¹ Nalwo lwa mwami yamanya yahulila likhuva vafarisayo vavolanga yesu anyolanga valondi vanyivanyishi khandi abatisanga vechi vanyishi khuvira yohana. ² Khali niva yesu mwene shiyabatisanga tawe vechi vonyene, navo vabatisanga. ³ Yarula mulusomo lwa yudea nakalukha khandi mulusomo lwa Galilaya. ⁴ Khandi kenyekha mbaka avirili musamaria. ⁵ Khulwa yako, yatukha mulitala lia samaria havundu halangwangwa sikari, himbi khu mulimi kwa yakobo yali ni yaha mwana wewe yosefu. ⁶ Shisima shia yakobo shiali shiayelwa mulit6ala lienelo lwa yesu yavwa tsingulu shichila luchendo, yikhala himbi ha shisima shienesho tsiali himbi tsisaa sita tsiu mbasu. ⁷ Mukhali musamaria yiasi khuteha matsi, yesu namuvolela, "mbekhu matsi ku khungwa ''. ⁸ Vechi veve vali vatsili mulitala khukula shiukhulia. ⁹ Mukhali musamaria mwenoyo yamuvolela uli muyahudi ninzi ndi mukhali musamaria. undevanga matsi ku khung'wa munjila shina? vayahudi shivahambananga na vasamaria mulikhola liavo tawe. ¹⁰ Yesu yamuchipa namuvolela, uvanumanyikhu shihanwa shia nyasaye ahananga , mundu ukhurevanga matsi ku khung'wa, wakhamurevi naye yakhakhuhele matsi kahananga vulamu. ¹¹ Mukhali mwenoyo yamuvolela" mwami uvula shindu shiukhutehelakhu, khandi shisima hishi shitsia hasi muno. nihena ha unyola matsi kahananga vulamu? ¹² uli nuvunyali khuvira kuka weru Yakobo wakhuha shisima yishi, shichila khali ye mwene yang'wetsamu halala na vana veve nende tsing'ombe tsietsie. ¹³ Yesu yamuchipa " shia mundu wosi ung'wakhu alatsilila khuva nu vuluhu. ¹⁴ Navutswa mundu ung'wakhu matsi kanzitsa khumuha shianyala khutsilila khuva nuvuluhu tawe, matsi kanzitsa khumuha kalitsa khuva muye, khuli shirula hia mati kahananga vulamu vwi liva mwoyo. ¹⁵ mukhali mwenoyo yamuvolela, mwami mbekhu matsi kenako khu mbuli khutsilila khwitsa khuteha hanu. ¹⁶ Yesu yamuvolela rula hanu tsia uvolele musatsa wowo mwitsi naye hanu. ¹⁷ mukhali mwenoyo yachipa Yesu mbula musatsa. yesu yamuvolela uvoli katoto uvula musatsa. ¹⁸ shichila wali wahilwa na vasatsa varanu. khandi ni kilikali musatsa wa uli naye nunundi shiali musatsa wowo tawe. uvoli katoto. ¹⁹ mukhali mwenoyo yamuvolela"mwami mali khulola uli muprofeti. ²⁰ vakuka veru vasalilanga khu shikulu yishi, navutswa munyi vayahudi muvolanga Yerusalemi, naho havundu ha vandu venyekhanga vatsi khusala khu nyasaye. ²¹ Yesu yamuvolela, '' mukhali yivi suvila mwinzi, isaa ilitsa khutukha lwa vandu valitsa khuvula khusala khutata khu shikulu yishi noho mu yerusalemi noho khusikamira tata. ²² Munyi musikamiranga wa mukhamanyi khwamanya wa khusikamiranga lihonyinywa nilia vayuda. ²³ Navutswa isaa itukhanga khandi nayo iyi, vasikamira nyasaye mukilikali valasikamira tata muroho nende kilikali tata yenya vandu vario khumusika. ²⁴ Nyasaye ni roho, khandi vandu vasalanga khuye, khutukha vasale khuye khuvirila mu roho khandi munjila yatoto. ²⁵ Mukhali mwenoyo yavola, manyi masiha ulangwangwa kristo alitsa khwitsa, alitsa khukhuvolela shia shindu shiosi. ²⁶ Yesu yamuvolela inzi ulomolomanga khuyivi, ninzi ye. ²⁷ Isaa yeneyo, vechi va yesu vakalukha, navo vali nivilichenya lwa vamunyola nalomolomanga nu mundu mukhali navutswa avulakhuho khali mulala khuvo wamureva, shichila shina ulomolomanga naye> ²⁸ Mukhali mwenoyo yalekha inyungu ya matsi, nakalukha mulitala, navolela vandu viweneyo. ²⁹ Hambi mulole mundu umbolele shia shindu shiosi, shia nakholanga anyala khuva naye kristo? ³⁰ Navo varula mulitala lienelo, nivatsia khumulola. ³¹ Mutsisa tsienetso, vechi vamuhomba nivavola mwechitsi liakhu shiukhulia shitititi. ³² Navutswa yavavolela, ndi nende shililwa shukhulia shia munyi mukhamanyi. ³³ Khulwa yako vechi veve varanga khurevana vene, kanyala khuva mundu umulerele shiukhulia? ³⁴ Yesu yavavolela, shiukhulia shianje nu khukhola lienya lia woyo wanduma, khandi khuvweshitsa muhinzi kwekwe kwa yamba. ³⁵ Muli ni livola chirikale mieli chine khutukha khu lichesa navutswa muvolelanga mukenyekhu vulahi mu milimi, virakwa viakhomela khandi viayirechekha khucheswa. ³⁶ Muchesi achesanga ahelwanga murungu khandi avunjelitsanga virakwa viachesi shichila vulamu vwi liva mwoyo khu murachi nende muchesi nivikhonyele halala. ³⁷ Livola yili ni liatoto, mundu mulala arakanga, na wundi achesanga. ³⁸ Mali khumuruma khutsia khuchesa mu mulimi kwa mwakharaka mu, vandi vakhola muhinzi mu mulimi kwenoko numunyi munyola vukhala mu muhinzi kwavo. ³⁹ Vasamaria vanyishi khurula mulitala lienelo, vasuvila mu yesu, shichila mukhali musamaria mwenoyo yali uvavolele, ambolele shia shindu shiosi shia na khola. ⁴⁰ Lwa vasamaria vatsia khu yesu, vamuvolela amenye navo, ma yesu namenyayo khumatukhu kavili. ⁴¹ Khandi vandu vanyishi vasuvila shichila likhuva lia yesu yali navoli. ⁴² Navo vavolela mukhali mwenoyo, shikali makhuva kukhuvolele, nako kachilanga nu khusuvila tawe, navutswa khutsi vene khumali khusuvila khu kaye mwene avoli khandi nikilikali khumanyi naye muhonyinyi wa vandu mushivala. ⁴³ Matukhu kavili nikakhavira, yesu yarulayo, natsia mulusomo lwa galilaya. ⁴⁴ Yesu mwene yali uvoli, muprofeti shianyala khuhelwa luyali na vandu vu mushivala shieshie tawe. ⁴⁵ Lwa yesu yatukha mulusomo lwa galilaya, vagalilaya vamwinjilitsa vulayi, shichila vosi vali vamanyi shia shindu shiosi shia yali nakholi mu yerusalemi khu litukhu liu mulukha kwa pasaka khandi vo vatsia mulukha kwenoko. ⁴⁶ Yesu yakalukha mulitala lia kana lili mulusomo lwa galilaya wayakalukhanyinya matsi khukwa idivai mulala khuvimili va vayahudi yali naliho, wu mwana wewe yali nalwalanga mulitala lia kaperenamu. ⁴⁷ Lwa mundu mwenoyo yahulila, yesu aruli mulusomo lwa galilaya, yasimukha natsia khuye, namuvolela atsi mulitala lia kaperamu khuhonyinya mwana wewe wali nali himbi khukhutsa. ⁴⁸ Yesu yamuvolela, mundu avulakhuho khali mulala khumunyi, unyala khusuvila nakhaloli viloleshitsu nende vindu viu khuchenyinya. ⁴⁹ mundu mwenoyo yavolela yesu mwami, hamba khutsi nivi mwana wanje nashili khukhutsa. ⁵⁰ yesu yamuvolela, '' rula hanu utsi mwana wowo alahona .mundu mwenoyo yasuvila mumakhuva ka yesu yamuvolela nalwo lwa yarulaho. ⁵¹ Lwa yali nali khu makhanda vavumishi veve vamwakanila, nivamuvolela, mwana wowo uhoni. ⁵² Khulwa yako, mundu mwenoyo yavareva isaa yu mwana wewe yali nahoni nivamuvolela, ''ahoni tsisa saba mukolovo. ⁵³ Tata wu mwana mwenoyo yitsushitsa nakumbuka nayo isaa ya yali namuvolele, '' mwana wowo uhoni ye nende vandu vosi vi inzu yeye vasuvila. ⁵⁴ Yishi nashio shiali shiloleshitsu shia khavili shia yesu yakhola niyakharula mulusomo lwa yudeya khutsia mulusomo lwa galilaya.