¹ inyinga yeneyo mwami herode yaranga khudambitsa vandu valala vi likanisa. ² yiira yakobo amwavo yohana ni shivavi. ³ lwa yalola kayanzitse vayuda,yakumila petero khandi.nako kali matukhu kukhulia mukati kukhali na mamela. ⁴ khandi lwa yamala khumukumila,yamuvikha mushivoho,namuvikha khu vituma vinne vya vasikali khumulinda, yenyanga amulere imbeli wa vandu litukhu lilisabato nilyakhavira. ⁵ khu petero yavikhwa munzu ya vavohe,navutsa livukana lyatsililila khumusalila nu mwoyo mulala khu nyasaye. ⁶ vutukhu,khu vushi mukamba kwene herede amulere mushina,petero yali nakoni hakari ha vasikali vavili,navohelwe ni minyololo, na vasikali vandi vali nivalindi mushilibwa shinjilanga munzu ya vavohe. ⁷ khandi henza, injelosu yu mwami yitsa nililolekha khuye,na vulavu vwakha munzu ya vavohe: yasamula petero mumbalu namuvukhitsa, namuvolela,sinjila vwangu. na minyololo charonya nijirula khu mikhono chyechye. ⁸ injelosi yamuvolela ,fwala vilaro vyovyo.naye yakhola ndio.injelosi yamuvolela,ifwale inguvu yoyo ma unonde. ⁹ petero yalonda injelosi khutukha ilwanyi.na shiyali nilimanya ndi ki injelosi yakholanga kali kilikali.yakanakananga alola malolo. ¹⁰ lwa vali nivakhavira khu vasikali valindanga shilivwa shukhuranga nende shyakhavili,vatukha khu shilivwa shyalombelwa vivya shinjilanga mu litala likali; nashyo shyavikukhila vutsa shene; nivarula nivatsia ilwanyi khu muhanda mukali kwi litala, na injelosi yalekhana na petero. ¹¹ lwa petero yikalukhila mwene,yavola,ndakhamanya ni kakilikali mwami arumi injelosi yeye khumbonyinya khurula mu mukhono kwa herode, khandi khurula khu vindu vyosi vya vandu vayahudi vavele nivakanakananga vinyala khwikholekha. ¹² lwa yali niyakhamanya kenako, yatsia munzu mwa mariya nyina yohona, khandi yalangwangwa maliko,havandu vanyikhi vali nivakanile nivasalanga. ¹³ lwayikulitsa khu muliango kwi shilivwa, mkhana murukwa yalangwa loda yitsa khuhulikhitsa. ¹⁴ lwayamayilitsa mwoyo kwa petero, shichila vuyanzi vunyikhi shi yikula muliango tawe,navutsa yavazukha natsia munzu navavolela petero asinjile ilwanyi wi shilivwa. ¹⁵ navo vamuvolela,uli mulalu.navutsa yatsililila khuvavolela ni kakilikali nindio kali. nivavola, ni injelosi yeye. ¹⁶ navutsa petero yatsililila khwikulitsa, na lwa vikula muliango,vamulola nivachenya muno. ¹⁷ navutsa petero yavachingila mukhono vahonjele, navivalila khuli nyasaye yali numurulitse munzu ya vavohe.navola,mutsi muvolele yakobo navamwavo makhuva yaka. narula natsia havundu handi. ¹⁸ lwa vwashya, vasikali vali nilihenda mwoyo ni shina shyali nishikholekhe khu petero. ¹⁹ lwa herode yamukhava navula khumunyola,yarevekhitsa valindi khandi nahana lilako viirwe. khu herode yamanya narula mu lusomo lwa yudeya natsia mulitala lya kaisalia namenya iweneyo. ²⁰ khandi herode yali nuvurima na vandu va matala ka tiro na sidoni: vatsia khuye nu mwoyo mulala, na vahombelitsa blasito wali mulina wavo,khandi mukhonyani wu mwami, avakhonye,nivareva milembe shichila shivala shyavo shyanyolanga shukhulia khurula mu shivala shyu mwami. ²¹ khu litukhu lyali nilirovolwe herode yifwala zinguvu tsyu vwami niyikhala khu shisako shyu vwamihi,nalomoloma khu vandu. ²² vandu vakhuva isango nivavola,yoko nu mwoyo ku munyasaye, shukuli ku mundu tawe. ²³ nonoho injelosi yu mwami yamusamula,shichila shi yaha nyasaye vukhumi, nanyanywa nitsinyende, nakhutsa. ²⁴ navutsa likhuva lya nyasaye litsililila khumetekha nililanda havundu hosi. ²⁵ khandi baranaba na sauli vakalukha khurula yerusalemi lwa vali nivakhamala vuhinzili vwavo,vitsa na halala na yohana, yalangwa lira lindi maliko.