¹ Fesito niyakhatukha mulusomo lwenolo yarula mulitala lia Kaisaria natsia Yerusalemi. ² Vasalisi vakali nende vimilili va vayahudi vamuvolela makhuva kukhuyala Paulu vavolele Fesito ³ vamusaya avalerele mu Yerusalemi; vali valombi vucheli vukhumwirila khunjila. ⁴ navutswa Fesito yavachipa Paulu umali khukumilwa khuli muvohe mulitala lia Kaiseria, khandi inzi mwene nakalukhayo vwangu yuvu. ⁵ Navola"lekha inzi na vimilili venyu valala khutsi navo khuyalila mundu uyu. niva ukholi shindu shitamanu shiosi." ⁶ Lwa Fesito yali niyakhamenya navo khu matukhu munane noho likhomi, yakholomokha natsia kaisaria litukhu lialondakhu, yasimukha natsia mushina shiakhalachilamu vandu, navola Paulu alerwimu. ⁷ Lwa yatukhaho Vayahudi vali varuli yerusalemi vasinjila nivavotokhana, nivaranga khuvola vindu vitamanu khulondokhana khu Paulu vakhywa khwivala vwatoto. ⁸ Paulu yasinjila mwene navola shilikhulolakhu shindu shitamanu khu malako ka vayahudi noho khu litempeli noho khu Kaisaria. ⁹ Fesito yali nilienya liu khuyanzitsa vayahudi, yareva Paulu wenyanga khulitukha yerusalemi, khutsia khuyalilwayo imbeli wanje khu vindu vitamanu via vavola wakhola? ¹⁰ Paulu yachipasinjila nunundi imbeli wi shina shia kaisaria havundu ha vanzalila shili khukholelakhu vayahudi shindu shitamanu, khuli yivi mwene umanyi vulahi mwene. ¹¹ Niva nyala khuva nakhola shindu shiosi shinyala khuchila khalachilwi likhutsa shinyala khwambakhana khwirwa tawe .niva vayahudi valava vangatilanga avulakhuho uli nu vunyali khuvira vwavo naisaya khu kaisaria. ¹² Lwa Fesito yali namali khushelenyinya na vandu vi shikhalo shieshie, yavola wisayi khu kaisaria, khulwa yako ulahilwa khu kaisaria. ¹³ Lwa matukhu kavira mwami Agripa nenBerinke vatukha kaisaria khwinjilitsa Fesito. ¹⁴ lwa vali vakhamenyayo matukhu manyishi, Fesito yivalila mwami makhuva ka Paulu yavola," khuli nu mundu hanu wa Felikisi yalekha niyavoha muchela. ¹⁵ Lwa nasimukha ninzia Yerusalemi vasalisi nende vasakhulu va va vayahudi vambolela makhuva khuye nivenya khumukhalachiila. ¹⁶ Navavolela khutsi varoma khuvula mwima ku khuhana mundu wosi wa vayalanga nashili khwakana na vandu vamuyalanga moni na moni, khandi ahelwi vwiyangu vu khwitetea khu kavavola khuye. ¹⁷ lwa vatukha hanu shinakoritsa vwiyangu vwosi tawe, navutswa khulitukhu lialondakhu nikhala mushina nimbana lilko mundu mwenoyo alerwi. ¹⁸ Yavo vamuyalanga lwa vasinjila valomoloma, shivayalakhu vindu vitamanu via nasuvilanga valavola khuye tawe. ¹⁹ navutswa vali nuvwahukhani shichila idini yavo khandi khulondokhana khu mundu wali niyakhutsa walangwa yesu wa Paulu yali wamenya navola ashili mwoyo. ²⁰ Nakorwa khuli nyala khurunishitsa manye vulunji vwa makhuva kenako. khulwa yako nareva Paulu niva anyala khuhuchilila khutsia khuyalilwa yerusalemi ²¹ Navutswa Paulu yareva khukhalachilwa na kaiseria, khulondokhana ni vindu vichilanga nivamuyala. yahana lilako alindwi khutukha lwa vamuruma khu kaisari. ²² Khandi Agripa yavolela Fesito, inzi mwene nyenyanga khuhulila ku mundu uyu avolanga,Fesito yamuvolela ulamuhulila mukamba. ²³ litukhu lialondakhu mumavwevwe Agripa nende Berinke, vinjila mu inzu yavayalilamu nuvutsanzali vunyishi halala nende vimilili va vasikali nende vimilili va vandu vilitala likali, Fesito yahana lilako, ma Paulu nalerwamu. ²⁴ Fesito navolela mwami Agripa nende vandu vosi mulolanga mundu uyu, wa vayahudi vambolele vindu vitamanu khuye mu yerusalemi khandi mulitala lia kaiseria, ma nivanjilila avuli khutsilila khuva mwoyo. ²⁵ Navutswa shinanyola shindu shitamanu shia yali nakholi tawe,shinyala khuchila akhalachilwi likhutsa tawe.lwamwene yareva atsi khukhalachilwa nende kaisari, nahuchilila khumuhila khu kaisari. ²⁶ mbulakhu shianyala khuhandichila mwami wanje khu makhuva yaka muleri khu munyi khushila muno khu mwami Agripa khu mbe nende kanyala khuhandika mu vunyishi khu makhuva yaka. ²⁷ Ndolanga shivuli vulayi khuruma muvohe, vuchila khuhana shivune shichilanga navohwa tawe.