutsu,shyalakundila mushilindwa khandi tawe,yavola ndi,ndakhuha tsikhavi tsindakatifu tsyakilikali tsyandali ndalaka daudi. 35 khandi avola musabuli yindi, shulalekha mutakatifu wowo akundile mushilindwa tawe. 36 shichila lwa daudi yali niyakharumukhila shivune shya nyasaye mulikhula lyelye,yakhutsa,nyavilwa mushilindwa halala vise veve na mmbili kwekwe kwakunda. 37 navutsa, uyu wa nyasaye yisimukhitsa khurula mu likhutsa khandi,shiyakundila mushilindwa tawe. 38 khu kamanyikhane khumunye ndi, vamweru, khuvirila khu mundu uyu nyasaye akhuvelelelanga vwoni vweru: 39 khandi khuvirila khuye vosi vasuvilanga valombwa khuva valunji khurula khu vindu vyosi, vya malako ka musa kali kavule khukhulomba khuva valunji. 40 khu muhenze vulahi ndi vindu vyosi va vaporofeti vavola vivule khurwekhitswa khu munye; 41 loli,munye vachayi,khandi muchenye nu khutiva: shichila kholanga mihinzi mumatukhu kenyu,mihinzi cha muvula khusuvila, khali mundu namuvolela. 42 lwa paulu na baranaba varula mulisinagogi, vandu vitsihili tsindi vavasaya vamolomekhu makhuva kenako khandi mulisabato litsanga. 43 lwa livukana liuwa mulisanagogi,vayahudi vanyikhi nende vandu vi tsimbia tsindi valonda paulu na baranaba, vamoloma navo,nivavasaya vatsilile khumenya khuvirila mu tsimbavasi tsya nyasaye. 44 lisabato lyalondakhu, vandu vosi vu mulitala vakana halala khuhulila likhuva lyu mwami. 45 lwa vayuda valola vituma,valolela varumwa imbotokha navamoloma vutamanu khu vindu vya paulu yavola nivamunyeka. 46 navutsa paulu na baranaba vamola vuchila khuria nivavavolela, vuvele vulayi likhuva lya nyasaye lilwatse khumunye khuranga.navutsa shichila muliambakhane na mwivukule khuva shimutukhana khunyola liva mwoyo, henzi, khutsitsa khuvandu vitsihili tsindi. 47 shichila nindio nyasaye yalaka, navola, khuruvole yiwe uve vulavu vwa vandu vitsihili, ulere vuhonyinyi khutukha khu shiheli shi lilova. 48 lwa vandu vitsihili vahulila ndio,vali nuvusangali nivaha khuminya likhuva lyu mwami. na vanyikhi vali nivarovolwa khunyola liva mwoyo likhahela mba vasuvila. 49 na likhuva lyu mwami lyalanda mulosomo lwenolo lwosi. 50 navutsa vayuda vavwanyinyina mulilo mu vakhali vi tsimbia tsindi vali nivahelwa luyali,khandi vasalanga nyasaye,na vasatsa vimilililanga litaala lyenelo,nivarangitsa khudambitsa paulu na baranaba navavakhunga khurula mulosomo lwavo. 51 navutsa paulu na baranaba vasungusula lukushi khurula khu vilenje vyavo khumanyinya ndi valeki,nivatsia mulitala lya ikonia. 52 na valondi va yesu vitsula vuyanzi na roho mutakatifu.