¹ Ki tinye Naomi chitaab oretab manong'otiondenyi, chi ne o ne mogoryo ne bo oretab Elimelek, ak kainenyi ko ki Boaz. ² Ak kileji Ruth chemoabaindet Naomi, "Ngawo mbar saturot beka che kameto kesiik. Amang'u ale anyoru inendet ne tos korirena." Koleji Naomi, "Ui, cheptanyu." ³ Ki wo anyun Ruth mbar ak koturisiot korube biko che kesisye. Ki it keljinenyi, ye kingoit komostab mbaret ne bo Boaz, noto ki bo oretab Elimelek. ⁴ Ki it anyun koit Boaz kobunu Bethlehem ak kogat kesiik koleji, "ngotebi Kamuktaindet ne Toror kobotok." Kowolji icheket inendet kole, "Ngoberurin Kamuktaindet ne Toror." ⁵ Koteebee Boaz otwogindenyi ne tononjini biko che kasisye koleji, "Bo kapng'o chebi?" ⁶ Kowolji otwogindet ne tononjini biko che kesisye koleji, "inendet ko cheptab Moab ne kibwani ak Naomi ye kingo wechge eng' emetab Moab." ⁷ Kolejo inendet, 'Kaigai chamng'o aturot ak aumate beka eng' kwenutab ratutigab beka, arube biko che kesisye.' Kait ak koturis kong'ete karon agoi ra ameemuny kot koek ra ne keemuny ngatigin." ⁸ Koleji Boaz Ruth, "Ikase, cheptanyu? Amatiwe iturisiote eng' mbaret age; matimete mbarenyu. Kaigai, tebi ak ilekite kwonyik. ⁹ Tekyi konyeguk kogeer mbaret ne kese icheket ak iwe irup icheket. Tos ma kang'at murenik ko matatwain? Ngwamin melel, iwe iee beko che kagoramji terenik murenichoto." ¹⁰ Ki ng'uruuk Ruth kot kotiny togenyi ng'weny eng' tegis, ak koleji chichoto, "amu ne si anyor mieindo eng' taing'ung' kot ibwata ane ne ai too?" ¹¹ Kowolji Boaz kolei, "kogemwowo tuguk tugul che ki yachi korgeng'ung' bo igoi kong'ete ngo me manong'otiong'ung', ak ko u ye kibagakte kwandang'ung', ak kameng'ung', koboto emet ne kigisikyinin ak inyo ole mi biko che ki ma inget eng' tai. ¹² Ngoyaagun Kamuktaindet ne Toror boisieng'ung'. Ngogonin melekto ne nyitaat Kamuktaindet ne Toror, Kamuktaindetab Israel, ne kinyo imwechi kebebaikyi." ¹³ Kolei Ruth, "Nganyor mieindo eng' taing'ung' kiptaiyandenyu, amu ka i kaigaiya ak amu kaing'alalji cheptang'ung' ne otwogin eng' chamnyet, mbo nganda ma u age eng' tibiikyu che otwogik." ¹⁴ Kingoit saitab amitwogik, koleji Boaz inendet, "Nyo butul amitwogichu, ak iamde kererutieng'ung' siki." Ki tebi Ruth anyun ak kesiik ak kigochi Boaz beko che kagigeel. Ki am kobiyony kot kong'et katuganik. ¹⁵ Kingo ng'eet kwo koturis, kong'at Boaz barnotikyi koleji, "ngoturot chebi mbo eng' kwenutab ratuutik ago mo kergong'. ¹⁶ Kora, ong'usyi metoweigab beka eng' ratuutik, ak ametoochi kotur amoger kong' inendet". ¹⁷ Koturisiot anyun Ruth eng' mbar agoi koskoliny. Kiboor che kagoturot, ak ki olo bo kerutik tiptem. ¹⁸ Kiila ak koib turoonik kwo nganaset. Koborchi korgenyi bo igoi che tee che kagotur. Ki ipchi amitwogik che kigaituch ko kagobiony ak kogochi inendet. ¹⁹ Koteebee Naomi koleji, "keture ano turonik rani? Keture mbaretab ng'o? Iberurot inendet ne kanain." Komwochi Ruth Naomi koleji kaboisie eng' mbaretab chito ne kiguure Boaz. ²⁰ Koleji Naomi osotiondonoto ki bo werinyi koleji, "Ngoberur Kamuktaindet ne Toror Boaz, mametoi rirenenyi eng' che sapsot ak che kikobek." Koleji kora Naomi inendet, " chichoto ko chitab orenyo ne legit." ²¹ Kole Ruth ne Moabaindet, "Wei, kamwoiywo kole atebee ole legite barnotikyi agoi kotar kogese beka." ²² Koleji Naomi osotiondonoto ki bo werinyi, "Cheptanyu, kaigai obe ak otwogik che kwonyik, si ma iimin biko eng' mbaret age." ²³ Ago ki tebi kobois anyun ak otwogik che kwonyik agoi keges baale ak nganook. Ki meng'is koboto korgenyi bo igoi.