¹ Ak kingo wo gotab bounindet agenge ne o ne bo Parisaek koamis eng' betutab sabato, keribot inendet. ² Ak geero , kimi chi eng' taitanyi ne kitinye kanuget ne ya. ³ Ak kitebe Jeiso kongololjini Kirwogikab ng'atutik ak Parisaek koleji, "tos chamdaat kiinya chi eng' betutab saet?" ⁴ Ak kisisyo, ak kimut inendet ak konya ak kotiakta kowejigee. ⁵ Ak kimwoji icheget koleji, "ng'o eng' akwe ne ngochut sikiryenyi nda ko eitonyi keben komosoru amu betutab sabato?" ⁶ Ak kisiisyo icheget eng' ng'alek tugul, mawolji kiy. ⁷ Ak kimwoji kalewenet eng' icheget che kikakikurji tumdo, koger icheget koleweni ng'echerok che bo tai, kong'ala kalewenet koleji icheget, ⁸ "Ngot ko kakiguurjin tumdab katunisiet, ngot koitebe ng'echerok che bo tai, amu kanyo chi ne o ne kekonyiti ago kakiguur inendet. ⁹ Ak si konyo agenge eng' akwe tugul che kakiguurok ak kolejin " igochi chichi ng'echeret ne bo tai , itou anyun iwe ng'echerokab let ak ing'ortoti. ¹⁰ Ago ngekuurin iwe itebe ng'echerok che bo let, asi ngo cho chito ne kaguurin komuchi kolejin, chorwenyu imuchi itebe ng'echerok che mi tai, ak inyoru anyun tegis eng' kwenutab che oamisiei tugul. ¹¹ Amu age tugul ne itororige, kemining'iti, ago ne imining'itige ketorori. ¹² Ak kileji anyun chichoto kigataach inendet kole, "tos ngichob amitwogikab bet nda ko che bo koskoliny, ko matiguur choronoguk che otupche, nda ko tilionutiguk, nda ko magorekab kokwet, ak ile si tun koguro icheget ak kowegun che kuget. ¹³ Ago ngichob amitwogikab tumdo, iguur che banansot, ak chebo mugungonik, ak che ingwoldos ak che koriotin, ¹⁴ si keberurin, amu matinye icheget che wegun amu tun kewegun eng' ng'etietab che bo iman. ¹⁵ Ak kingogas tuguchuto chito age ne kiamisot tugul ak Jeiso, kowolji koleji, "iberurot inendet ne tun kwamisie eng' bounatetab Jehovah." ¹⁶ Ago kileji Jeiso inendet, "kimi chito ne kichob amitwogikab koskoliny ak kotaach che chang'. ¹⁷ Ak kiyokto otwogindenyi eng' saitab amitwogik koguur che kiga kemwoji keleji, 'kobwa, amu ka ko chobokis tuguk tugul.' ¹⁸ "Ak Kiwool tugul eng' kibagenge ko gon amu nee si memuchi kobka. Nebo tai kowolji, 'kial mbaret ara awendi aba agere, ara asome itiaktaa.' ¹⁹ Ak kiwol age kole, 'kial eikchu chokisiek mut, awendi atieme ra asomin itiaktaa.' ²⁰ Ak kole age kora, 'kiatun kwandanyu ara mamuchi acho.' ²¹ Ak kowechge otwogindenyi ak ng'alek tugul che kiwol bichoto. Koepchi iit mokoryonyi ak kinerech mokoryotab got, koleji otwogindenyi, 'wui chakte iwe ortinwek che eechen ak che mengechen eng' emet ak imutu kibananok, chebo mgungonik, che ingwaldos ak che koriotin.' ²² Ak kile otwogindonoto, kiptayandani, kigoyaak amu kou ye keng'aat, ako manyi biko. ²³ Koleji anyun Kiptaiyat otwogindenyi, ui ortinwek che eechen ak rotiosiekab marenik ak isaisai kobwa go , si konyi konyu. ²⁴ Amu amwoun ale bicho tugul ki kagur ko makoi chamcham amitwokikchu.'" ²⁵ Ak kiba inendet ak sikom neo, ak kowechge inendet kogeer let ak kole, ²⁶ ngo wekchoge chi ak mata saas konunyi ak kamet ak kwondonyi, ak legukchi ak che tupcho ak tibikwai, wei ak sobondanyi, ko makoi oegu kayoktoikchu. ²⁷ Ak chi age tugul ne makeseni kimurtoiyonyi ak korupkaa ko makoi koegu kayoktoindenyu. ²⁸ Amu ng'o eng' akwe ne mache kotech got ne koi ko mateb ng'weny koityo? Ak kotet ak koit , ngot ko tinye tuguk che imei kotar tekset? ²⁹ Si ma ngakotononio tiik koitita ko maimuch kotar, geero ketou kechotachot inendet ne keerei, ³⁰ kole kitoi chichi koteekso ago ma imuch kotar.' ³¹ Nda ng'o laitoriat ne wendi boriet ak laitoriat age korok ko tomo kotebi ng'weny korok ak kotebee bikchi ngot komuchi elfusiek tamanu koborio ak chito ne tinye elfusiek tiptem? ³² Nda ngot ko takomi age ole loo koyokto ng'olio ak komach inendet koyai kalyet. ³³ Ara anyun chi age tugul eng' akwe ne mabogoktoi tugukchi tugul ko maimuchi koek kayoktoindenyu. ³⁴ Munyek ko kororon, ago ng'o ne tese anyinyindonyi ko kakobek, nda ki anyinyindoi ano kokeny? ³⁵ Makobo kiy eng' emet mbo eng' kapng'atat. Kiwirtoi kityo. Inendet ne tinye itiik che kikastoe, koep it."