¹ Kirik anyun tumdo ne bo makatinik che ma kinde bitek ne kiguure pasaka. ² ak kicheng' tisiik che eechen ole imuchi kobarta inendet amu kiywei icheget biko. ³ Ak kichut cheswiliet Judas ne kigiguure Isacriot, ne ki age eng' taman ak aeng'. ⁴ Ak kiwo kong'alal ak tisiik che eechen ak kiptainik ole ng'wektochindoi Jeiso inendet. ⁵ Ak kiboiboitu anyun bichoto ak kichomyechi kogochi inendet rabisiek. ⁶ Kochaam anyun inendet ak kocheng' boroindo kong'wekchi inendet icheget eng' ole mami biko che chang'. ⁷ Ak kiit anyun betut ne bo makatinik che makindenoi bitek, betut ne kikanyol koeny aruetab pasaka. ⁸ Ak kiyokto Petero ak Johana kole oba ochabkech Pasaka si kobiit keam . ⁹ Ak kileji, "imache kebe kechob eng' ano?" ¹⁰ Ak kileji icheget, "ogeero , ngomande eng' kokwet ne o kotuyenok chito ne ibe teretab beeko, orub inendet agoi got orit ole wendi. ¹¹ Ak omwachi chitab kobo kot oleji katebenen kanetindet kole , 'mi ano gotab toek ,ole achoni aame pasaka koboto kayoktoikchu."' ¹² Koboruok anyun got ne o ne mi barak. Ochob anyun tetutik tugul eng' oloto." ¹³ Ak kiba anyun ak konyor ko u yokaka kemwachi ak kichob pasaka. ¹⁴ Ak kingoit sait kotebi ng'weny koboto che kiyoktoi. ¹⁵ Ak kileji icheget, " atinye maget ne o ko kamach aam pasaka ak akwe kotomo anyalil. ¹⁶ Amu amwawok ale, kong'ete ra ko maame kiy age tugul agoi kosulda eng' bounatetab Jehovah." ¹⁷ Ak kitaach kikombet, ak kingo kagogoito kongoi kole,"onam ni ak opchechige akwegee. ¹⁸ Amu amwawok ale kong'etee ra ko ma aee che bo logoekab sabibuk agoi koit bounatetab Jehovah." ¹⁹ Ak kinam makatiat ak kingo kagomwa kongoi kobutul ak kogochi icheget ak kole, "ni ko bortanyu ne kigoitoi agobo akwe , oyai ko u ni eng' kabwatet ne obwateno." ²⁰ Ko u noto kikombet agine, kingobata amitwogik che bo kosgoleny, kole "arorutiet ne leel kikombani eng' korotikchu che kitumdoi agobo akwe. ²¹ Ago ogeero, ni eutab inendet ne ng'wektaa koboto eng' mesani. ²² Amu wendi weritab chi iman ko u ole kiging'at, ago ayoo eng' chichoto ng'wektoi inendet!" ²³ Ak kitoi anyun kotebegei ichegei kole ng'o eng' icheget ne yae kii. ²⁴ King'eet anyun tiiyet eng' kwenung'wai kole ng'o ne keiti kele ne o eng' icheget. ²⁵ Ak kileji icheget, "laitorinik eng' bororriosiek ak icheget che tinye bounatet eng' icheget keguure toretik. ²⁶ Ago ma u noto eng' akwe ago ngokerkeitge ne o eng' akwe ne mining', ak inendet ne o koige ne ootisie. ²⁷ Ng'o ne o anyun, inendet ne tebche eng' amisiet nda inendet ne ootisie? tos ma inendet ne tebche eng' amisiet? Ago ami kwenung'wong ko u chito ne ootisie. ²⁸ Ago akwe ko u che ki kotebi koboto eng' kanyalilet. ²⁹ Ak kagonok bounatet ko u yo kigogona kwandanyu, ³⁰ si kobiit oamisie ak oeisie mesenyu eng' bounatenyu, ak tun otebe ng'echerok che bo laitornatet oruokchini ortinwek taman che bo Israel. ³¹ "Simion, Simion, geero kagosom chesawiliet kole, konamak si kosesak ko u nganok. ³² Ago kiasa agobo inye si maibut kayaneng'ung' ak yo kaiwalage, igimit che otupche. ³³ Ak kileji inendet, "Kiptaiyandani, kachobge kebe tuwai korgoret, mbo meet." ³⁴ Ak kiwalji Jeiso kole, "amwaun, Petero, kotomo kochei kipsoiywet rani, itoyo konyil somok ile mengeto." ³⁵ Ak kileji icheget, "kinga yoktok ko motinye mbo lolet nda ko ngoroik che iwale ak kweonik , ko tos kirarwok kiy eng' akwe?" Ak kile, "mararwech kiy." ³⁶ Ak kileji, "ago inendet ne tinye lolet koibot ra, ak u noto ngoroik che iwale agine , ak inendet ne matinye rotwetab chok koalda ngorienyi si ko ale. ³⁷ Amu amwawok ale kito ne kigisir ko konyol kosulda eng' ane kele kigitesta inendet koboto kiptengeginik, amu tinye kagesunet ng'alek che kigisir agobo ane." ³⁸ Ak kile icheget, Kiiptayandani, geero! Mi yu rotonikab chok aeng'u." Ak kileji icheget, "kagoyem." ³⁹ Komong' sang' anyun ak kwo agoi tulwetab Emitik, ak kirub kayoktoikchi inendet. ⁴⁰ Ak ye kingo kagoit oloto, koleji icheget, "osa si mochut tiemutik." ⁴¹ Ak kiistoege icheget yo ite koita ngewirta, ak kogutuny kosa, ⁴² kole, "Baba, ngicham istoeno kikombani. Ago ma ko u magenyu, ago ngoyaak ko u mageng'ung'. ⁴³ Ak kimong'ji inendet malikaiyat ne kibunu kipsengwet kogimit inendet. ⁴⁴ Ak yo kimi nyalilda inendet ne ng'wan koteshi kosa mising' ak kigergeitu kaotikchi ak korotik che sachini ng'weny. ⁴⁵ Ak kingoit eng' saenyi konyo ole mi kayoktoikchi, ak konyor koruiysot amu kaimutik ⁴⁶ ak kitebe icheget kole, "kaine si oruiye? ong'etye osa si mochut tiemutik." ⁴⁷ Ak ki ngo ta ko ng'alali , ogeero, koit tuiyet koboto inendet ne kigure Judas age eng' taman ak aeng, kindoune icheget ak korikchii inendet Jeiso si kong'utut, ⁴⁸ ak kileji Jeiso, "Judas ing'wektoi weritab chi eng' ng'ututet?" ⁴⁹ Ak kingoger che kimi koboto inendet kito ne mache, koyaak kole, "Kiptaiyandani ibe eng' rotwetab chok?" ⁵⁰ Ak kinget age eng' icheget che otwogindetab tisiindet ne o, ketil itinyi ne bo tai. ⁵¹ Ak kiwolji Jeiso koleji, "obagakte, kagoem!" Ak kitiny itinyi ak kosoob inendet. ⁵² Ak kileji Jeiso tisiik che eechen, ak kiptainikab kapkorosut, ak boisiek che kigabwa kogiring'ta inendet, kobka ak rotonikab chok ak shorishek, ko u yo bwanjini chorindet? ⁵³ Yo kwami kobotok betut age tugul eng' kapkorosut, ko ma ochonama eng' eunekwok, ago kasartang'wong' nito ak kimnatet ne bo tuindo. ⁵⁴ Kinam anyun inendet ak komut kwo gotab tisiindet ne o. Ak kirub Petero eng' ole loo. ⁵⁵ Kingo ka ko lal mat eng' kok kotebe ng'weny tugul, ak kitebe Petero kwenung'wai. ⁵⁶ Ak kingo geer chepto age inendet kotebche eng' ole mi lapkeiyetab mat kochilji kong' inendet kole, "kimi chichi agine koboto inendet." ⁵⁷ Ago kitai kole, "chepyosoni, mangen inendet." ⁵⁸ Ak ne matia kogeer chito age ak kole, "ii agenge aginye eng' icheget." Ak kile Petero, "chichi, ma i agenge eng' icheget." ⁵⁹ Ak kingo bek olo bo sait agenge, ko kimkim chito age eng' kimnatet kole, "iman kimi chichi agine koboto inendet, amu Galilindet inendet." ⁶⁰ Ak kile Petero, "chichi, mangen cho imwae. Ak ngota komwae kochei kipsoiywet kasarata. ⁶¹ Ak kiguskong' anyun, Kiptaiyat ak kotopen Petero, ak kinan Petero ng'olyotab Kiptaiyat ko u yo kiga komwachi kole kotoma kochei kipsoiywet rani, itayo konyil somok. ⁶² Ak kimanda sang' kwo koriir eng' ng'wonindo. ⁶³ Ak kichwes biko Jeiso che kiname inendet ak kobir. ⁶⁴ Ak kitich konyekchi ak koteebe kole, "ng'orse! ng'o ne ka masin? ⁶⁵ Ak kimwa ng'alek alak che chang' che yaachen agobo inendet kochwesachwesi. ⁶⁶ Ak kingoech koruruchge boisiekab bichoto, tisiik che eechen ak sirik. Ak kimut inendet kwo kapkirwogeng'wai kole, ⁶⁷ "ngo ko ii Kristo, imwawech."ago kileji icheget, "mbo nda mwawok ko moyani, ⁶⁸ ak ngot ko atebenak ko mowalu. ⁶⁹ Ago kong'eete ra kotebee weritab chi eutab tai ne bo kamuktaet ne bo Jehovah." ⁷⁰ Ak kile icheget tugul, "tos ii weritab Jehovah anyun? koleji omwae kole aii inendet." ⁷¹ Ak kile icheget, "ta ke mage nee baornatet age? Ago kagegas acheget kobun eng' kutinyi."