¹ Ak kingotestai kochang'itu biko ak korikyini Jeiso kokase ng'olyotab Jehovah,ko kitonone tabandab araraitab Genesaret. ² Ak kigeer moingonik aeng' che bo beko ko teleldos eng' tabandab araraita. Ago kima komi namikab njirenik, ki ka ba koun regereiyek che kinamee njirenik. ³ Ak kilany moinget age ne kibo simion kosom kole konaktae kwo ainet orit kitigin. Ak kitebe ng'weny anyun ak konet tuiyosiek eng barakutab moinget. ⁴ Ak ye kinga kotar konetishie , koleji simion, "kweri moinget ko ta konakta orit ole chang' beko , ak orektae regereiywekwok konamis." ⁵ Ak kiwolji simion koleji inendet, "Kiptayandani kogiboisie kemoi koech ama kinyoru kiy, ago amu ng'olyondeng'ung arektoe netit." ⁶ Ak kingo yai choto tugul ko kinam njirenik che chang' ak ki ng'etyo regereiywekwai. ⁷ Ak kiguur chorondokwai che kimi moingonik alak si kotoret, kobwa anyun ak konyiit maingonik tuwai, kot kotoi moingonik kochut beko. ⁸ Ago ye kingogeer simion petero, kobutyi kutung'oikab Jeiso ak kole, "weechige eng' yu amu aii kiptengekcho, eeh Kiptayandani." ⁹ Amu kikwong' ine ak tugul che kimi ago inendet agobo njirenik che kiga konam. ¹⁰ Ak ki mito agine Jakobo weritab Johana, ak johana werikab Sebede che kiboisie tugul eng' kibagenge ak Simion . Ak kileji Jeiso Simion, "ameiyweisie kong'eete ra iegu ne irame biko." ¹¹ Ak ye kingo kagokweri moingonikwai koba tabandab araraita , kobgakta tuguk tugul ak korub inendet. ¹² Ak kingo ta komi eng' kokwet age, ko ki mi chi ne kinyitat magondosaik. Ak ye kingogeer inendet Jeiso, kobut kosheb mo ak ko saisai kole, Kiptayandani, ngicham imuchi inyaa." ¹³ Ak kiyogoito anyun eunyi kotiny inendet ak kole, "amuchi anyain." Ak kasarata koistoge makondosaik eng' inendet. ¹⁴ Ak king'at anyun koleji, "kot ko memwoji chi ago ui ak iborjige tisiindet ak igoite chebo kanyaet, ko u yo king'at Musa koek baornatet eng' icheget." ¹⁵ Ago kiletage koem bororiosiek che chang" che loen agobo inendet , ak kibka tuiyosiek kocho kogas tugul ak si konya icheget tugul agobo mianwekwai. ¹⁶ Ago kiistoke kwo surkwen bo kosa. ¹⁷ Ak kingo takonetisie eng' betut age ko ki mi Parisaik ak kanetikab ng'atutik kotepsot eng' oloto , che kibunu kokwotinwek tugul che bo Galili ak Judea ak Jerusalem. Ak ki mi kamuktaetab Kiptaiyat ak inendet si konya icheget. ¹⁸ Ak keer anyun kigimut chi age komi eng' kitogunyi ne kimakong'ete, ak kicheng' oret ne imuchi komut inendet agoi taitab Jeiso. ¹⁹ Ak kingo matakonyor oret amu chang'indab biko , kolany Kipkesiebutab got ak kochorta inendet komi kitogunyi agoi kwenut eng' taitab Jeiso. ²⁰ Kingo geer Jeiso kayaneng'wai koleji, "chichi, kagenyoun kaat tengekwogiguk." ²¹ Ak kitoi sirik ak paresaik, kobwat agobo ng'olyondoniton kole, "ng'o nito mwoe ng'alechu yaachen? ng'o ne imuchi konyochi chi kaat ne ma jehovah inege?" ²² Ago ye kingonai Jeiso kabwatutikwai, kowolji koleji, "obwati nee eng' mugulelwekwok? ²³ Nee ne geigei, ngele kiginyoun kaat tengekwogiguk, nda ngele , ng'eet ak iwechigei? ²⁴ Ago si onai ole tinye kimnatet weritab chi eng' ng'weny konyochi kaat biko tengekwagik," ( koleji chito ne kimeat borta) "Amwaun ale ng'eet kesen kitogung'ung' ak iwechigei kong'ung'." ²⁵ Ak king'et kasarata anyun eng' taing'wai ak kiib kitokunyi. Ak kwo konyi kolosunoti Jehovah. ²⁶ Ak kikwong'io icheget ak kilos Jehovah ak kicholyo mising' kolen , "kagegeer kwong'utik che chang' rani." ²⁷ Ak kingobata tuguchuto tugul, kwo tai konyor taagindetab aisurut ne kigiguure Lawi kotebche ng'weny eng' ole kitaage aisurut. Ak koleji, "rubaa." ²⁸ Ak kibagakta tuguk tugul ak korub inendet. ²⁹ Ak kichopchi Lawi inendet eng' gonyi igorta ne o. Ak ki mi tagiikab aisurut che chang' ak biko alak che kitepsot ng'weny tugul kwamisot ak inendet. ³⁰ Ak king'ung'ung'ji parisaik ak sirikwai kayaktoik kole, "kaine si oamisie ak oeise ak taagikab aisurut ak kiptengekinik?" ³¹ Ak kiwolji Jeiso koleji "mamage kiy chepkerichot biko che chamege, kobate che imiansot. ³² Kimanyo aguur che bo iman ago kiptengeginik si kosiik." ³³ Ak kileji inendet, "irugutge konyil che chang' kayoktoikab Johana ak kosaa, ak ko yae ko u noto agiche che bo Parisaik ak koamisie cheguket ak koeise." ³⁴ Ak kileji Jeiso icheget, "tos omuchi orugut che kagiguurji katunisiet kota komi sandet ak icheget? ³⁵ Ago bkanii betusiek che tun istoege icheget sandet , korugutgei anyun eng' betusiechoto." ³⁶ Ak kimwochi icheget kalewenet kogeny koleji, "mami chi ne kereri kebeberta ne bo ngoriet ne leel ak konapchi ngoriet ne os. Amu ngo yai ko u noto ko manamege kebeberta ne leel ak ne os. ³⁷ Ama mi chi ne rongjini divaik che lelach lolotinwek che osen. Ngoyai ko u noto ko kereri divaik lolotinwek, ak kotumdage ak kong'emogis lolotinwek. ³⁸ . Ago muchini kendeno divai che leelach lolotinwek che leelachen . ³⁹ Ama mi chi ne ngo kagoe divaik chebo keny kotakomache che leelachen, amu mwoe kole, "anyinyen che bo keny."