¹ Ak kiriikyi Jeiso taagikab aisurut tugul ak kiptengekinik asi kogas inendet. ² Ak kiing'ung'ung'yo Parisaik ak siriik kele, "taache chichi kiptengeginik ak kaamisie tugul." ³ Ak kimwoji icheget kalewenoni koleji, ⁴ ng'o chi eng' akwe ne ngo tinye kechirek bogol ak ngobet agenge eng' choto ko tos mabagakta choto tamanwogik sogol ak sogol eng' surkwen ak kwo kocheng'aat noto kobet agoi kenyor? ⁵ Ak kingonyor konde tigikyenyi ak kobaibait. ⁶ Ak kingoit gaa , koguur chorondokyi ak bikab kokwet kururuch, ak koleji, 'ongebaibaitu ak ane amu kanyoru kechenyu ne ki ka kobet'. ⁷ U noto anyun amwowok ale , egu noto tun boiboiyet eng' kipsengwet eng' kiptengekyot agenge ne kasiik, sirei bik che bo iman tamanwogik sogol ak sogol chemamage kiy sigunet. ⁸ Ng'o chepyoso ne tinye tongiloisiek taman,ak ngobet tongiliot agenge , ko tos mailal matap romoriot ak kobuch got ak kocheng' mising' agoi konyor? ⁹ Ak kingonyor koguur chorondokyi ak bikab kokwet koruruch ak koleji ongebaibaitu ak ane , amu kanyoru tongilyonyu ne ki ka kobet. ¹⁰ U noto anyun amwowok ale, mito boiboiyet eng' malaikaisiekab kiptaiyat eng kiptengekyot agenge ne kasik. ¹¹ Ak kile , kimi chi anyun ne kitinye werikyi aeng', ¹² ak kileji werit ne mining' konunyi, 'aboo, kona tuguk che tun ipchewo', ak kipchechi icheget tugukchi. ¹³ Ak kingobata betusiek che ng'ering', ko rach weroto tugukchi tugul, ak kwo emet ne lo, kwo konyernyere eng' oloto tugukchi eng' atebto ne ya. ¹⁴ Ak kingo kagotar tugul konyo rubet ne o emonoto, kotoi anyun kobanan. ¹⁵ Ak kiwo inendet kotisyige chi ne bo emonoto, ak kikiyokto kwo koyaga torok eng' mbaret. ¹⁶ Ak kimache mising kole kobiyong'e metetek che kiame torok amu ki megochi chi ine kiy age tugul. ¹⁷ Ak kibkat komwa kole, tia otwogikab abonyu che tinye amitwogik che eme kot ko ng'et, ago ami ko kabara ruba eng' yu! ¹⁸ Ang'ete ak awe ole mi konunyu ak aleji, "aboo kiacholwogenji kipsengwet ak eng' taing'ung'. ¹⁹ Ma gonyoljino kiy kegureno wering'ung'; ngaeku agenge eng' otwogiguk."' ²⁰ King'eet anyun werit ne mining' kwo ole mi konunyi. Ago kingo ta komi ole loo, kogeer inendet konunyi ak korire inendet, ak kilabat kwo ak koleji asak ak kong'utut. ²¹ Ak kileji weri, 'Aboo ki ka cholwogenji kipsengwet, ak eng' taingun'ung', ak ma ko nyoljino koto keguureno wering'ung.' ²² Ago kileji konut otwogikyi oibu ochogune ngoriet ne kararan, ak kolakyi, ak ondenochi muguriot mornenyi ak olokyi kweinik. ²³ Ak ogetu moita ne nerat ak oeny si keam ak keboiboitu! ²⁴ Amu werinyu ne ki ka kome, ago kagosob kogeny, ki ka kobet ak kwanyoru, kitoi anyun koboiboitu. ²⁵ Ak kimi werinyi ne o mbar. Ak kingorik ole legit got kogas cheetab tiendo ak ureriet. ²⁶ Ak kiguur agenge eng' otwogik, ak kotebe kole nee tuguchu. ²⁷ Ak kileji kagoit kesendang'ung' ak kagoeng'ji abong'ung' moita ne nerat amu kagotaach inendet ko ta ko sabe.' ²⁸ Ak kinerech ak kitai kwo go ak komong' konunyi sang' kosaisai. ²⁹ Ago kiwolji konunyi koleji, geero kiaotin eng' kenyisiek che chang' ama but ng'atutieng'ung ak kima igono arua asi keboiboitu ak choronokchu, ³⁰ ago ki nga konyo wering'ung' ne ki bukwam tuguguk ak chepkugonik ieng'ji anyun moita ne nerat. ³¹ "Ak kileji kwada, 'weri, kimi tuwai betusiek tugul ak tugukchu tugul ko cheguk. ³² Ak kanyolu keboiboitu ak kegasge amu kesendang'ung' ni ne ko ka kome , ago kagosob kogeny, kiga kobet ago kakenyoru."'