¹ Ak kibune mbarenikab beko eng' betutab sabato ne bo aeng', ak kibutot kayaktoikchi mesisiekab beka kobore ak konyee. ² Ak kimwa alak chebo parisaik kole , "amu nee so yai eng' betutab sabato ago ma chamdaat eng' ng'atutik?" ³ Ak kiwolji Jeiso koleji, "tomo osoman mbo ngolyondoni ne kiyai Daudi ye kingo ame rubet koboto che kimito ak inendet? ⁴ Ak kiwo gotab Jehovah ak kocher makatinik che bo kabartaet koam, ak kogochi che kimi koboto inendet agiche, che ki ma chamdaat eng' ng'atutik koam chi age kobate tisiik ichege. ⁵ Ak kiwolji icheget koleji mbo weritab chi ko Kiptayatab sabato." ⁶ Ak kiwo kapkorosut eng' sabato age ak konet biko. Ak kimi chi ne kimeat eunyi nebo tai. ⁷ Ak kitopeni siriik ak parisaik ngot ko tos konya chi eng' betutab Sabato, nda ma ra konyor oret ne itamee. ⁸ Ago kinai kabwatutikwai ak koleji chichoto ki ka kome eunyi, "ng'eet, tonon eng' kwen" ak king'eet ak kotonon. ⁹ Ak kileji Jeiso icheget, "ateebenok ale tos chamdaat eng' ng'atutik keyai ne kararan eng' Sabato, nda keyai ne ya? kesor sobon nda kebar?" ¹⁰ Ak kigeerot Jeiso biko tugul ak koleji chichoto, "chuul eung'ung'" ak kiyai ko u noto ak kisoob eunyi. ¹¹ Ak kinerekcho ak koruruchge tugul ak kotet kito ne imuchi koita Jeiso. ¹² Kiwo Jeiso anyun eng' betusiechoto tulwet si kosa. Ak kisa ine Jehovah kemout komugul. ¹³ Kingokakoech emet , koguur kayoktoikchi, ak kilewen eng' choto taman ak aeng', che kiguure kaineng'wai che kiyoktoi. ¹⁴ Simion (ne kiguure kainenyi ne bo aeng Petero), ak Andrea ne tupcho ak Jakobo, ak johana, ak Pilipu, ak Bartolomayo, ¹⁵ ak Matayo, ak Tomas, ak Jakobo weritab Alpayo, ak Simion ne kiguure selote, ¹⁶ ak Juda weritab Jakobo, ak Judas iskariot ne ki ng'wektaindet. ¹⁷ Ak kibwa koreek ak inendet ak kotonone ole ribrib koboto tuiyet ne o ne bo kayaktoi ak biko che chang' che kibunu Judea komugul ak Jerusalem ak tabandab ainet ole bo komostab Turo ak sidon. ¹⁸ Kibkoni kogase inendet ak kisobcho eng' mianwekwai. Ak kigisoob icheget che kiinyalili tamirmirik che yaachen. ¹⁹ Ak kicheng' tuiyet komugul kotiiny inendet amu kibunu inendet kamuktaet, ak kisobcho icheget tugul. ²⁰ Ak kitoben koyoktoikchi ak kole, "oberurotin akwe che oi bonon , amu neng'wong' bounatetab Jehovah. ²¹ Oberurotin akwe che amok rubet ra, amu tun obiyongsoti, oberurotin akwe che orirtosi ra amu tun orarsoti. ²² Oberurotin akwe che sosok biko ak kotabanak ak kochurok ak kemwaita kaineng'wong' kole ya, agobo weritab chi. ²³ . Oboiboitu eng' betunoto ago sokorye eng' boiboindo amu oger anyun , O melektang'wong' eng' kipseng'wet , amu kiyochi kwanisiekwok maotik ko u noto. ²⁴ Ago mutyo akwe che oi magore, amu kikotaach kagaigaeng'wong'. ²⁵ Mutyo akwe che obiong'yotin ra amu tatuun koamok rubet. Mutyo eng' akwe che orarsoti ra, amu tatun otei ak orirsoti. ²⁶ Mutyo eng' akwe yo mwoe biko tugul che kororon agobo akwe, amu kigoyachi ko u noto kwanisiekwai maotik che bo lembech. ²⁷ Ago amwowok akwee che ogase, ale ocham bunikwok , oyachi che kororon icheget che sosook. ²⁸ Oberur icheget che chubok ak osachi icheget che matinye kong ne kerenok. ²⁹ Ak inendet ne irabachin togilgiliet age, igochi togilgiliet age. Ak inendet ne sarenin ngorieng'ung' ko me-ete mbo sambung'ung'. ³⁰ Igochi age tugul ne some. Ak inendet ne sarenen tukuguk ko mata ta iwekune kogeny. ³¹ Ak kou yo omache koyaiwok biko , oyachi ak akwe kou noto. ³² Ngocham anyun icheget che chamok, otinye kongoi nee? Amu mbo kiptengeginik kochame agiche icheget che chame. ³³ Ak ngo yachi che kororon icheget che yaiywok che kororon , otinye kongoi nee? Amu mbo kiptengeginik koyae kou noto. ³⁴ Ak ngibesendochi biko che ibwotii ile tun wegu, otinye kongoi nee? Amu mbo kiptengekinik ko besendochini kiptengekinik alak si konyor che teno chechiget. ³⁵ Ago ocham bunikwok ak oyachi che kororon agiche. Ak obesende , amogany onyoru kogeny si ko eet melektang'wong', ak oegu werikab inendet ne toror mising'. ³⁶ Oegu che tinye rirge, ko u kwandang'wong' ne tinye rirenetab ge. ³⁷ Amoruokchi , si tun ko makirwokwok,amous chi si tun koma kiusok. Onyochi kaat biko alak si kenyoiywok kaat. ³⁸ Ogoite asi tun kegonok, okere ne kararan ne kiginyit, ne ki kisachasach kot korara, choto che tun indoi biko tegetikwok. Amu kereiwekwok che ogeree ko noto ne tun kigerurenok ak akwe. ³⁹ Ak kimwoji kalewenet koleji , 'imuchi kipkoratiat kondochi kipkoratiat? Tos mororokchi tuwai kebenet?' ⁴⁰ Masiire kayoktoik kanetindet ago inendet ne kigonetak kogergeitu ak kanetindenyi. ⁴¹ Amu nee si igeere betbetiat ne mito kondab werit ne otupche, ago mebwati musukyet ne mi kondang'ung' inendet? ⁴² Nda imuktoi ano ileji lemeng'ung' tupchenyu , inganemun betbetiet ne mito kondang'ngung' ago mebkat musukyet ne mi kondang'ung' inyendet? Inyee chombilindoni! Inemu korok musukyet ne mi kondang'ung' inyendet, si yo kaigeerte komie , imuch anyun inemu betbetiat ne mi kondab tupcheng'ung'. ⁴³ Amu mami ketit ne kararan ne iye logoek che yachen , ama mi ketit ne ya ne iye logoek che kororon. ⁴⁴ Amu naat ketit age tugul eng' logoek che iye, amu mabute biko logoekab mogoonik eng' katok ak kobute biko logoekab sabibu eng' ketitab katok. ⁴⁵ Inemu chito ne kararan kito ne kararan kobun konoruet ne kararan ne mi muguleldannyi, ak i nemu chito ne ya kito ne ya kobunu konorwenyi ne ya ne mi muguleldanyi, amu che mwoe kutinyi ko che nyiitat muguleldo. ⁴⁶ Amu nee si oguurena kiptaiyat amoyae tuguk che amwoe? ⁴⁷ Chi age tugul ne nyonjino ak kogas ngalekchu ak koyai , abaruok kito ne kerge. ⁴⁸ Kerge inendet ak chito ne teeche got ne kibaal kwo ng'weny mising' ak konde tiik. Ak ye kingo chang'it beko korus beekab kutyat ama imuch kotumtum, amu kigiteech komie. ⁴⁹ Ago inendet ne kase ama yae ng'alekchu. Ko kerge ak chito ne kiteech got eng' nyung'unyek amaalumji ng'weny tiik , kirus beekab kutiat ak kilul kasarata ak kieet luletab koyoto.