¹ Ak king'et metit ak kogeer mogorek kondenoi konunoikwai ole kirurukchini. ² Ak kigeer mosoget age ne ki kibanania kondenoii ndururusiek aeng' che u kebebertab robisiek. ³ Ak kile, "amwawok iman ale, kagokoon mosogoni banani che sire chi tugul. ⁴ Amu kagonde chi tugul eng' chang'indang'wai ole kindonoi kagochinoik, ago kagonde inendet eng' banandanyi tugul che tinye mbo che kosobe." ⁵ Ak kingo ta kong'alali alak agobo kapkorosut ole ki ki kararanda eng' koik che kororon ak kagochinoik kole, ⁶ "eng' tuguchu ogeere, ko tun bkani betusiek che mang'etune koita mbo agenge, eng' baragutab age , ne ma tun kiwirjini ng'weny." ⁷ Kitebee inendet kole, "Kanetindoni, egu tuguchuto anyun auyo? Ak u nee kabarunet ne tun mache korik kosulda tuguchuto?" ⁸ Ak kile, "oripge si ma kibeetok, amu tun bkani biko che chang' eng' kainenyu kolen ai inendet, ak ka gorik betusiek , amo rub icheget. ⁹ Ak nda tun ogas agobo lugosiek ak chemarget ko ma to cholye, amu nyalunot kosub kosulda tuguchoto korok, ago tomo korik kagesunet." ¹⁰ Koleji anyun icheket, tun setyini bororiet age bororiet age , ak setyini bounatet age bounatet age. ¹¹ Ak kobit botanet ne o ne bo ng'weny ak kemeito eng' orisiek alak ak mianwogik ak kobiit kamuisiet ak kaborunoik che eechen che bunu kipsengwet. ¹² Ago ngo tomo kobiit chuto konamok eng' eunekwai ak konyalilak ak komutak obe kapkorosusiek ak korgorosiek, komutak taitab laitorinik ak bounik agobo kainenyu. ¹³ Egu kasartab baornatet eng' akwe. ¹⁴ Oegu che otile eng' mugulelwekwok si mo rub oimchige agobo ole owoldi, ¹⁵ amu agonok ng'alekab ng'omnatet ne maimuchi bunikwok tugul kowol kiy nda kogirindak. ¹⁶ Ak kong'wektak sigikwok ak che otupche ak che bo oreng'wong' ak chorondok ak kobar alak eng' akwe. ¹⁷ Ak kosasaak biko tugul agobo kainennyu. ¹⁸ Ak mabete sumeiyot agenge ne bo metiwoikwok. ¹⁹ Ak eng' muitaeng'wong' onyoru sobonwekwok. ²⁰ Ak tun ngoger lugosiek komuuti Jerusalem, onai anyun ole kagorik ng' emisienyi. ²¹ Ngo mwechi anyun che mi Judea tulonok ak ingomanda che mi kwenutab kokwet ak mata koba orit icheget che mi emonoto. ²² Amu chuto ko betusiegab mugetut si kobiit kosulda tuguk tugul che kigisir. ²³ Aya we akwe che tinye che chuchuni eng' betusiechoto! Amu bitu bichiindo ne o eng' ng'weny ak neregek eng' bichuto. ²⁴ Ak kobutyo icheget eng' ng'atibindab rotwetab chok , kimut che kalulyo koba bororiosiek tugul, ak kotiechatiech bororiosiek, ak Jerusalem agoi kosulda betusiekab bororiosiek. ²⁵ Ak kobiit kabarunet eng' asista, ak eng' arawet, ak eng' kogelik, ak kobiit eng' ng'weny bichiindab bororiosiek, ak kwong'et amu kamutetab ainet ne o ak beko che mildoige. ²⁶ Ak kobek mugulelwekab biko amu cholatet ak eng' kanyisietab tuguk che bkanjini ng'weny amu kitumtumi kimnatosiekab kipsengwet. ²⁷ Ak eng betunoto kogeer anyun weritab chi konyoni eng boldet koboto kimnatet ak torornatet ne o. ²⁸ Ak ngotoi kosulda tuguchuto ogeer barak ak ong'et metiwoikwok, amu karik katiageng'wong'." ²⁹ Ak kimwachi icheget kalewenet kole, "ogeero mogoiywet ak ketik tugul. ³⁰ Ne ngorut ogeere ak onai akwe ole karik kesisiet. ³¹ U noto anyun, ak akwe ngo geer ko kayaagis tuguchuto onai ole karik bounatetab Jehovah. ³² Amwawok iman ale, masirtoi ibini agoi kosulda tuguk tugul. ³³ Kipsengwet ak ng'weny kosirtoi ak magoi sirto ng'alekchu. ³⁴ Ago oripge anyun akwe, si manyi mugulelwekwok eiset ak bogitet ak kaimutikab sobetab betusiechu si matun konyachak betunoto, ³⁵ ko u mestet. Amu u noto tun nyonjini biko tugul che menye ng'weny komugul. ³⁶ Ago oripge eng' betut age tugul ak osae si onyoru oterterisie, ochilile tuguchoto tugul bkani ak otononye eng' taitab weritab chi." ³⁷ Ak kinetisie eng kapkorosut ak betut age tugul ak kimondoi kembout age tugul kowendi kotepche eng' tulwet ne kigiguure tulwetab emitik. ³⁸ Ak kimusyini biko tugul inendet eng' kapkorosut si komuch kogas inendet.