¹ Ak kingobata noto ne matia kowendote kokwatunwek cheechen ak che mengechen, ak koborjini ak komwaitati logoiwek che tililen che bo bounatetab Jehovah. Ak kimi tamanu ak aeng koboto inendet, ² ak chepyosok alak che kiga kosoob eng' tamirmirik che yaachen ak mianwek: Maria ne kiguure Magdalena ne kimandae chesawilok tisabu; ³ Ak Joana kwondab Chusa kiboitiotab Herode, ak Susana ak alak che chang', che kiboisiechini inendet eng' tugukwai. ⁴ Ak kingo tuyoge tuiyet ne o , ak kobwanji inendet che kibunu kokwert age tugul, kong'alal eng' kalewenet kole: ⁵ "Kiwo kolindet kois kesuekchi, ak ye kita koletoi kobutyi alak oret taban, ak kigitiech alak, kwam taritik che bo barak. ⁶ Ak kibutyi alak etiet, ak kingoruut koyamio, amu manyor beko. ⁷ Ak kibutyi alak kwenutab katok, ak kitor katok koboto kesuechoto ak kogich. ⁸ Ak kibutyi alak nyung'unyek che kororon, ak kiruut ak ko ii age tugul bogol. Ak ye kita komwoe tuguchu, komwa eng' kutit ne o, kole, "inendet ne tinye itik che kostoe, kogas." ⁹ Ak kiteebe kayoktoikchi ole teptoi kalewenoni . ¹⁰ Ak kile, "kagigonok akwe onai ung'ootik che bo bounatetab Jehovah, ago kimwachini alak eng' kalewenoik asi ye 'keertoi ko magere kiy, si yo kase ko manae.'" ¹¹ Kalewenonoto ko ni: Kesuek ko ng'olyotab Jehova. ¹² Ak choto mi oret taban ko icheget che kigogas nda ityo konyo chesawilyet, ak koisto ng'olyot eng' mugulelwekwai si manyor kayanet ak kesor. ¹³ Ak icheget che mi etiet barak ko yo kagas ng'alek koyan eng' boiboiyet ak matinye tigitik , iyani kitigin, ak kochuchuch ge eng' betutab tiemutik. ¹⁴ Ak che kibutyi katok ko icheget che kigas ak ye kakoba eng' oreng'wai kotitir kereretab meet ak mokornandit ak boiboiyetab tugukab soboni, ama iiyo logoek che nyiitotin. ¹⁵ Ak che mi nyung'unyek che kororon ko icheget che kigas ng'olyot konam komie eng' mugulelwek ne bo muitaet ak ko kororonen , ak koiiyo logoek eng' kagiiletabge. ¹⁶ "Mami chi ne yo kagonaam tait kotuge kiy nda konde kureretab kitogut, ago indenoi kito ne tonone tait si komuch kogeer lapkeiyet biko. ¹⁷ Amu mami kiy ne ung'at ne matun koboruge, mami kiy ne keunye ne matun naakse eng' ole lapkei. ¹⁸ Ogaste komie amu age tugul ne tinye ko tun kigochini ak inendet ne matinye , ko tun kesare mbo ne len tinye." ¹⁹ Ak kibka konyor inendet kamet ak che tupcho, ago maimuch korikchi amu chang'indab biko. ²⁰ Ak kigimwachi keleji, "tononi komet ak che otupche eng' sang' komache kogeerin." ²¹ Ago kiwolji koleji, "kamenyu ak tupchosiekchu ko chuto che kase ng'olyotab Jehovah ak koyai." ²² Kilany eng' betut age moingetab beko ak koyoktoikyi ak koleji, "ongelandae araraita kebe bitonin bo araraita," kotoi anyun koba tai. ²³ Ak kingo ta kobendi koru ak konuch Jeiso, kowasakis beko eng' araraita, kotumtum ak komache konyi beko moinget orit ak kichonji ng'oyondit. ²⁴ Ak kibwa ole mi inendet , ak kong'eet , koleji, "kanetindoni! kanetindoni! Legit kemeiye!" Kong'eet anyun ak koger kong katumtumet ak wasetabge ne bo beko , kosis anyun araraita komung'io. ²⁵ Ak kileji icheget, "mi anao kayaneng'wong'? Ak kiyweis ak kokwong'io , kolejige ichege, "ng'o chichi anyun ne itononi mbo beekab araraita che kawasakis kot kogas it inendet." ²⁶ Ak kiba kot Koit anyun emetab Gerasenik ne legityini Galili. ²⁷ Ak yo kingonyo tabandab araraita kotuiyo ak inendet chito age ne kibunu kokwet ne kitinye chesawil, ak kima kolaachi ngoroi kong'ete betusiek che chang', ak kima komenye go, ago kitebe kererisiek. ²⁸ Ak kingo geer Jeiso, kowaach ak kobutyi tainyi ak komwa eng' kutit ne o kole, "ating'enin ne Jeiso weritab Jehovah ne toror mising? kasomin ale amenyalila." ²⁹ Amu king'at tamirmiriet ne ya komong eng chichoto. Amu ki ka nam ine eng' betusiek che chang', ak kribe mising' ak ki ka korate irimwek ak mugurek, ak king'etyo tuguk che kirate ak kione chesawilyet inendet kwo surkwen. ³⁰ Ak kiteebe Jeiso koleji, "kigurenen ngo?" Ak kile, "che chang',"amu kiga chut chesawilok che chang' inendet. ³¹ Ak kisom kole, si ma ng'at koba kebenet ne matinye ole bekchini. ³² Ak kimi oloto torook che chang' che kiagetos eng' tulwet ak kisom icheget mising kole kochamji kochut torochoto, ak koyanji anyun. ³³ Ak kimong' anyun chesawilok eng' chichoto ak kochut torook , ak kirwai torochoto chang' ko chortage chemgasut koba araraita ak komeiyo. ³⁴ Ak kingo geer mestewek tugul che kibiit korweiyo koba komwaita eng' kokwatunwek che eechen eng' emet agobo noto. ³⁵ Kiba anyun biko kogeer kito ne kogoyaak, ak kibwa ole mi Jeiso konyor chichoto kigamandae chesawilok kotebche eng' kelyekab Jeiso kolagaat ak kotinye ng'omnatenyi, ak kiywei icheget . ³⁶ . Ak kimwachi icheget che kageere tuguk che kabiit ole kagisoopto chito ne kitinye chesawilok. ³⁷ Ak kisom anyun biko tugul che legite emetab Gerasenik kole, kwo Jeiso kobagakta icheget, amu kichut icheget kayweisiet ne o, ak kilany ine moingetab beko ak koweektage. ³⁸ . Ak kisom chito ne kimandae chesawlyet inendet kole kotebi tuwai, ago kimwachi Jeiso kole' "wechigei, ³⁹ Wektege gong'ung' ak imwaite tuguk che eechen che kagoyaun Jehovah." Ak kiwo anyun komwaitat eng' kokwet ne o komugul tuguk che eechen che kagoyachi Jeiso. ⁴⁰ Ak ye kingowechge Jeiso kotach tuiyet, amu kiganye biko tugul inendet. ⁴¹ Ak geer anyun, kinyo chito age ne kigiguree Jairo ne ki agenge eng' kandoikab kapkorosut, ak kobutyi kelyekab Jeiso ak kosaisai inendet kole, konyo gonyi, ⁴² amu kitinye cheptanyi ne ki inege, olo bo kenyisiek taman ak aeng' ak kilegit kome inendet. Ago kirurukchige tuiyosiek inendet kowendi. ⁴³ Ak kimi chepyoso age ne kimandoe korotik kenyisiek taman ak aeng' ne kiga koboisiei tugukchi tugul eng' chepkerichinik, ama imuch kosoob inendet age tugul eng' icheget. ⁴⁴ kinyo anyun kobun let eng' inendet ak kotwa tabandab ngorienyi ak kasarata kosisyo korotik. ⁴⁵ Ak kile jeiso, "ng'o ne katinyo?" Ak kiingo tiiyo chi tugul, koleji Petero, konetindoni, karichkin biko che chang' ak kagegichin. ⁴⁶ Ago kile Jeiso kagotinyo chi, amu kaanai ale kagomanda kimnatenyu. ⁴⁷ Ak kingogeer chepyosonoto kole ma imuch koung'ak, konyo tai kobotanan ak kobutyi ng'weny eng' tainyi ak komwaita eng' taitab biko tugul kito ne kayai kotiiny inendet ak ole kagisoopto inendet eng kasarata. ⁴⁸ Ak kileji chebi, kagosoobin kayaneng'ung , wui eng kalyet. ⁴⁹ Ak yo kita kong'alali konyo chi ne kibunu gotab baunindetab sinakogit, kole, "kagome cheptang'ung'. Amata tiim kanetindet kogeny. ⁵⁰ Ago kogas Jeiso, kowolji koleji, "matiywei; Iyan kityo, si kisob." ⁵¹ Ak ye kingo kagoit got koma chamji chi age tugul kwo got koboto inendet, kobate Petero ak Johana ak Jacobo ak kwanitab cheboto ak kamet. ⁵² Ak kirirtos biko tugul ak kowaaktos agobo inendet ago kile, "morirsoti; Amu ma me inendet kobate mi korue." ⁵³ Ak kirorichi inendet anyun kochwees , amu kingen kole kagome. ⁵⁴ Ago kinam inendet eutab cheboto ak koguur, koleji, " lekwani,ng'eet!" ⁵⁵ Kowekchigee anyun tamirmirienyi, ak kong'et kasarata ak king'at kole kigochi kiy ne ame. ⁵⁶ Ak kikwong'io mising' sigikyi:Ak king'at inendet koleji icheget, amomwachi chi age tugul agobo kiy ne kagoyaak.