¹ varumwa halala na vamwovo vali mulitala lya yudea vahulila ndi khandi vandu vitsihili viyemi likhuva lya nyasaye. ² lwa petero yakalukha natukha mu litala lya yerusalemi,mukanda kwa vandu vashevwa vahangalitsana naye, ³ nivavola,yiwe uchenihe vandu vashili khushevwa khandi unyanyi shukhulia halala navo. ⁴ navutsa petero yaranga khwivala muvuvambalalu khurula muliranga, navola, ⁵ ndali mulitala lya yoppa nisalanga: na lwandarenchetsa,ndalola malolo, shindu shikha khurula mwikulu,khuli luvala lukali,lwikhitsa hasi mutsimbeka tsyalo tsyine,na lwikhitswa khuinze. ⁶ lwa ndikula tsimoni tsyanje nimbenza vulayi,ndalola tsyinyama tsyi vilenje vinne tsyu mulilova,ni tsyinyama tsyumbulimo,ni vindu vimola hasi,na manyonyi kabulukhanga mwikulu. ⁷ ndahulila mwoyo nukumbolela,petero,sinjila,usinze, unyanye. ⁸ navutsa ndamuvolela, auwa,mwami: shindu shyonekha inoho shitamanu shishili khwinjilakhu mu munwa kwanje tawe. ⁹ navutsa mwoyo kwarevula khurula mwikulu khandi,nikuvola,shindu shya nyasaye amali khutakasa [khwokitsa], ukhashilanga shonekha tawe. ¹⁰ yaka kikholekha hali khavaka, na vindu vyenievo vyosi vyakhweswa nivikalukhitswa mwikulu khandi. ¹¹ henza,nonoho vandu vavaka vali nivasinjile imbeli winzu yandalimu, vali nivarumilwe khurula mu litala lya kaisalia khwitsa khwinze. ¹² roho yambolela nzi navo, mbule khuhaya haya.vamwavo veru yava sita [varanu nu mulala] vatsia halala ninze, nukhunjila munzu yu mundu uyu. ¹³ yakhuvolela khuli yali naloli injelosi nisinjile munzu mwemwe nimuvolela, ruma vandu mu litala yoppa vatsi khulera simioni alangwa khandi petero; ¹⁴ alamwivalila makhuva kachila yiwe na vandu vinzu yoyo munyole vuhonyinyi. ¹⁵ lwa daranga khuvivalila,roho mutakatifu [mutsienukhu] yikha khuvo, khuli yikha khukhutse muliranga. ¹⁶ nditsukhitsa makhuva ku mwami, khuli yavola, kakilikali yohana yiina vandu mmatsi, navutsa munye miliinwa [mulabatiswa] mu tsingulu tsya roho [mutsienukhu] mutakatifu. ¹⁷ khu nikava nyasaye yavaha shihanwa shilala shyele khuli shya yakhuha lwa khwasuvila khu mwami yesu kristo,inze ndali wina mbingane na nyasaye? ¹⁸ lwa vahulila vindu yivi, vashiling'ana, nivitsominya nyasaye,nivavola, khali khu vandu vitsihili, nyasaye avehele likanila lileranga liva mwoyo. ¹⁹ khu yavo vasalana khulondekhana khulindambitswa lyarulana khu stefano varula nivachenda khutukha foenike, saipurasi nende antokia,vilwatsila vutsa vayahudi vonyene. ²⁰ navutsa valala khuvo, vandu khurula saipurasi khandi kirene, vitsa antokia nivamoloma navaguriki,nivavilwatsila ivangeli ya makhuva malayi khulondekhana khu mwami yesu. ²¹ mukhono ku mwami kwali halala navo, isavu inyikhi ya vandu vasuvila nivalonda mwami. ²² makhuva kivindu vyali nivikholekhanga kahulikhana mu likanisa lyali mulitala lya yerusalemi,navo varuma baranaba, natsia khutukha mu litala lya antokia. ²³ lwa yatukha nalola tsimbavasi tsya nyasaye,yali nuvuyanzi khandi navatinyilitsa vamenye mu mwami nu mwoyo mulala. ²⁴ shichila yali mundu mulayi khandi mundu yitsula roho mutakatifu ni lisuvila,na vandu vanyikhi vametekha khu mwami. ²⁵ baranaba yasimukha natsia khukhava saulu mulitala lya tarisa. ²⁶ lwa yamunyola, yamulera mu litaala lya antokia.khu vwiyangu vu muhika mulala vakana halala nilikanisa [ livukana ] nivikitsa vandu vanyikhi. valondi va yesu valangwa vakirisito lukhuranga lwene mu litala lya antokia. ²⁷ mumatukhu kenako valala khu vaporofeti varula muyerusalemi nivatukha mu litala lya antokia. ²⁸ mulala khuvo, yalangwa agaba,yasinjila nalolekhitsa nitsingulu tsya roho mutakatifu ndi inzala ingali ilitsa mu lilova lyosi.nako kirwekhitswa mu matukhu ka klaudia. ²⁹ khu valondi va yesu,khulondekhana nu vunyali vwa shavuli mulala wavo,valalila khuruma vukhonyi vukhukhonya vamwavo vavo vali mu lusomo lwa yudeya. ³⁰ vakhola ndiono,navarumanyinya tsisendi tsyavo khu varumwa khuvirila khu mikhono cha baranaba na saulu.