¹ Kileji Naomi korgenyi bo igoi, "Cheptanyu, tos ma cheng'uun ane ole imuung'ee, si komyeeit eng' inye? ² Tos ma bo orenyoo Boaz, ne ki omi ak tiibiikyi? Geero, iruri baale ngatigin kemoi eng' rwanyut ne kiboorse. ³ Ara anyun, iungee ak iilgee, ak ilaach ngoroiguk, ak iwe oloto mi rwanyut. Ago matiiborchige inendet kot kotar kwamisie ak koesie. ⁴ Ago ngoru, igeer ole karu si iwe ak ole mi inendet, ng'aany kelyekyi, ak iru yoto. Si komwoun kito ne kanyolu iyai." ⁵ Kieji Ruth Naomi "Ayae choto tugul kemwa" ⁶ Ki chortagee anyun kwo ole mi rwanyut, kwo koyai tugul che ki mwachi korgenyi bo igoi. ⁷ Ye kingo ka kwamiis ak koe ak kobaibait muguleldanyi, kwo koru ole kagirurukyi beka. Ki nyo Ruth mutyo ak kong'aany kelyekyi , ak koru yoto. ⁸ Ak kongoek kemoi kwen kosiir chichoto eng' rwondo. Ak koweigee, ak eng' yoto konai kole kirue ak kwony eng' kelyekyi. ⁹ Kile inendet, " ii ng'o?" Ak kiwol kole, ai Ruth cheptang'ung' ne otwoget. Tugee cheptang'ung' ngorieng'ung' amu ii chiitab oret ne legit." ¹⁰ Kile Boaz, " cheptanyu, ngoberurin Kamuktaindet ne Toror. Kaiboru mieindo ne o eng' let kosiir eng' taunet, amu ma irup murenik che mengechen, ngo che bonoon anan che mogore. ¹¹ Noto anyun cheptanyu, ameiywei! Ayaun tugul choto kemwa, amu ingen nganaset tugul ne bo bikyu kole. ii kwondo ne tinye atebeet ne nyalunot. ¹² Iman, ai chitab oret ne legit, ago mito chito age neta ko legit kosiiro. ¹³ Tebi kemouni, ak mutai karon, ngot koyaun chichoto nyalunot eng' chitab oret, ko mie noto, ko ngo yai noto nyalunot eng' chitab oret. Ago ngot ko ma yaun noto nyalunot eng' chitab oret, ayai anyun noto nyalunot eng' chitab oret, ko u ye sobe Kamuktaindet ne Toror.Ru anyun agoi koeech. ¹⁴ Ki ru anyun eng' kelyekyi agoi koeech. Ak king'eet ko tomo kenyit chi.Amu kile Boaz, "Amatigany konai chi kole konyo kwony rwanyut." ¹⁵ Kileji Boaz, "Ibu ngoryono iloochi ak itaach." Ak kingo yai ko u noto, ko kigerchi keruutik lo che bo baale ak kogesenji. Ki wo Boaz kowektagee nganaset. ¹⁶ Kingoit Ruth ole mi korgenyi bo igoi, kotebe koleji, "Ko u ne ng'alek cheptanyu? Ak kimwachi inendet tuguk tugul che koyachi chichoto. ¹⁷ Ak kile, "Kagono keruutichu lo bo baale, amu kile, 'Amewe ole mi korgeng'ung' bo igoi buch.'" ¹⁸ Kile anyun Naomi, "Muite cheptanyu, kot inai kito ne egu ng'aleechoto, amu memunyi agoi koyai kioto chichoto rani kosulda."