¹ Ak kingo neti biko eng' betut age eng' Kapkorosut, ak koamdoi logoiywek che miach, kobka tisiik che eechen ak sirik konyor inendet ak kitesonu boisiek. ² Ak kimwochi inendet koleji, "mwawech iyae tuguchu tugul eng' kimnatetab ng'o? nda ko ng'o ne kigonin kimnatoni." ³ Ak kiwolji koleji, "atebenok agine ng'olyo ak owolwo. ⁴ Kabatisanetab Johana ko kibunu kipsengwet nda kibunu biko?" ⁵ Ak king'ololjige ichege, kole, "ngot kemwa kele kibunu kipsengwet, komwa kole koine si moyan inendet? ⁶ Nda kimwa kele kibunu biko, kowirech biko tugul eng' koik amu kiyoni icheget kole ki maotio Johana." ⁷ Ak kiwol kole , ki maimuch komwa ole kibunu. ⁸ Ak kileji Jeiso icheget, "mbo ane ko mamwowok kimnatet ne ayae tuguchu." ⁹ Ak kitoi komwachi biko kalewenoni kole, "kikol chi sabibuk eng' mbar ak ko bokokchi bich alak ak kwo emet age ne loo eng' betusiek che chang'. ¹⁰ Ak kingoit betut koyokchi otwogindet bichoto si kogochi icheget inendet logoekab mbaranoto, ago kibir bichoto inendet ak koon kwo buch. ¹¹ Ak kiyokto kogeny otwogindet age ak kigibir noto agine ak ketewer ak koon kwo buch. ¹² Ak kiyokto kogeny ne bo somok, kebir agine ak kowirji sang'. ¹³ Ak kile chitab kobo mbaret, 'ayae ne anyun? Ayakti werinyu ne achame nda mangab kogonyit.' ¹⁴ Ak kingogeer bichoto inendet kong'alaljige ichegei kole nito ne tun bunchi tuguk, ngebar inendet nda ma tun kendie tuguk. ¹⁵ Ak kitorta komanda eng' mbaretab sabibuk ak kobar. Ara itoi nee anyun chitab kobo mbaret bichoto? ¹⁶ Choni anyun inendet ak kobar bichoto tugul ak kogochi biko alak mbaretab sabibuk. Ak kingogas icheget, komwa kole ololo mati keeku noto!" ¹⁷ Ak kichiilji kong' icheget ak kole, "ne anyun ne kigisir: 'Koita ne kisas tegik ko noto ne ka koek toloitab lugta?' ¹⁸ Ak chi age tugul ne ibutchini koita koile konyaknyakani ak inendet ne ibutchini koita kong'ae koek bumbus." ¹⁹ Ak kicheng' sirik ak tisiik che eechen konam inendet banata , ak kiiywei icheget biko amu kinai kole mwae kalewenoni agobo icheget. ²⁰ Ak kiribot icheget inendet ak koyokto segeik che kiyaege koek che bo iman si ko name inendet ng'alekchi si kogoito inendet kwo tai ne bo bounatet ak kimnatetab bounindet. ²¹ Ak kitebee inendet kole, "Kanetindani, kinget kele imwae ak inetisiei eng' iman ago metitii chi ak ineti iman oretab Jehovah. ²² Tos chame ng'atutik kegochi aisurut kaisari nda olo?" ²³ Ago kinai kenisiengwai, ak kileji icheget, ²⁴ "obaruo tongiloyot, bo ng'o itondo ak sirutik che tinye?" Ak kile, "bo Kaisari." ²⁵ Ak kileji icheget, "ogochi kaisari tuguk che bo kaisari ak ogochi Jehovah tuguk che bo Jehovah." ²⁶ Ak kima imuch koname ngalechoto eng' taitab biko ak kikwong'io eng' wolunenyo ak kisisyo. ²⁷ Ak kibka alak eng' Sadukaik, konyor inendet, icheget che mwae kole mamito ng'etyet, ²⁸ ak kitebee inendet, kole, "Kanetindoni kisirwech Musa kole, ng'o ne werit ne otupche, ago tinye chepyoset, ne tomo kosich lekwa, kondii ne otupche chepyosonoto si kolalji mat kesendanyi. ²⁹ Kimi anyun werik tisabu che kitupcho ak kituni ne bo tai ak kime ko masich lekwa, ³⁰ ak kindii ne bo aeng'. ³¹ Ak ko u noto nebo somok ak kiek ko u noto tugul ko tisab kibek komasich lekwa. ³² Ak kingobata kome agine chepyosonata. ³³ Ara anyun tun koegu chepyosetab ng'o eng' icheget? Ago kitun icheget tugul ko tisab." ³⁴ Ak kiwolji Jeiso icheget kole, "werikab turgui kotunisie ak keildoi alak ketun. ³⁵ Ago che kiityini kele nyoljini konyor betusiechoto bkani ak ng'etyet eng' che kikobek, ko ma itun itunisie ama kigoitoi ketun. ³⁶ Amu ma komuchi kobek kogeny, amu kergeitu ak malaikaisiek ak icheget ko werikab Jehovah amu werikab ng'etiet. ³⁷ Ago ng'etsot che kigobek, kiibor Musa agine eng' ole kigisir agobo kertit, ole kiguure Kiptaiyat, Jehovah ne bo Abram ak Jehovah ne bo Isak ak Jehovah ne bo Jakobo. ³⁸ Inendet ko ma Jehovah ne bo che kigobek, ago bo che sapsot, amu sapsot tugul eng' inendet." ³⁹ . Ak kiwolji sirik alak koleji, "Kanetindoni, kaimwa komie." ⁴⁰ Amu ki matakogany icheget kotebee inendet tebut age tugul kogeny. ⁴¹ Ak kileji icheget, "teptoi ano si komwae icheget kole Kristo ko weritab Daudi? ⁴² Amu kimwa Daudi inendet eng' bukuitab tienwogikab kolosunet kole, kileji Kiptaiyat Kiptaiyandenyu, 'tebe eunyu ne bo tai, ⁴³ agoi tun ayai buniguk koek ng'echeretab kelyeguk. ⁴⁴ Kuure anyun Daudi inendet 'Kiptaiyat', ara egundoi ano anyun werinyi?" ⁴⁵ Ak kimwachi kayoktoikchi kogasei biko tugul koleji, ⁴⁶ "oripge eng' sirichu che chame kobendoti kolaachi ngoroik che koen ak kochame kakatisiet eng' siroisiekab oldoisiet ak ng'echerok che bo tai eng' igorwek. ⁴⁷ Ak kosare mosogik gorikwai ak kosae sautik che koen, kogenisie. Ta tun nyoru biko che u chuto kiruoget ne o mising."