¹ Kenako nikakhavira, yesu yatikulukha natsia yerusalemi wakhwali nende mulukha kwa vayahudi. ² Khwali nende litavalia lia matsi mu yerusalemi mwenomo himbi ni shilivwa shia makondi, liali liatilwa ni tsirilu tsiranu, lira lindi muluhebrania ni betsezatsa. ³ Shituma shikali shia vandu vali nivalwala, vavekhu, valwma, nende vafwokoya vamenyanga mu tsirilu tsienetso, nivalindililanga matsi kalenjele. ⁴ Shichila shia khase khosi, injelosi yu mwami yatsitsanga halitavalia lia matsi kenako khutuvulanyinya mulwale wu khuranga witumbulanga mumatsinikakhatuvukha, yahonanga khurula mu vulwale vwevwe vwosi. ⁵ khwali nu mundu halitavalia henaho wali niyaliyalwala vulwale khu mihika makhomi kavaka na munane. ⁶ Lwa yesu yamulola nakoniho, yamanya ni mundu wali niyalwala khumihika minyishi yamureva, wenyanga uhone? ⁷ mundu wali niyalwala mwenoyo yamuvolela mwami mbulakhu mundu unyala khumbila mu litavalia lia matsi yili, lwa matsi kavetsanga nikakhatuvukha lwa njelitsanga khukwamu mundu wundi aranganga khitumbulamu ninzi nishili. ⁸ Yesu yamuvolela, sinjila vukula shitali shioshio uchende. ⁹ Mundu wali niyalwala mwenoyo, yahona vwangu navukula shitali shieshie naranga khuchenda, makhuva kenako kikholekha khu litukhu li sabato. ¹⁰ Vayahudi vavolela mundu wali nahonyinywi, litukhu linu ni litukhu li sabato shikenyekhanga khuchinga shitali shioshio tawe. ¹¹ Mundu mwenoyo yavachipa, mundu umbonyinyi ambolele vukula shitali shioshio uchende. ¹² Navo vamureva,"nu mundu shina wakhuvolela vukula shitali shioshio uchende'?" ¹³ Navutswa woyo wali nahonyinywi shiyali namanyi mundu wali namuhonyinyi tawe shichila yesu yali aruli havundu henaho ni shituma shikali shia vandu valiho. ¹⁴ Nikakhavira matukhu mati, Yesu yanyola mundu mwenoyo mu litempeli, namuvolela lola uhoni nunundi lekhana nu vwoni, khu shindu shitamanu shivuli khukhukwila. ¹⁵ Mundu mwenoyo yarulaho, natsia khuvolela vayahudi Yesu naye wali namuhonyinyi. ¹⁶ Vayahudi varanga khutambitsa Yesu shichila yakhola shikholwa shienesho khulitukhu li sabato. ¹⁷ Yesu yavavolela, tata wanje wamenya shia khase khosi nahinzilanga khali khutukha nunundi khali inzi mbinzilanga khandi ndio. ¹⁸ vayahudi vakhava khuli vanyala khumwira, shichila yameneka malako ki litukhu li sabato konyene tawe, navutsswa yali uvoli khandi nyasaye ni tata wewe, khwilekhanyinya mwene khu nyasaye. ¹⁹ Yesu yavavolela, muvolelanga killikali mwana avulakhu vunyali vukhukhola shindu shiosi khuvirila khu tsingulu tsietsie mwene navutswa a shindu shisi shia tata akholanga nashio shia mwana akholanga. ²⁰ Tata wayanza mwana khandi amumanyinyanga shia shindu shiosi shia ye mwene akholanga. alitsa khumumanyinya vindu vikali viene viu khukhola khuvira yivi, khu vosi muliva nilichenya. ²¹ Khulilwa tata yisimushitsanga vandu vakhutsa, avaha vulamu, nindio khandi mwana ahetsanga vandu vayanzitswangwa navo vulamu. ²² Tata shiakhalachilanga mundu tawe, navutswa waha mwana wewe vunyali vwosi vukhukhalachila vandu. ²³ Vandu vosi vahe mwana luyali, munjila indala yeene khuli vahetsanga tata luyali mundu wambakhananga khuha mwana luyali shiahetsanga tata wamuruma luyali tawe. , ²⁴ Muvolelanga kilikali mundu uhulilanga likhuva lianje, khandi suvila mu woyo wanduma, ali nu vulamu vwi mihika ni mihika mundu khuli mwenoyo shialitsa khukhalachilwa tawe, navutswa wanyola vulamu shichila wakura likhutsa. ²⁵ Muvolelanga kilikali isaa ilitsa khutukha khali yatukha khale, lwa vandu vakhutsa khale valitsa khuhulila mwoyo ku mwana wa nyasaye yavo valitsa khukuhulila valitsa khutsililila khuva mwoyo. ²⁶ Khuli lwa tata ali nu vulamu muye mwene khandi walomba mwana wewe huva nu vulamu muye mwene. ²⁷ Khandi waha mwana vunyali vu khukhalachila vandu, shichila khali naye nu mwana wu mundu. ²⁸ Mukhachenyinywa na makhuva yaka tawe shiehila isaa ilitsa khutukha lwa vandu vakhutsa vosi, valitsa khurula muvilindwa viavo. ²⁹ Yavo vali nivakhola malayi, valitsa khwisimukha khurula mu likhutsa khandi vatsilili khuva mwoyo navutswa yavo vali nivakhola vindu vitamanu valitsa khwisimukha khurula mu likhutsa nu khukhalachilwa. ³⁰ Mbulakhu shianyala khukhola mwene khuvirilakhu vunyali vwanje khalachilanga vandu khuli tata wanduma ambolelanga. ³¹ Niva nyala khuhana vushiahidi khulondokhana khwinzi mwener, vushiahidi vwenovo shivunyala khuva vwatoto tawe. ³² Navutswa khuli nu wundi umbanilanga vushiahidi ni limanya avolanga katoto khulondokhana khwinzi. ³³ Yaruma likhuva khu yohana, nahana vushiadi khulondokhana khu katoto. ³⁴ Shimbuchililanga vushiadi vwa vandu tawe navutswa mbolanga makhuva yaka, khumuha nyinywi. ³⁵ Yohana yali khuli itaha yakhanga, nikholitsa vulavu, khandi mwikhoyela mu vulavu vwevwe. ³⁶ Navutswa vushiahidi vwandi navwo khwinzzi mwene, nu vwitsingulu muno khuvira vwa yohana, shichila mihinzi milala chia kholanga chihnanga vushiahidi havulavu, tata naye wanduma. ³⁷ Tata wanduma, naye uhananga mwene vushiahidi khwinzi mushili khuhulilakhu mwoyo kwekwe noho khuli asesanga. ³⁸ Likhuva lielie shilili mu mioyo chienyu tawe shichila mwa yambakhana khusuvila mu woyo wa yaruma. ³⁹ Musomanga mahandiko shichila mukanakananga lwa mukasomanga munyala khunyola vulamu vwi mihika ni mihika mahandiko matakatifu nako kahananga vushiahidi khwinzi. ⁴⁰ Khali ndio, mwa yambakhana khwitsa khwinzi, khu munyole vulamu. ⁴¹ Shikali ndi nende lienya lia vandu khunzitsominya tawe. ⁴² Navutswa namanya shimwayanza nyasaye mu mioyo chienyu tawe. ⁴³ Namala khwitsa khuvirila mu vunyali vwa tata wanje, nikhali mwambakhana khunzinjilitsa. Niva mundu wundi anyala khwitsa khuvirila mu vunyali vwevwe mwene, naye wa munyala khwinjilitsa. ⁴⁴ Munyala khuva musuvila munjila shina, niva munyala khwenya vandi vavitsominyi, na munyi shimuhetsanga litsominya khu woyo warula khu nyasaye wonyene tawe.? ⁴⁵ Muvuli khuva ninganakani ninzi wamuyala khu tata, Musa naye ulitsa khumuyala shichila naye wamwavikhakhu lisuvila lienyu. ⁴⁶ Niva mwali mwasuvila Musa mwakhasuvili inzi shichila yahandika makhuva khulondokhana khwinzi. ⁴⁷ Niva mwayambakhana khusuvila mukayandika, munyala khusuvila munjila shina makhuva ka mbolanga?