¹ na katukha mulitala lya ikonia paulu na baranaba vinjila halala mulisinagogi lya vayahudi, vilwatsa vulahi muno khutukha shituma shikali shya vayahudi na vakuriki vasuvila. ² navutsa vayahudi, vali nivambakhana khusuvila vahambitsa mulilo mu tsinganagani tsya vandu vitshili nivavalomba khuhinganyinya vandu vasuvila. ³ vamenyayo matukhu manyikhi,nivilwatsanga vuchila vuri nitsingulu tsyu mwami,naye yalolekhitsa khu likhuva lyelye li tsimbavasi,nahuchilila viloleklhitso ni vindu vyu khuchenyinya nivikholekha khuvirila khu mikhono cha varumwa. ⁴ navutsa vitumwa vya vandu mulitala vyali nilyavukhana:valala vali khuluveka lwa vayahudi na vandi vava khuluveka lwa varumwa. ⁵ lwa vandu vitsihili na vayahudi halala na vimilili vavo vachelitsa khuvarindila khandi ni venya khuvalesa na machina, ⁶ lwa varuma vamanya makhuva kenako, vilukha nivatsia mu matala ka lusitura na deribe mulusomo lwa likaonia nu mulusomo lundi lwavakhumbelitsa: ⁷ nivatsilila khwilwatsa ivangeli iweneyo. ⁸ mulitala lya lusitura, khwaliyo nu mundu mulala,yali ni yafwokoya vilenje khurula munda mwa nyina wewe,na yali yachendakhu tawe. ⁹ mundu uyu yahulila paulu namolomanga: paulu yamumikha tsimoni khuye naye nalola ali nilisuvila lyu khumuhonyinya, ¹⁰ yahanzukha nu mwoyo mukali namuvolela, sinjila vulunji khu vilenje vyovyo. na mundu uyu yaruma ikulu naranga khuchenda. ¹¹ lwa shituma shyalola ka paulu ya;li nakholi,valangilitsa mu lulomolomo lwavo lwa lukaonia, vanyasaye vikhi khukhutse khuli vandu. ¹² nivakulikha baranaba ''zeusi'' na paulu nivamukulikha ''herimesi'', shichila naye yamolomanga muno ¹³ musalisi wu munyasaye kwa zeusi, wi litempeli lyelye lyali ilwanyi wi litala, yalera ing'ombe ichilishi ni vimuli mushilivwa,shichila ye nende vandu venyanya khuhanila varumwa vuhanwa. ¹⁴ navutsa lwa varumwa,baranaba na paulu vahulila,varandula tsinguvu tsyavo nivatsia ilwanyi vwangu mushituma,nivalila ikulu, ¹⁵ nivavola,vandu munye, shichila shina mukhola vindu yivi? khutse khuli vandu khuli munye,khuli ni mivili khuli munye,na khumwilwatsilanga mukalukhane murule khuvindu vya vutsa yivi mwitse khu nyasaye ali mwoyo, yalomba likuli,ni lilova khandi ni vindu vyosi vili muvyo. ¹⁶ mumatukhu kavira yahuchilila tsihili tsyosi khuchenda mutsinjila tsyavo vene. ¹⁷ navutsa khali ndio, shiyavalekha vuchila khuhana lilolekhitsa,ndi yakhola malayi khandi navaha imbula khurula mwikulu khandi shimiyo shyu vwamu, namuha vyukhlia khandi niyitsulitsa miyoyo chenyu nu vuyanzi. ¹⁸ khali namakhuva yaka kosi,vwali vutinyu khu paulu na baranaba khukaya vutuma khuvula khuvasinzila tsinyama tsyu musango kwi viahanwa. ¹⁹ navutsa vayuda vandi vitsa khurula mu litala lya antokia na ikonia nivakatilitsa shituma shya vandu, nivalasa paulu na machina,nivamukhwesesa nivamurulitsa ilwanyi wi litala, nivakanakananga akhutsi. ²⁰ navutsa lwa valondi va yesu vali nivasinjile nivavoyong'ane khuye,,yasinjila niyinjila mwitala? litukhu lilondakhu,vatsia mulitala lya deribe na baranaba. ²¹ lwa vali nivakhilwatsa ivangeli mulitala lyenelo khandi nu khulomba valondi va yesu vanyikhi,vakalukha mu litala lya lusitura,nivatsia khutukha ikonia na antokia. ²² vatsilila khutinyiritsa mioyo cha valondi va yesu,nivavaluvilitsa khutsilila mu lisuvila,nivavola, khulinjila muvwami vwa nyasaye khuvirila mulinyakhana linyikhi. ²³ lwa vamala khuvarovolela valindi vuli mukanisa, khandi lwa vali nivakhasala nukhuhonga khulia shukhulia, vavavikha khu mwami,wa vali vasuvila. ²⁴ vavirila mulitala lya pisidia nivatukha pamufilia. ²⁵ lwa vali nivakhilwatsa mu litala lya periga, vakholomokha nivatsia attalia. ²⁶ khurula iweneyo vanina muliaro nivambukha khutukha antokia,wa vavikhwa khu tsimbavasi tsya nyasaye shichila mihinzi cha vali nivakhamala. ²⁷ lwa vatukha mu litaala lya antokia vavunjelitsa halala vandu vilikanisa,nivavavolela vindu vyosi vya nyasaye yali nakholi khuvirila khuvo,khandi khuli yali niyikule muliango kwi lisuvuila khu vandu vi tsihili. ²⁸ vamenya matukhu manyikhi na valondi va yesu.