¹ Kimi biko alak eng' betusiechoto che kimwoji inendet kole mi Galilik che king'ol pilato korotikwai ak tiseiwekwai. ² Ak kiwolji kole, "tos ibwati ile Galilik chu ko ki kiptengegin kosir Galilik tugul amu kinyalilyo? ³ Amwowok akwe ale ngot ko mosigu obeku ko u noto. ⁴ Nda ko choo taman ak sisit che kilulji kot eng' Siloam ak kobar icheget, kobwati ole ki i kiptengegin kosir biko tugul che ki meng'ikab Jerusalem? ⁵ Amwowok akwe ale, "olo ngo ko mosigu, obeku ko u noto." ⁶ Ak kimwa Jeiso kalewenet kole, "kimi chi ne ki kol mogoiywet eng' mbarenyi , ago kiwechge kocheng' logoek amanyor agot agenge. ⁷ Ak kimwoji kiboitiot ne bo mbareni koleji, 'kiawechge eng' kenyisiek somok kinyacheng' logoek eng' mogoiwoni amanyoru. Til kolul. Amu ne si koyame nyungunyek buch?' ⁸ Ak kiwolji kiboitiot ne bo mbarenik koleji, "kiptayandani, 'ngotebi kenyini inege si asemberji ak andene keturek. ⁹ Ak ngot ko ma ii logoek nda ko ii kong'ete rani komie; ak ngot ko ma ii, atile anyun kolul. ¹⁰ Ak kinetisie eng' kapkorosut agenge eng' betutab sabato. ¹¹ Ak geero' kimi chepyoso ne ki mang'ete kenyisiek taman ak sisit. Ak kigeng'uruch ak kimemuchi kotonon. ¹² Ak kingogeer Jeiso inendet koguur ak koleji, "chepyosoni, kaketiachin." ¹³ Ak kikonor eunekchi eng' inendet, ak kitonon ak kolos Jehovah. ¹⁴ Ak kinerech kandoindetab kapkorosunoto amu kinyoiso Jeiso eng' betutab saet. Ak kimwoji kandoindenoto biko koleji, "mi betusiek lo che bo boisiet si kobwa keenya, ama eng' betutab Sabato." ¹⁵ Ak kiwolji kiptaiyat kole, "kiptengekinichu! Tos eng' akwe tugul otiachi tugwok nda ko sigiroikwok ak okweri koee beko eng' betutab Sabato? ¹⁶ Ak chepyosani ne cheptab Abraham ne kirat chesawil kenyisiek taman ak sisit makimuchi ketiach eng' betutab saet?" ¹⁷ Ak kingo ta komwoe ng'alechu, konerekyo bunikyi ak kokas koya, ak kiboiboitu biko tugul ak koloos Kiptaiyat. ¹⁸ Kimwa Jeiso kole, "kerge bounatetab Kiptaiyat ak nee? Tos kerge ak nee? ¹⁹ Tos kerge ak kesuiyotab kesuot ne kisut chi age ak kowirji mbarenyi, ak korut ak koek ketit komie ne o ak kitekchi taritik korikwai barakutab sokeek." ²⁰ Ak kimwa kogeny kole, "tos kerge bounatetab kiptaiyat ak nee? ²¹ Tos kergei ak bitek che kiuny chepyoso ak kongol mang'ang'a somok ak busiek agoi tun koruryo tugul." ²² Ak kiwo Jeiso kobunoot kokwatunwek ak suktosiek konetisioti ak koruto kotokchinige Jerusalem. ²³ Ak kileji chito age, Kiptayandani, tos mi che ng'ering' che tun kesoru?" Ak kiwolji kole, ²⁴ "ogilgei ochut kaborut ne marich, amu amwowok ale ite kocheng' kochut che chang' orit amemuch konyor. ²⁵ Ak tun kang'eet chitab kobo kaita ak koger kurget, ak otou otononse eng' sang' ak ogonygony kurget, ak ole, 'Kiptaiyandani yatwech.' "Ak kowolwok inendet kole, 'mangenok ak ole obunu.' ²⁶ "Kitou icheget kole 'kikeamisie ak geere tugul ak kinetisie eng' ortinwekcho.' ²⁷ Ak tun mwoe kole mangen ole obunu obechigee oistoenogee akwe yaikab cholwok.' ²⁸ Ago tun anyun ko mi rirek ak nyeetab kelek nda tun ogeer Abram ak Isak ak Jacobo ak kiboitinikab Kiptaiyat ak kewirchok akweget sang'. ²⁹ Ak tun bunu kong'asis, ak cherongo, ak chebunu murot tai, ak chebunu murot katam, ak kotebi ng'weny eng' oltab Kiptaiyat. ³⁰ Ak geero mi che bo let che tun egu che bo tai ak mi che bo tai che tun egu che bo let. ³¹ Kibka parisaik eng' betunoto ak koleji, "ng'et ak iwechige amu mache Herod si kobarin." ³² Ak kileji Jeiso icheget, "oba omwachi lelwandanoto oleji, 'geero' aone oik ak anyaii biko rani ak mutai ak betut nebo somok ko katar boisiennyu.' ³³ Ago awendi bandanyu rani ak karoon ak betut ne rube amu magoi keng'em kiboitiotab kiptaiyat eng' sang ne bo Jerusalem. ³⁴ Ee Jerusalem, Jerusalem, inye ne ibare kiboitinikab kiptaiyat ak iwire eng' koiik icheget che kakiogun. Kiamach konyil ata aruruch legukuk ko u ngokiet ne iruruchi arekchi eng' kebebaikchi ako mecham. ³⁵ Geer, ki ke bokogun kong'wong' koek kiratia ak amwawok ale mogero agoi tun omwa ole iberurot ne kichoni eng' kainetab Kiptaiyat.'"