¹ lwa vali nivakhavirila mu matala ka Amutipoli nende Apolonia, vatukha mulitala lia Tesalonike mwalisinagogi lia vayahudi liali. ² khadi Paulo khulondokhana khu mwima kwekwe navo, khandi khumatukhu kavaka kilisabato yarevana navo khuvirila mulilomoloma, narumishilanga mahandiko matakatifu ³ navivalilanga nu khuvamanyinya nikilikali kristo yali atushili khunyakhana nu khwisimukha khurula mu likhutsa yavola,"yesu wa mwilwatsilanga uyu naye kristo". ⁴ vayahudi valala khuvo khali nende vimilili vanyishi va vandu vakhali nende vugiriki vahuchilila niviyunga na Paulu nende sila. ⁵ Navutswa vayahudi valala vakhasuvila vavalolela imbotokha, nivatsia khulera vandu vali ni mima mitamanu nivalomba shituma nivaranga shileche. vasimukha nivatsia khusera mu inzu ya yasoni nivakhavanga khuvalera khu shituma shia vandu vosi. ⁶ Navutswa lwa vakhaywa khuvanyola vakhwesa Yasoni nende vasuvili valala, khuvahila imbeli wa vimilili vi litala likali. navo valila nivavola vandu yava vakhulerele vutinyu shia havundu hosi, nunundi vamali khwitsa mwitala likali lieru. ⁷ khandi Yasoni umali khuvinjilitsa munzu mwemwe, valechelitsanga malako ku mwami wa Roma khandi vavolanga khuvele nende mwami wundi ulangwangwa yesu. ⁸ lwa vahulila vario, vimilili vi litala likali halalani shituma shia vandu vahenda mwoyo. ⁹ Yasoni nende veshie navasinjilila khu mirungu khu vavoholwi. nalwo lwa vahuchililwa khurulaho. ¹⁰ lwa vwatukha vutukhu vasuvili varuma Paulu nende Sila khutsia mu litala lia Bereha, lwa vatukhayo vinjila mu lisinagogi lia vayahudi. ¹¹ vandu vahulila likhuva khushila muno, khuvira vandu vilitala lia Tesalonikes, shichila vahhulishita likhuva nu mwoyo mulala khandi vali vamenya nivasomanga mahandiko matakatifu shia litukhu, khulola niva nindio kali. ¹² vandu vanyishi khuvo vasuvila, khali vakhali vanyishi vaguriki vali nivahelwa luyali halala na vasatsa vasuvila. ¹³ Navutswa lwa vayahudi vilitala lia Tesalonike vahulila Paulu yilwatsanga likhuva lia nyasaye mulitala lia Bereha, vasimukha nivatiayo khukhola shileche mu shituma shia vandu. ¹⁴ nalwo lwa vasuvili varuma Paulu khutsia vwangu khu luchinga lwi inyanza, navutswa Sila nende Timoteo, varikala mu litala lia Bereha. ¹⁵ vandu vaheleshitsa Paulu khutukha mu litala lia Athen, varumwa ni likhuva liu khulanga Sila nende Timoteo khwitsa vwangu khwiyunga naye. ¹⁶ lwa Paulu yali navalindanga mu litala lia Atheni, yikosa mu mwoyo kwekwe lwa yanyola misambwa minyishi mu litala lienelo. ¹⁷ khulwa yako yahangalitsana mulilomoloma mulisinagogi na vayahudi nende vaguriki nende vandu vayakana navo musokoni shia litukhu. ¹⁸ valala khu vechitsi vekela filosofia ya epikuria nende sitoiki vahangalitsana mulilomoloma na Paulu. khandi vareva ni shina shia mundu washila khulomoloma uyu achelitsanga khuvola? valala vachipa, afwananga khuli mwilwatsi wilwatsanga makhuva khulondokhana khu vanyasaye va vandu vi tsmbia tsindi. valola vario shichila Paulu yilwatsa makhuva khlondokhana khu yesu khandi khuli yisimushitswa khurula mulikhutsa. ¹⁹ vamanya nivavukula Paulu, nivamuhila mushikhalo shia Areopaga, nivamureva khwenyanga khumanya liechitso shina lia wechitsanga yili? ²⁰ vindu via khuhulilanga nuvola nivicheni khukhutsi.khandi khwenya khumanya makhuva khulondokhana khu vindu vienevo. ²¹ vandu vosi va Atseni nende vacheni vamenyayo shimalilakhu vwiyangu vwavo khu shindu shiosi tawe, nikhali khuvola nu khuhulishitsa makhuva macheni. ²² Paulu yasinjila imbeli wi shikhalo shia Areopaga navola munyi vandu vi litala lia Atheni mali khulola mulimenya lienyu liosi mwamanya shia shindu shiosi khulondokhana khu idini. ²³ lwa nachenda shia havundu hosi mulitala lienyu likali nimbenzishitsa vindu via musalakhu nanyola vwali nivwahandikwakhu khu nyasaye wa khwakorwa. khulwa yako woyo wamusalakhu, khali niva mwamukorwa naye wa mwilwatsilanga nunundi. ²⁴ nyasaye walomba shivala nende vindu viosi vilimu naye mwami wu mwikulu nende lilova shianyala khumenya mu matempeli ka vandu vumbakha na makhono tawe. ²⁵ shikhunyala khumukholela mihinzi chi mikhoono chieru khwanyole shia yikomba ahelwi tawe, shichila naye mwene uhetsanga shia mundu wosi vulamu miuya chiu khwesesa nende shia shindu shiosi. ²⁶ khandi khurula khu mundu mulala, yalomba vanu vi tsimbia tsiosi mushivala khu valimenya shia havudu hosi khu lilova.wamanya khale matukhu ka venyekhanga khumenya khandi havundu ha valitsa khuva nivamenyanga. ²⁷ kenyekhanga vandu vi tsimbia vakhave mwami khu vamunyole khuli vikombanga khumumanya khali ndio, nyasaye shiali ihale wene khurula khu shia mulala khu khutsi tawe. ²⁸ khuvirila muye khumenyanga khandi khuchendanga khandi khungane vana veru kalivutswa khuli vahandichi venyu vitsinyimbo vavola khali khutsi khuli vana veve. ²⁹ lwa khuli vana va nyasaye shikenyekhanga khu kanakane liva lia nyasaye livele khuli itsahabu noho ifetsa, noho lichina, noho khuli shimanyilu shia mundu yalomba ni tsinganakani tsietsie. ³⁰ khandi mumatukhu ka vandu valolekhanga khuva vamukorwa, nyasaye ya honjela vutswa navutswa nunundi yenyanga shia mundu wosi uli shia havundu hosi yikanili khurula mu vwoni vwevwe. ³¹ shichila waviritsa khale litukhu lialitsa khukhalachila shia mundu wosi mu shivala munjila yi likhola liu vulunji khuvirila mu mundu waya rovola naye wahana shimanyilu khu shia mundu wosi, lwa yisimushitsa mundu mwenoyo khurula mu likhutsa. ³² khadi lwa vahulila makhuva khulondokhana khuli vandu vakhutsa valitsa khwisimushitswa khurula mu likhutsa valala khuvo vamukholela shihenyehenye navutswa vandi vavola khwenyanga ukalushili khulomoloma makhuva khulondokhana khu likhuvalienelo. ³³ khulwa yako Paulu yarula mushikhalo shia vandu venavo. ³⁴ navutswa vandu valala viyunga naye nivasuvila mulala khu vandu venavo ni Areopaga halala numukhali mulala walangwa DDamera, nende vandu vali nivaliho navo.