¹ Ak kiguur kayoktoikchi tugul taman ak aeng' ak kogachi icheget kimnatet ak bounatet koboi chesawilok tugul ak kosoob che imiansot. ² Ak kiyokto koamda bounatetab Jehovah ak kosoob che miansot. ³ Koleji icheget, "amoib kiy ne bo bandang'wong' mbo kirokto nda lolet, nda makatiat, nda ko chepkondok, amoibote sumbotik aeng'. ⁴ Ak got age tugul ne omongjini, otebee oloto agoi obe. ⁵ Ak alak tugul che mataachak, ye omande eng' kokwonoto olelekte temburiek eng' keelyekwok si koek baornatet agobo icheget." ⁶ Koba anyun kobunot kokwatunwek koamdoi logoiywek che tililen, ak kosoobot bich eng' ola tugul. ⁷ Ak kigas anyun kirwogindet Herod tuguk tugul che kigoyaak, ak kiimge mising' amu kimwoe alak kole kagong'eet johana eng' che chu ki bo keny. ⁸ Ak kibere alak , kagotook Elija, ak kobere alak , kong'eet age eng' maotik cho ki bo keny. ⁹ Ak kile Herod, kiatil metitab Johana , ago ng'o anyun chichi ne agase tuguk che u choto agobo inendet? Ak kicheng' kogeer inendet. ¹⁰ Ak kingoweek che kiyoktoi, komwachi inendet tuguk che kagoyai. Ak kimut icheget koba taban koboto inendet agoi kokwet ne kiguure Betsaida. ¹¹ Ago ye kingonai tuiyosiek agobo nito korub icheget. Ak kitaach icheget ak kong'alalchi agobo bounatetab Jehovah, ak kisoob icheget che kimache kisoob. ¹² Ak ye kimache koimen, kobwanji anyun tamanu ak aeng' koleji inendet, "oonde tuiyet koba si koit kokwotunwek ak emet , si konyor ole ruisot ak amitwogik, amu kimi ole tabaanat. ¹³ Ago kileji icheget, "ogochi akwee amitwogik." ak kile, "magitinye kiy kobate makatinik mut ak njirenik aeng' kobate kebe kealji amitwogik bichu tugul." ¹⁴ (Amu ki oloo bo elfusiek mut murenik.) Ak kileji kayoktoik, "ochab kotebee ng'weny ak ngobeate konom." ¹⁵ Ak kiyai anyun kou noto, ak kichob tugul kotebe ng'weny. ¹⁶ Kinam makatinichoto mut ak njirenichoto aeng' ak konyal barak kipsengwet, ak koberur ak kimurmur ak kogachi kayoktoik kogochi tuiyet. ¹⁷ Ak kiamis kot ko biyong'io tugul ak kigium murmuranik che kingeet eng kerebonik taman ak aeng'. ¹⁸ Ak ye kisae inege, ko kimi kayoktoik koboto inendet ak kitebe icheget koleji, "mwae tuiyosiek kole aii ng'o?" ¹⁹ Kiwolji icheget koleji, len alak ii Joana kabatisanindet, koleen alak Elija, koleen alak kagong'eet maotiot eng' che kibo keny. ²⁰ Ak kileji icheget, ago oleen akwe aii ng'o? Ak kiwol Petero kole , "ii Kristo ne bo Jehovah." ²¹ Ago kitigon icheget , ak kong'at kolechi, "amomwachi chi ng'olyononito, ²² kole, kanyolji weritab chi konyalil eng' tuguk che chang' ak kotai boisiek inendet ak tisiik che eechen ak sirik ak kebar ak king'eet eng' betutab somok." ²³ Kora komwachi icheget tugul "ngo mache chi age tugul korubwa, ko taigee ak koib kimurtoiyondennyi betut age tugul ak koruba. ²⁴ Amu age tugul ne mache kosor sobondanyi kobeti, ak age tugul ne ibeeti sobondanyi agobo ane, ko noto ne asoru. ²⁵ kelji ne ne bo chi ngonyor ng'weny tugul nda kesare sobondanyi? ²⁶ Amu age tugul ne jistoenogee ak ng'alekchu kotun ajistoege agine weritab chi chichoto tun nyoni eng' torornatetenyi, ak ne bo kwand,a, ak ne bo malaikaisiek che tililen. ²⁷ Ak amwowok iman ale mito alak eng'' che tononsot eng' yu che ma gere meiya kotomo kogeer bounatetab Jehovah. ²⁸ Ak kingobek betusiek ola bo sisit kong'etee ngomwa ng'alechoto , komut Petero ak Johana ak Jakobo kolanda tulwet koba kosa. ²⁹ Ak ye kito kosae, kowalak itondab togenyi ak kolelagitu ngoroikchi kot ko lil bich. ³⁰ Ogeer, ak king'ololyo ak inendet biko aeng'u, choto ko ki Musa ak Elija, ³¹ ki katook eng' lilindo ak kiga ng'alal agobo meenyi ne kimache kosulda eng' Jerusalem. ³² Ak ki ka kobirto met Petero koboto icheget che kimi ak inendet, ago kingokos, kogeer lilindanyi ak bichoto aeng' che kitononsot koboto inendet. ³³ Ak kingomache kobesio ak inendet koleji Petero Jeiso, kanetindeni, kararan amu kimi yuto, si keteech keriosiek somok, neng'ung' age, kobo Musa, age kobo Elija. (komwoe ama nai kito ne mwae.) ³⁴ Ak yo kita komwae tuguchuto, konyo boldet ak kotuch icheget ak kiiyweis ye kingochut boldet. ³⁵ Ak kimong' tuget eng' boldet ak kole, "ni ko werinyu, ne kialewen; ogas inendet. ³⁶ Ak ye kingobata kutinoto, kotook Jeiso inegee ak kosisyo anyun amamwachi chi eng' betusiechoto kiy age tugul ne kiga kogeer. ³⁷ Ak betut ne kirube betunoto ye kingoreku eng' tulwet, kotuyo ak inendet tuiyet ne o. ³⁸ Ak geer anyun , kowaach chito age eng' tuiyet kole, "Kanetindeni, asain ale rire werinyu amu kiasich inege. ³⁹ Ak geer anyun , name inendet tamirmiriet ak kowaach , ak kobirtabirtage, kot kobun bugaat kutinyi, konyalil mising' ama chame kobagakta. ⁴⁰ Ak kiasaisai kayoktoiguk ale koonda ago ma imuch." ⁴¹ Ak kiwolji Jeiso koleji, "wei, ibini matinye kayanet ak kogunur, atebche kobotok ak amuitoi agobo akwe agoi au? Imutu wering'ung' konyo yu." ⁴² Ak kingota konyoni, kowirji ng'weny chesawiliet inendet ak kobirtabirtege mising'. Ago kiger kong' Jeiso tamirmiriet ne ya ak kosoob lekwet, ak koweekchi kwandanyi. ⁴³ Ak kikwong'io tugul agobo kimnatet ne o nebo Jehovah. Ago kingota kokwong'sot tugul agobo tuguk che kayai Jeiso koleji kayaktoikchi, ⁴⁴ ngochut ng'alechu itikwok amu tun kigoitoi weritab chi, kwo eunekab biko. ⁴⁵ Ago ma iguiyo icheget mwaet noto kiung'ak si manai ak kiywei kayoktoik kotebe inendet agobo mwaanoto. ⁴⁶ Kotoi anyun kotebege ichege eng ichege kole anono eng' ache ne egu ne o? ⁴⁷ Ak kingonai Jeiso kabwatutikab mugulelwekwai konam lekwet ne mining' ak konde ole legit inendet ⁴⁸ ak kileji icheget, "chi age tugul ne taache lekwani mining' eng' kainenyu ko kataacha, ak chi age tugul ne taacho ko kataach inendet ne kiyokwo. Amu age tugul ne mining eng' akwe tugul , ko ne o." ⁴⁹ Ak kiwolji Joana koleji, "kanetindeni, kikigeer chi koone chesawilok eng' kaineng'ung' ak kigitae amu ki ma kibendoti tugul." ⁵⁰ Ago kileji Jeiso inendet, "amotae inendet, amu inendet ne magertook ko neng'wong'. ⁵¹ Ak ye kilegit mising' koit betusiek che kitaache inendet eng' barak, kogiiljige kotakchi togenyi ak kwo Jerusalem. ⁵² Koyokto che ibe ng'alek koba kondoe inendet, koba anyun komandae kokwet age nebo Samarik ak kochopchi ole tebe. ⁵³ Ak ma taach inendet ikab oloto amu kiga kotokchi togenyi kwo Jerusalem. ⁵⁴ Ak ye kingogeer kayaktoik Jakobo ak Johana koleji, "Kiptayandani, tos imache keng'at mat ne bunu kipseng'wet si kotar icheget ko u ye kiyai Elija?" ⁵⁵ Ago kiwekchjige icheget, ak koger kong', ⁵⁶ amu kimacho weritab chi si kobar sobonwek, ago si kosor, ak koba anyun nganaset age. ⁵⁷ Ak kingota kobendi eng' oret, koleji chito age arubin oloo tugul iwendote. ⁵⁸ Koleji Jeiso inendet, "tinye lelwek kebenonik, ago tinye taritik che bo barak keswenikwai ago matinye weritab che ole indenoi metinyi." ⁵⁹ Ak kileji age tugul,"Rubkaa." Ago kileji chichoto kiptaiyandani, "chamwo awo korok atub kwandanyu." ⁶⁰ Ak kileji inendet, "mete che meiysot kotub chekwai, ago wui inye ak iamdate ng'alekab bounatetab Jehovah." ⁶¹ Kole age, agine arubin kiptaiyat , chomwo korok awo amwachi bikab gonnyu saisere. ⁶² Ago kileji Jeiso inendet, "mami chi ne name magombetab eik, ak kogus kong' koger let, ne nyoljini bounatetab Jehovah."