¹ Ak king'etio tuiyet komugul ak komutchi inendet Pilato. ² Kitoi anyun komwaitae ng'al kole, "kiginyoru chichi komaasi bororienyo ak koete kegochi aisurut kaisari inendet, ak kolen ai Kristo , laitoriat." ³ Ak kitebee Pilato, kole, "ii laitoriatab Yahudik?" Kiwolji kole kaimwa. ⁴ Ak kileji Pilato tisiik che eechen ak tuiyosiek, "manyorji lelut chichi." ⁵ Ago kititirji mising' kole kimuti biko, konetoti eng' Judea komugul, ko taune Galili agoi koit olito." ⁶ Ago kingogas Pilato ngolyondonoto, kotebe kole ngot ko tos Galilindet chichi. ⁷ Ak kingonai kole bo bounatetab Herod, koyokto ke mututa Jeiso kwo amu kimi inendet agine Jerusalem betusiechoto ⁸ Ak kingogeer Herod Jeiso, kobaibait mising', amu kimache kong'ete keny kogeer inendet, amu ki ka ko gas tuguk che chang' agobo inendet ak kimache nda geer kwong'utk koyaak eng' inendet. ⁹ Kitepse inendet eng' ng'alek che chang' ago mawol kiy. ¹⁰ Ak kitononst tisiik che eechen ak siriik, kititirji inendet eng' kimnatet. ¹¹ Kiimining inendet Herod ak askarikchi ak kochoosinendetak kolakchi ngoriet ne kararan mising ak kowekta ole mi Pilato kogeny. ¹² Ak kiek chorondok pilato ak Herod eng' betunoto, amu kita kosastos icheget eng' tai. ¹³ Ak kiguur Pilato tisiik che eechen ak bounik koboto biko kobwa tugul ¹⁴ ak koleji icheget, "komutwa chichi ak komwa ole imostoti biko, ak ogeero katebee anendet eng' taing'wong' ak manyorji chichi lelut eng' ng'alechoto omwaitae inendet. ¹⁵ Ololo, mbo Herod agine , amu kawekwech inendet ak ogeero, ma yai kiy inendet ne nyoljini meet! ¹⁶ Noto anyun , abire inendet si atiakta. ¹⁷ Amu ki ng'atutiet kotiakchi agenge eng' betutab tumdo. ¹⁸ Ak kibolyo tugul, kole iste chichi ak itiakwech Barabas. ¹⁹ Barabas ko chi ne ki ka ketoorji korgoret agobo wasetab biko eng' nganaset ak borisiet. ²⁰ Ak king'ololji Pilato icheget kogeny komache kotiach Jeiso. ²¹ Ago kibolyo icheget kole, "igartat eng' kimurtoiyot, igartat inendet." ²² Ak kimwachi icheget nebo somok koleji, "kayai nee ne ya chichi? Manyorji ng'olyo inendet ne nyoljini kome. Noto anyun ngatar abire inendet atiach." ²³ Ak kites kobolyo mising', komache kole kigartat. Ak kiyai kutuswekwai koyan Pilato. ²⁴ Ak kitil anyun Pilato kiruoget koyaak ko u ye kimache icheget. ²⁵ Ak kitiakchi inendet ne kiga ketoorji korgoret agobo wasetab biko ak borisiet ne kigo soom icheget. Ago ki koito inendet Jeiso si koyachi ko u ole moktoi. ²⁶ Ak kingo ta komuti inendet kogich Simon kurenindet, ne kibunu koret age, ak kikilapchi kimurtoiyot si koib ak korube Jeiso. ²⁷ Ak kirub tuiyet ne o ne bo biko, koboto chepyosok che kiwaksot ak korirjinoti inendet. ²⁸ Ago kigushi kong' Jeiso icheget, ak koleji, "tibichu bo Jerusalem, matorirye agobo ane, ago orirjige ak legukwok. ²⁹ Amu ogeero, bkoni betusiek che tun len icheget, 'iberurotin sononik ak motinwek che iysot ak kinaik che ma kichuchun.' ³⁰ Ngo iyo kotoi icheget kong'alalji tulondok, 'olulchech' ak koleji tulondok che mengechen 'kotuch icheget.' ³¹ Amu ngot ko yai tuguchu eng' ketit ne nyalil, koteptoi ano anyun eng' ne yaamat." ³² Ak kimi kiptengekinik aeng'u che kigimuti koboto inendet si ba kobar. ³³ Ak kingoit oe kiguure Calvary, ko yoto ole kigigartate inendet ak kiptengeginichoto age eng' komostab tai ak age eng komostab katam. ³⁴ Ak kile Jeiso, Aboo, nyochi kaat icheget amu ma nai kito ne yae. Ak kipchechige ngoroikji eng' wirtoisietab barbarek. ³⁵ Ak kitononyo biko kogere, ak kirorchini inendet bounik, kole, "kisoru alak. Ngo sorge kira ngo Kristo nito, ne lewenot ne bo Jehovah." ³⁶ Ak kichurachur agiche askarik inendet kobwani ole mi inendet, kogochi maiyek che midililen, ³⁷ kolen, "ngot ii laitoriatab Yahudik isoruge." ³⁸ Ak kimi sirutik eng' barakutab metinnyi che mwae kolen, "NI KO LAITORIAT NE BO YAHUDIK." ³⁹ Ak kichurachur inendet age eng' kiptengeginichoto kiga kigartat kole, "tos me ii Kristo inye? Soruge ak isorwech ak ache." ⁴⁰ Ago kiwol age ak koger kong' kole, "meiywei Jehovah mbo inye ak imi kiruoget agenge ak inendet? ⁴¹ Ago bo iman nenyo amu kagigonech kou boisionikcho, ago mayai chichi kiy ne ma nyolunot." ⁴² Ak kileji Jeiso, inaana yo tun inyoni eng bounateng'ung. ⁴³ Ak kileji Jeiso inendet, amwaun iman ale, kitebche tuwai rani eng paradiso ⁴⁴ Ak olo bo sait lo, kobiit tuindo eng' emet komugul agoi sait sogol, ak ki ma ⁴⁵ ta kokweng'toi asista, ak kigererak kwenutab anget ne kiga kiito eng' ole tilil ne bo ekalut kobun aeng'. ⁴⁶ Ak king'alal Jeiso eng' kutit ne o, kole, "Aboo, kande tamirmirienyu euneguk', ak kingo ka komwa nito kogoito tamirmiriet. ⁴⁷ Ak kingogeer kiptaiyatab bogol tuguk che kayaagis kolos Jehovah, kole "ngagaa kibo iman chichi." ⁴⁸ Ak kingogeer tuguk che kiyaagis tuiyosiechoto tugul che kigaruruchge si korat setio, kowektagei kolugoti tegetik. ⁴⁹ Ak kitononsot eng' ole loo tugul che kiinget ge ak chepyosok che kirubu inendet kobunu Galili kole si kogeer tuguchoto. ⁵⁰ Ak ogeero, kimi chi aynun ne kigiguure Joseph, ne ki chitab kapkirwok chi ne kaminen ak ki chi ne kirube imanda. ⁵¹ Ak ki ma cham chichoto kiruogeng'wai ak boisionikwai. Ki bo Arimatea, koretab Yahudik, ne kigonye agine bounatetab Jehovah. ⁵² Kiwo chichoto ole mi pilato ak kosom bortab Jeiso. ⁵³ Kiwolune kocho ng'weny ak komaisenget ne nyigis ak ko mogon eng' kererit ne kikabalchi koita, ole kitomo ketupchi chi age. ⁵⁴ Ak betut ne kigichobege ak ki ka korik sabato. ⁵⁵ Ak kirubu chepyosok che kigabwa koboto inendet kobunu Galili ak kogeer kererit ak ole kigakimogonda bortanyi. ⁵⁶ Ak kiwektage koba si kocob nyamdutik ak mwanik ak komuny eng' betutab sabato komung'yo ko u ng'atutiet.