¹ Eng' kasarata, ye kingoruruchge biko ng'isiat che bo tuiyet, koto kotiechge ichege, kosib kotoi koleji kayoktoik, oistoege bitekab parisaik, noto chombilisiet. ² Ago mami kiy ne tuchot ne matun kesule nda ne ung'at ne matun naakse. ³ Amu kiy age tugul ne omwae eng' tuindo ko tun kegase eng' ole lapke, ak che kiochamji itit eng' got orit kotun kemwoitoi eng' got barak (kipkesheb). ⁴ ak amwawok, chorondokchu ale , amoiywei che bare borto, ng'otyo ko mata komuch koyai kiy age. ⁵ Ago ateiywok si onai inendet , ne nyolu keiywei. Oiywei inendet ne ngo kagobar komuchi kowirji maatab kipchulio. Wei, amwawok ale, oiywei inendet. ⁶ Tos makialdae taritik mut che mengechen kebebertab mut, ne bo tongiloisiek? Ama meto Jehovah mbo agenge. ⁷ Ago itotin sumeek tugul che bo metewoikwok. Amoiywe anyun, osire okwe taritik che chang' che mengechen. ⁸ Ak amwawok ale, age tugul ne iborto eng' taitab biko, kotun ibortoi agine weritab chi chichoto eng' taitab malaikaisiek che bo Jehovah, ⁹ ago inendet ne taiyo eng' taitab biko kotun ketae agine eng' taitab malaikaisiek che bo Jehovah. ¹⁰ Ak age tugul ne mwoe ng'olyo ne ya agobo weritab chi, kenyochini kaat, ago inendet ne chube tamirmiriet ne Tilil ko maginyochini kaat inendet. ¹¹ Ak yo kakimutak oritab kapkorosusiek ak bounik, ko mata olebche agobo kito ne owolu nda ko ne omwoe, ¹² amu inetok Tamirmiriet ne Tilil eng kasarata kito ne muchini omwa." ¹³ Kileji anyun chito age eng' tuiyet, "Kanetindoni, mwachinowo werit ne kitupche kopcheiywo kebebertanyu che bo gaa." ¹⁴ Ago kileji Jeiso inendet, "chichi, ng'o ne kindeno aek kiruogindet nda ko pcheindet eng' akwe?" ¹⁵ Ak kileji icheget, "ogeer, ak oribge eng' magetab tugun, amu metebche sobondab chi eng'chang'utikab tuguk che tinye." ¹⁶ Ak kimwachi kalewenet koleji, kimi mogoriat age ne kiga rur mbarenyi mising', ¹⁷ ak kibwati eng' muguleldanyi kole, 'ayae nee amu matinye ole agonore bekchu?' ¹⁸ Ak kile, 'ayae ko u ni. Abute chogenikchu si ateech che eechen kosiir chu, si agonore bekchu, ak tugukchu tugul che kororon. ¹⁹ Si aleji sobondanyu, 'sobondanyu, itinye tuguk che chang' che kororon che konorotin che ime kenyisiek che chang', imuny, amisie, eise, ak ibaibaitu.'" ²⁰ Ago kileji Jehovah, 'iberber inye kimache sobondang'ung' kembouni bo rani, tos bunjini ng'o anyun tuguchoto kinyorchige?' ²¹ Uu nyoto anyun chito ne konorjinige magornatet inege, ne ma mogorio eng' Jehovah. ²² Kileji anyun kayoktoikchi noto anyun , amwawok ale, amogerer met agobo sobeng'wong', eng' tuguk che oame, nda agobo borwekwok eng' tuguk che olachi. ²³ Amu siire sobet amitwogik, ak sire borto ngoroik. ²⁴ Obwat chepkuginik, amu ma kole, ama kese, ama tinye ole konore nda ko choget , ago Jehovah ne bae. Osire taritik konyil ata! ²⁵ Ak ng'o eng' akwe ne imuchi kogerer met si kotes koindanyi eng' koindab kekwai agenge ne bo eut? ²⁶ Ngo momuchi anyun oyai mbo kiy kitigin , ko amu ne anyun si ogerer met agobo tuguk alak? ²⁷ Obwat taptok, ole bitito, maboisie, nda koletis, ago amwowok ale, mbo solomon eng' tagurtanyi tugul, ko kima kolochige ko u agenge eng' chuto. ²⁸ Ago ngolakchi Jehovah ko u noto suswek che bo kewet che mi rani ak karon kowirji ma, ko tos sire ne tia anyun kolaakwok, akwe che otinye kayanet ne mining'! ²⁹ Amo cheng' che oame, nda che oee, ama namak kaimutik. ³⁰ Amu cheng'e tuguchuto tugul bororiosiekab ng'weny, ago inget Kwandang'wong' kole omakchinige tuguchuto. ³¹ Ago ocheng' akwe bounatetab Jehovah, si ketewok tuguchuto tugul. ³² Amoiywei akwe amu ong'ering', amu baibai kwandang'wong' kogonok bounatet. ³³ Oalde che otinye, si ogoite kagochinoik, onapchige lolonik che maosegitu, konorutik eng' kipsengwetisiek ne mabegu, ole marikchini chorik ama ng'eme talamik. ³⁴ Amu ole mi konorweng'ung', ko oloto ole mi muguleldong'ung' agine. ³⁵ "Ongegimit suwetikcho, ak ngololyo taisiekwok, ³⁶ ak ogergeitu ak biko che kanye kiptaiyandengwai kowechgei kobunu tumtab katunisiet si ngo nyo ak kogonykony koatyi kasarata. ³⁷ Iberurotin otwogichoto che nyoru kiptayandanoto koribse. Ye nyo amwowok iman ale ratege ak inendet ak chobe bichoto koteb ng'weny eng' ole amisie ak kwo kobai icheget. ³⁸ Ak ngo nyo eng' ripset ne bo aeng' nda ne bo somok, ak konyor ko u noto, ko berurotin anyun otwogichoto. ³⁹ Ago onai ni ole nda kinget kiptaiyatab got kasarta ne nyoni chorindet nda kiripse kot ko mabagaktoi gonyi kobut chorindet. ⁴⁰ Ochopge ak akwe amu nyoni weritab chi eng' kasarta ne mobwati." ⁴¹ Koleji anyun Petero, "Kiptayandani, mwawech ache kalewenoni nda imwachini biko tugul?" ⁴² Kole anyun kiptayat, "ng'o anyun ribindet ne kiyoni ak ko ng'om, ne indoe kiptayandenyi kotononji gonyi, ak kogochi amitwogikwai che ame eng' kasarta ne makaat? ⁴³ Baibai otwogindonoto, ne nyoru kiptaiyandenyi koyae ko u noto. ⁴⁴ Amwowok iman ale, indenoi chichoto kotononji tugukchi tugul. ⁴⁵ Ago ngot komwa otwogindonoto eng' muguleldanyi kole, ' ngoenge kiptayandenyu masib koit,' ak kotoi kobar otwogik che murenik ak che tibik, ak koamis ak koeiso ak kobogit, ⁴⁶ weechege anyun kiptaiyat ne bo otwogindonoto eng' betut ne kama kiganye ak eng' kasarta ne manae, ak kobir mising', ak kopchechi kebebertanyi koboto che matinye kayanet. ⁴⁷ Ak otwogindonoto, ne kiinget ole maktoi kiptaiyandenyi amait kochopge nda koyai ko u eng' magenyi, kebire birutik che chang'. ⁴⁸ Ago inendet ne kima konget ak koyai tuguk che muchini biret, kebire birutik che ng'ering'. Ak age tugul ne kigigochi che chang' kotun kemage che chang'; ak inendet ne kigochi korib tuguk che chang' kotun kimage inendet che sire choto. ⁴⁹ "Kiacho si awirji mat ng'weny, ni anyun amache nda ko ka kolal kasarita! ⁵⁰ Ago atinye kabatisanet ne tatun kibatisanena, ak kamarigityo ne tia agoi koitita. ⁵¹ Tos obere kiacho agonu kalyet konyo ng'weny? Amwawok ale, ololo agoi besiet. ⁵² Amu kong'etee rani kopcheege biko mut che mi got agenge, taitos somogu eng' aeng' ak kotoiyo aeng' eng' somok. ⁵³ Pcheegee kwanda ak werit, ak werit ak wanda, kamet ak cheptanyi, ak chepto ak kamet, ak chepyosetab werit ak kametab werit." ⁵⁴ Kimwachi anyun tuiyet koleji, "ye ogeer kotogosu boldet eng cherongo, ole mache korobon ak koyaak ko u noto. ⁵⁵ ak ye ogeer chepchurchuryet ne churchureni murot ne bo tai , ole mache koit kemeut ne ng'wan, ak koyaak ko u noto. ⁵⁶ Kipchabai rumisiek onget obesie ole teptoi ng'weny ak kipsengwet, kainee anyun si monai ole teptoi betusiechu? ⁵⁷ Kaine si moruoch akwege agobo tuguk che bo imanda? ⁵⁸ Amu yo taiwendi ak bunyondeng'ung' taitab kiruogindet, igiilge obendi eng' oret si koundin si mata komutin taitab kiruogindet, ak komutyin kiruogindet ribindet, ak kotorjin ribindet korkoret. ⁵⁹ Amwaun ale magoi imong'une oloto agoi iyaakte tongiloyot ne bo let.