¹ Ak kingota kosae Jeiso eng' orit age, ak kingotar koleji age eng' kayoktoikchi, "kipatayandani, inetech kesa, ko u yo kineti Johana kayoktoikchi." ² Ak kileji icheget, "yo osae, omwa ole, 'kwandanyo ne mi kipsengwet, ngotililit kaineng'ung', ngonyo bounateng'ung', ngoyaak megengun'ung' eng' ng'weny ko u eng' kipsengwet. ³ Koneech amitwogikcho eng' betut age tugul. ⁴ Ak inyoiwech kaat tengekwogikcho, ko u ye kinyochini kaat besenikcho, amemutech ole mi tiemisiet.'" ⁵ Ak kileji , ng'o eng akwe ne tinye chorwenyi ak kwo ole mi kemoi kwen, ak koleji, 'choruenyu, toreto makatinik somok abesen, ⁶ amu kagoit choruenyu ne bunu rutoi, amatinye kiy ne agochini? ⁷ Kowolji ne mi go koleji, 'amate iima. Kaager kurget ak kageruiye ak legukchu, ma muchi ang'et akonin. ⁸ Amwawok ale , mbo ngo mang'et kogochi amu chorwenyi, ko amu somenyi ko ne igochini kong'et kogochi kiy tugul ne mache. ⁹ Ak amwowok agine ale osom si kekonok, ocheng si onyoru, ogonygony si keyotwok. ¹⁰ Amu age tugul ne some kegochini, ak age tugul ne cheng'e konyoru, inendet ne igonygonyi keyotyini. ¹¹ Ng'o eng akwe kwanda, ne ngosom werinyi makatiat kogochi koita? Nda tos ngosom njiriot kogachi erenet? ¹² Nda ngosom koitab ngokchiet, ko tos igochi melmeldo? ¹³ Ngot ongen akwe, che oyaachen ogochi legukwok tuguk che kororon, siire anyun ne tia kagoitoet ne igochini kwandang'wong' ne mi kipsengwet, Tamirmiriet ne Tilil icheget che some inendet?" ¹⁴ Ak kionda Jeiso chesawilyet ne namat kut. Ago kingo ka ko manda chesawilyet, kong'alal anyun ne ki namat kut, kikwong'io tuyosiek. ¹⁵ Ago kimwa alak kole, "ondoi chesawilok komanda eng' Beelsabul,laitoriat ne bo chesawilok." ¹⁶ Ak kitiem alak inendet komage kaborunet ne bunu kipsengwet. ¹⁷ Ago kinai Jeiso kabkatutikwai, koleji, bororiet age tugul ne pcheege ko ng'emakse, ak kot age tugul ne pcheegei kolule. ¹⁸ Ak ngo besioge agine chesawil kotonondoi ano bororienyi? Amu omwae ole aone chesawilok eng' Beelzebul. ¹⁹ Ngot ko aone cheswilok eng' Beelzebul koone werikwok eng' ng'o? Amu eng' ni, igochini icheget koek kirwogikwok. ²⁰ Ago ngot ko aone chesawilok eng' mornetab Jehovah, ko kakochonjok anyun bounatetab Jehovah. ²¹ Ngo ng'eet chi ne tinye kimnatet ak kotinye karik korib gonyi, koteche tugukchi eng' kalyet, ²² ak yo kacho chito ne kim kosiir inendet, koterteri ak kosare anyun inendet karikchi tugul che cham kowalege, ak kopcheita sakanikchi. ²³ Inendet ne ma kimi tuwai kogirindo, ak inendet ne magiyumi tuwai kosertoi. ²⁴ Ye kago manda tamirmiriet ne ya eng' chito, kosiir ole mami beko kocheng'oti ole imung'e. Ak ye mata konyor, komwa anyun kole, 'kawektege gonyu ole kiabunuu. ²⁵ Ak ye kingoweek, konyor got kobugot ak ko chobot. ²⁶ Kwo anyun komut tamirmirik tisab alak che yaachen kosiir inendet, kochut anyun orit ak komeny oloto. Ago yaitu atebetab chichoto kosiir ne bo tai. ²⁷ Ak ye kita komwoe ng'alechu, komwa chepyoso age eng' tuiyet kole, iberurot moet ne kisichin, ak kinaik che kichuchun." ²⁸ Ago kile inendet iberurotin kosiir che kase ng'olyotab Jehovah ak korib. ²⁹ Ak ye kingorurukchige inendet tuiyosiek kotoi komwa kole, ibini ko ibindo ne kunuur, cheng'e koborunet, ago magikochini kaborunet kobate kaborunetab Jona ne ki maotiot. ³⁰ Amu kiek Jona kaborunet eng' bikab Ninebe, ko u noto weritab chi eng' ibini. ³¹ Tun ng'ete laitoriat ne chepyoso ne bo murot tai eng' kiruoget koboto bikab ibini ak koruokchi icheget, amu kibunu tabanwekab emet konyo kogas ng'omnatetab Solomon, ak ogeero mito yu ne o kosir Solomon. ³² Tun tononsot bikab Ninebe ak ibini eng' kiruoget ak kiruokchi, amu kisik icheget eng amdaetab Jona ak ogeero, mi yu ne o kosir Jona. ³³ Mami chi, ne ngo kagonam tait, konde ole ung'at nda kitonget orit, nda ko kurere, ago indenoi kito ne tononi si komuch kogeer lapkeiyet che bendi kot. ³⁴ Taitab bortang'ung' kondang'ung', ngo kararan kondang'ung' ko nyitat bortang'ung' komugul lapkeiyet. Ago ngo ya kondang'ung' ko nyiitat bortang'ung' agine tuindo. ³⁵ Ara anyun, geer lapkeiyet ne mi oriting'ung' nda ko tuindo. ³⁶ Ngo nyitaat bortang'ung' komugul lapkeiyet amatinye ole tui, ko lapkeitu anyun bortang'ung' tugul, ko u ye konin lapkeiyet tait ne ikweng'toi komie. ³⁷ Ak ye kingotar kong'alali, koguur Parisaindet age kwo koamis tuwai, ak kiwo go ak kotebi ng'weny si kwamis tuwai. ³⁸ Ak kingogeer parisaindet kokwong, amu kiamis Jeiso kotomo koun eut korok. ³⁹ Ago kileji Kiptaiyat inendet, " ra anyun, okwe Parisaik ouni barak tabet(kikombet) ak ketubet, ago nyiitat oriting'wong' saretab tuguk ak yaitiet. ⁴⁰ Okwe oberberen! Tos inendet ne kiyae sang' ko ma ne kiyae orit agine? ⁴¹ Ogoite kagochinoik che bo tuguk che mi orit, ak ogeero, tililitu tuguk tugul eng' akwe. ⁴² "Ago mutyo eng' akwe parisaik! Amu ogoitoi kebebertab taman ne bo ketik che mengech che ng'uu, ak che bo sogaek alak tugul, ak ometoi kiruoget ak chamnyetab Jehovah. Ago kita muchini oyai chuto amomete chun alak. ⁴³ Mutyo akwe Parisaik, amu ochame ng'echerok che tororen eng' kapkorosusiek ak kagatisiet ne kigatok eng' orisiekab oldoisiet. ⁴⁴ Mutyo akwe siriik ak parisaik! Okerge ak keringonik che matogu, ama nae biko che bunoti barak." ⁴⁵ Ak kiwolji ng'amotiot age ne bo ng'atutik koleji, "Kanetindoni,chuto chu kemng'a kotewerech ak ache." ⁴⁶ Ak kole Jeiso, "mutyo okwe ng'amotikab ng'atutik! Amu okelepchini biko milotik che nyigisen eng' laiset, ago akwe ko motwae milotichoto mbo eng' mornet agenge. ⁴⁷ Mutyo akwe, amu oteeche kererisiekab maotik, ago kwanisiekwok che kibare icheget. ⁴⁸ Kioegu anyun baorinik ak ochamnyechi boisionikab kwanisiekwok, amu icheget che kibare ak oteeche akwe kererisiekwai. ⁴⁹ Kile anyun, ng'omnatetab Jehovah, 'amu noto tun oakchini maotik ak che kiyoktoi, ak kobar alak eng' icheget ak konyalil alak.' ⁵⁰ Si, komuch koruokyi ibini korotigab maotik tugul che kigitumda kong'ete ko kakilumda ng'weny, ⁵¹ kong'ete korotikab Abel agoi korotikab Sakaria ne kime eng' kwenutab kaptisisiet ak gotab Jehovah. Wei, amwawok ak tun ketebe ibini. ⁵² Mutyo okwe ng'amotikab ng'atutik! amu kiosut yateiwot ne bo ng'omnatet ama obe orit okweget ak kiogerte che kita chute orit." ⁵³ Ak ye kingomong' eng' oloto kotoi sirik ak Parisaik korikyi inendet mising' ak kochikchi, si komuch komwa ng'alek che chang', ⁵⁴ koribe kole ndamangab konyor ng'olyo ne mang'une kutinyi si korate inendet.