¹ Kingobata tuguchuto tugul, kolewen kiptaiyat biko alak tamanwokik tisab ak koyokto aeng' aeng' kole, kondoe inendet koba kokwet age tugul ak komosta age tugul ole bunoti. ² Ago kileji icheget, "o kesisiet, kobate ng'ering' kesik. Noto anyun osom Kiptaiyat nebo kesisiet asi komuch koyokchi kesiik kesisienyi. ³ Oba ortinwekwok. Ogeer anyun, kayoktok kou warekab kechirek eng' kwenutab suik. ⁴ Amoib lolet, nda chepkondok, nda ko kweonik, amokat chi eng' oret. ⁵ Ak got age tugul ne omongjini, omwa ole, "ngo tebi kalyet eng' koii." ⁶ Ak ngo mito werikab kalyet yoto, kotebe kalyeng'wong' inendet, ak ngot ko mami, koweekchinoge akwe. ⁷ Ak otebe goyoto anyun ak tuguk che konok, oam ak oee amu nyoljini kiboitiot melektanyi, amoitote gorik. ⁸ Ak kokwet age tugul ne omongjini ak kotaachak oam tuguk che kakindeno taing'wong' ⁹ ak osoob che miandos eng oloto ak oleji icheget. 'kagorikchok bounatetab Jehovah.' ¹⁰ Ago kokwet age tugul ne omongjini amataachak omande obe ortinwekchi ak omwa ole, ¹¹ 'mbo temburiek che bo kokweng'wong che kanam kelyekcho ko kagibukwok!' Ago onai ni ole kagorik bounatetab Jehovah. ¹² Ak amwawok ale tun keigeitu sodom eng' betunoto kosiir kokwonoto. ¹³ Aya we Korasin! Aya we Betsaida! amu nda kiga kiyai eng' Turo ak Sidon boisionik chebo kamuktaet ko u che kogiyai eng' akwee nda kiga kosiku keny, ak kotebe aronik ak kolachi kuniok. ¹⁴ Ago tun keigeitu Turo ak Sidon eng' kiruoget kosiirok. ¹⁵ Ak inye Kapernaum, tos tun kitororin iwe kipsengwet? Kiwirjinin ng'wenoy koto iit ole mi che kigobek. ¹⁶ Inendet ne kosok kogakagokasa agane, ak inendet ne tayok ko kagotaya agane, ak inendet ne taa kotoe inendet ne kiiyokwo." ¹⁷ Kiweechge anyun bichoto tamanwogik tisabu eng' boiboiyet, ak komwa kole, "Kiptaiyandani mbo chesawilok kogaseech iit eng' kaineng'ung'." ¹⁸ Ak kileji Jeiso icheget, "kiageer chesawiliet kororoku eng' kipseng'wet ko u kalyelet. ¹⁹ Ogeero, kaagonok kamuget si omuch otiech erenok ak melmelwek ak oterter kimnatet tugul ne bo bunyot, ak mami kiy ne imuchu kong'emak. ²⁰ Ago amoboiboitu amu ng'olyondoni, amu kasok iit chesawilok, ago oboiboitu amu sirotin kainaikwok eng' kipsengwet." ²¹ Eng' kasarato, kobaibait Jeiso eng' Tamirmiriet ne Tilil ak kole, "aweegun kongoi, we Kwanda, Kiptaiyat nebo kipsengwet ak ng'weny, amu kiung'e tuguchu che ng'omen ak che ngenok kiborji chererok, Ee, Kwandanyo, amu kichamak ko u noto eng' taing'ung' ²² Ki ko kona tuguk tugul kwanda, ak mami chi ne inget werit kobate Kwanda, ama nai chi Kwanda kole ng'o, kobate werit ak chi age tugul ne chame werit koborchi. ²³ Ago kora kiweekchige koger kayoktoik, ak koleji eng' ung'ot, "iberurotin konyek che geere tuguk che ogere. ²⁴ Amu amwawok ale kimache maotik che chang' ak laitorinik kogeer tuguk che ogeere, ago kima geer ak kimache kogas tuguk che ogase ago kima kas." ²⁵ Ak ogeero, kitonon ng'amotiot age ne bo ng'atutik kotiem inendet kole, Kanetindeni, ayae ne si tun anyoru sobondab koigeny?" ²⁶ Ak kileji, "kigisir ne eng' ng'atutik, isomandoi ano?" ²⁷ Ak kiwolji inendet koleji, "cham Kiptayat Jehovah neng'ung' eng' muguleldang'ung komugul, ak eng' sobondang'ung' komugul ak eng' kimnateng'ung' komugul, ak eng' ng'omnateng'ung' komugul, ak icham chitab kokweng'ung' ko u yo ichamegee." ²⁸ Ak kileji Jeiso, "kewelu komie, yai kou noto si isob." ²⁹ Ago amu kimache ko kararange, koleji Jeiso, "ng'o chitab kokwenyu?" ³⁰ Kowolji Jeiso koleji, kimi chito age ne kirekto kwo Jerusalem agoi Jeriko, ak kituiyo ak chorik che kisare ngoroik ak kobir ak koba, kobagakta kolegit kome. ³¹ Ak kirekto tisiindet age oranato, ak kingogeer inendet korob taban. ³² Ak ye kingoit Lawindet yoto, ak kogeer korob taban agine ko u noto. ³³ Ago ye kita kowendi samarindet agenge bandanyi, koit ole mi chichoto, ak ye kingogeer inendet korire. ³⁴ Kwo ole mi inendet koratyi ole kagibir ak kosochinot mwaita ak divaik. Ak kikelepchi chichoto sigiryenyi ak komut kwo gotab toek, ak korib inendet. ³⁵ Ak mutai, konem denarisiek aeng' kogachi chitab kobo got, ak koleji rib inendet ak tuguk alak tugul che kotesakis, ko tun kawechge, anyo ayagun. ³⁶ Eng chuto tugul ko somok ileen ng'o ne kiek chitab kokwenyi eng' chichoto kituye chorik? ³⁷ Ak kile inendet, "ne kirire chichoto." Ak kileji Jeiso, "wui ak iyai ko u noto." ³⁸ . Ak ye kita komi bandang'wai komongji anyun kokwet age ak kitaach eng' gonyi chepyoso age ne kegure Marta. ³⁹ Ak kitinye cheptang'wai ne kigure Maria ne kitebche eng' ole bo kelyekab Kiptaiyat kogase ng'olyondenyi. ⁴⁰ Ago king'ortot Marta agobo boisionik che chang', ak konyonji inendet ak koleji, "Kiptaiyandani, memake kiy ak kameto tupchenyu aboisie kityo? Mwachi so konyo kotoreto." ⁴¹ Ak kiwolji kiptaiyat Jeiso koleji, "Marta, Marta igereri met ak iimige agobo tuguk che chang', ⁴² ago kito agenge ne kamache , amu kagolewen Marta kebeberta ne kararan ne ma kisore."