¹ Kigiyok ng'atutiet kobun Kaisari Agusto eng betusiechoto kole, kesir kainaikab biko tugul. ² Kibo tai kaitosionito bo Asiria ko Gavana Kureno. ³ Kwo anyun chi tugul emenyi , kokwenyi asi kesir. ⁴ Ak kiwo agine Josep kolany kong'etee Galili,bkomandae kokwetab Nasaret agoi Judea, emetab Daudi , ne kiguure Betlehem amu mbo agine ko kibo oretab Daudi. ⁵ Kimut inendet chamanenyi Maria ne ki ka koborge komie kole managat, asi keiit. ⁶ Ak kigisich lekwet kota komi oloto. ⁷ Ak kisich werinyi ne bo tai, ak kolokchi ngoroikab leguk ak komogonji ng'erebutab tuga, amu kima komi gorik che keruisot eng' gotab toek. ⁸ Ak kimi kora mestowek kokwonoto che kiribe kiyagikwai kemoi. ⁹ Ak kitonon malaikaiyatab Kiptaiyat eng' ole legite icheget ak kikweny lilindab Kiptaiyat komoswekwai tugul , konyogoritu anyun mising'. ¹⁰ Kileji malaikaiyat icheget, "moiyweisie, ogeer anyun ami aibkok logoiywek che kororon che bo boiboiyet ne o che ityini biko tugul. ¹¹ Amu kagesikwok rani yetindet eng' emetab Daudi , noto ko Kristo kiptaiyat. ¹² Ago nito ko kabarunet eng' akwe , onyoru lekwet ko kagitaachi ngoroikab lekwandit , kagimogonji ng'erebto ne amisie tuga." ¹³ Ak kimi eng' kasarata koboto malaikayandanoto changindab lugosiek che bunu kipsengwet kolosu Jehovah koleen, ¹⁴ bo tororindo Jehovah eng' ole toror mising' ak kalyet eng' ng'weny eng' biko che chamotin eng' inendet. ¹⁵ Kingab kagobechigee malaikainik ko ba kipseng'wet kong'alaljigei mestewechoto , "ongebe agoi Betlehem si kobiit kegeer ng'olyondonito kakoyaak , ne kagomwaiwech Kiptaiyat." ¹⁶ Ak kiba kochakta ak kinyor Maria ak Josep ak lekwet ne kagimogonchi ng'erebtab tuga. ¹⁷ Ak ye kingokagogeer komwaita eng' emotinwek che loen kito ne kigagemwochi agobo lekwanoto. ¹⁸ Ak kikwong'io icheget tugul che kigas ng'alek che kimwachi mestewek. ¹⁹ Ago kigas Maria ng'alechoto ak kobkati eng' mugulelndonyi. ²⁰ Ak kiweektage anyun mestewek kolosu Jehovah , kotorori eng' tuguk tugul che kagogas che kagogeer, ko u yo kaga kemwachi. ²¹ Ak kingokakosirto betusiek sisitu kemuratan inendet, ak keguure kainenyi Jeiso, kainet ne kikakomunchi malaikaiyat kotomo kemanach. ²² Ak kingoitita betusiekab katililet kosubge ak ng'atutikab Musa, komut inendet kwo Jerusalem si kigochi kiptaiyat. ²³ Ko u ye kigisiir eng' ng'atutikab Kiptaiyat kole , "kigure werit age tugul ne kipyator ne tilil agobo Kiptaiyat." ²⁴ Ak kigoito korosek korubge ak ng'atutikab Kiptayat che kika keng'at cheptugenik aeng' nda warek aeng chebo cheptugenik. ²⁵ Ak ogeer anyun, kimi chi eng' Jerusalem ne kigiguree simion ,ago ki chi ne bo iman. Ak kosigunot ko kanye tegisto ak sarunet ne bunu Israel ak kinyiitat Tamirmiriet ne Tilil. ²⁶ Ak Kiga kong'anji inendet Tamirmiriet ne Tilil kole , magere meet kotomo kogeer Kristo nebo Kiptaiyat. ²⁷ . Ak kinyo eng' Tamirmiriet ne tilil kapkorosut ak kingomutyi sigik lekwet Jeiso si koyachi inendet kou biteetab ng'atutiet, ²⁸ konam anyun inendet Lekwet eng' eunekchi ak kolos Jehovah kole, ²⁹ "Ee Kiptaiyat , iyonjini ak ra kiboitiondeng'ung' kwo eng' kalyet kosubge ak ng'olyondeng'ung'. ³⁰ Amu kagogeer konyekchu soruneng'ung', ³¹ ne kichob eng' taitab biko tugul. ³² Lapkeiyet ne bo ng'ang'utiet ne kikoji bororiosiek, ak torornatetab biguk Israel." ³³ Ak kikwong'io Josep ak kametab lekwet eng' ng'alek tugul che kigimwa agobo inendet. ³⁴ kiberur simion icheget ak koleji Maria kamenyi, "keer anyun , kigigoon lekwani si kobutyo che chang' ak kong'eetyo che chang' eng' Israel si koek kaborunet ne tun kitae; ³⁵ (wei nito inendet ko tun torin rotwetab chok muguleldong'ung') si Kotor kabwotutikab mugulelwekab biko che chang." ³⁶ Ak kimito Ana agine. Cheptab Panue ne kimaotio, ne kibo oretab Asha. Ki ka ko osit mising', kimeng'is ak boyonyi kenyisiek tisap kong'ete ng'itun, ³⁷ ak ki mosok ne ki ya korikta kenyisiek tamonwogik sisit ak ang'wan , ak kimomondoi eng' kapkorosut , kolosu ak koboto karugutetabgei, ak samutik, bet ak kemoi. ³⁸ Ak kinyo eng' kasarata ak kogochi Jehovah kongoi ak king'alalji tugul che kiganye sarunet eng' Jerusalem agobo inendet. ³⁹ Ak kingo ka ko yai tuguchuto tugul korubge ak ng'atutikab Kiptaiyat, koweektage kobun Galili agoi tun koit emeng'wai Nasaret. ⁴⁰ Ak ki eet lekwet ak kotesak kimnatet, ak kinyi ng'omnatet, ak kimi kororindab Jehovah koboto inendet. ⁴¹ Kicham kobendi sigikchi Jerusalem kenyiit age tugul eng' igortab pasaka. ⁴² Ak king ko bo kenyisiek taman ak aeng', koba agoi Jerusalem ko u atebtab igorwek. ⁴³ Ak kingotar betusiek ak kowektagee, kong'et lekwet Jeiso eng' Jerusalem ak kima nai sigikchi. ⁴⁴ Kibkat icheget kole mi tugul , kiba banda nebo betut agenge ak kicheng' inendet eng' kwenutab bikab oret ak che kingetge. ⁴⁵ Ak kingo manyor inendet , kotil kowektage Jerusalem kocheng'aat. ⁴⁶ Ak yo kingobek betusiek somoku konyorji inendet kapkorosut, kotebche eng' kwenutab kanetik kogase ng'alekwai ak kotepee icheget. ⁴⁷ Ak kikwong'io icheget tugul che kigase ng'alekchi amu naenyi ak ole kiwalundoi. ⁴⁸ Ak kingogeer, ko kikwong'io ak koteebe kamenyi inendet koleji, "lekwani, amunee si yaiywech ko u nito? Keer anyun ane ak kwaning'ung' ko kagecheng'in ak keimige." ⁴⁹ . Ak kileji icheget, "amu nee socheng'a? monai ole kanyoljo ayai boisietab kwandanyu?' ⁵⁰ Ak kimanai icheget ng'olyondonoto kimwochi. ⁵¹ Kiba koregto ak icheget agoi koit Nasaret ak kigas it icheget. Ak kindeno kamet ng'alechoto tugul eng' muguleldanyi. ⁵² kitesak ng'omnatetab Jeiso ak etunet ak mieindo eng' Jehovah ak biko.