¹ Amu kigonde eunekwai che Chang kotet ng'alek agobo tukuchoto kikosulda eng' kwenunyo, ² ko u yo kigogonech , che ki i baorinik che kigeer kong'ete taunet ak che ki i kiboitinik che bo ng'olyot. ³ kiager agine ale , kararan atetun eng' siret ko kaanai agine ole kibitunda tuguk tugul kong'etee taunet ,wei inye ne itoogunot Teopilo, ⁴ asi kobiit inai eng' iman ng'alechoto kiginetin. ⁵ Kimi eng' betusikab Herod , laitoriatab Judea tisiindet age ne kigiguure Sakaria ne bo oretab Abija; Ak kitinye chepyoset ne kibo oretab Aron, ak kigiguree kainenyi Lisabet. ⁶ Ak kibo iman icheget tuwai eng' taitab Jehovah, kibendote ng'atutik tugul ak tetutik chebo kiptayat, ama tinye lelut. ⁷ Ak kimatinye lekwa amu Lisabet ne ki soon ak ki ka koosegitu tuwai. ⁸ Ak yo kita ko yae boisietab tisisiet Sakaria eng' taitab Jehovah ko u tetutikab ripsenyi. ⁹ Ko u atebtab boisietab tisisio; ko kigikwei inendet kwo kapkorosutab Kiptayat kobeel korosek. ¹⁰ Ak kimi sang' tuiyet komugul ne bo biko kosae eng' sait ne kibelee nyamdutik. ¹¹ Ak kimong'ji malaikaiyatab Kiptaiyat kotononi komastab tai ne bo kapkorosut ne kigibelee nyamdutik . ¹² Ak kingogeer Sakaria, koimge ak kochut inendet nyokoriet. ¹³ Ago kileji malaikaiyat inendet, "amaiyweisie Sakaria , amu kagegosun someng'ung' ak sigun chepyoseng'ung' Lisabet werit ak iguure kainenyi Johana." ¹⁴ Ak inyoru boiboiyet ak kagasetabge ak boiboitu biko che chang' eng' sigenyi. ¹⁵ Amu tun egu ne o eng' taitab Kiptaiyat, ama ee divaik nda ko maiyek, ago kinyiiti Tamirmiryet ne Tilil, kong'etee komi moetab kamet. ¹⁶ Ak wekchinige legukab Israel che chang' Kiptayat Jehovah neng'wai. ¹⁷ Ak kowendot eng' taitab Kiptaiyat eng' tamirmiriet ak kimnatetab Elija, si kowal mugulelwek che bo kwanisiek kotokchige leguk ak kowal ng'elelik si kobendat eng' ng'omnatetab che bo iman si kochopchi Kiptaiyat biko che chobotin agobo inendet. ¹⁸ Ak kileji Sakaria Malaikaiyat, "anae nee ng'olyondenito? amu kikaositu ak kigotar kenyisiek che chang' chepyosenyu." ¹⁹ Ak kiwolji malaikayat kole , "aii Gabriel ne atononi eng' taitab Jehovah. Kagiyokwo ang'alalun ak aibun logoiywechu kororon. ²⁰ Ak keer anyun, namoksen kut amemuchi ing'alaal agoi tun betut ne bitu ng'alechu amu maiyan nag'alekchu che tun isuldoi eng' betung'wai ne chamat. ²¹ Ak kiigany biko Sakaria kot kokwong'io amu kiigage eng' kapkorosut. ²² Ak ye kingomong' sang' koma komuji kong'alalji icheget ak kinai icheget kole imuchi ko kagogeer kaborunet nebo kwong'et eng' kapkorosut ak king'alajine bichoto eut ak kitebi ko namat kut. ²³ Ak yo kingakotar betusiekab otisienyi kowejigei gaa. ²⁴ Ak kingobata betusiechoto komanach chepyosenyi Lisabet ak kiunyge arawek mut ak komwa kole, ²⁵ "koyaiwa kou nito Kiptaiyat eng' betusiek che kinana asi koistoeno sosisiet ne ting'eno biko." ²⁶ Ak arawetab lo koyokto Jehovah malaikayat Gabriel kwo kokwet ne o ne bo Galili ne kiguure Nasaret, ²⁷ kwo oritab chepto bergeiyat ne kiga kechamji murenet age ne kiguure Josep ne bo oretab Daudi, ak kigiguure bergeiyandonoto Maria. ²⁸ Ak kicho ole mi cheboto ak kileji chamge inye ne ichamat mising mi Kiptaiyat akinye. ²⁹ Ago kiimge mising' inendet eng' ng'alalet noto ak kibkat kole, egu nee kagatisioni? ³⁰ Ak kileji malaikaiyat inendet , "ameiywei Maria , amu kainyoru chamet eng' Jehovah . ³¹ Ak geer anyun, imanachii ak tun isiche werit ne kiguure kainenyi 'Jeiso'. ³² Egu ne o ak tun keguure weritab inendet ne toroor mising', ak kogochini kiptaiyat jehovah ng'echeretab laitornatet ne bo kwaninyi Daudi. ³³ Ak tun laitoriani eng' gotab Jacobo koigeny , ama tinye ole begune bounatenyi." ³⁴ Ak kileji Maria malakaiyat, "egundoi ano ng'olyondani, ago manget muren?" ³⁵ ak kiwolji malaikayat koleji "chonjinin Tamirmiriet ne Tilil ak kotuchin kimnatetab inendet ne toror mising': nyoto anyun ne kiguree ne Tilil, weritab Jehovah inendet ne tun kisiche." ³⁶ Ak geer anyun , managat agine Lisabet tupcheng'ung' , ak tun siche werit eng osindonyi. Ni ko arawet ne bo lo eng' inendet ne logo Guyer sonet. ³⁷ Amu mami ngolyo ne bunu Jehovah ne ma kim. ³⁸ Ak kileji Maria, "geer anyun ai chepto kiboitiot nebo Kiptaiyat . Ak ngo yaak kosupke ak ng'olyondeng'ung'." Ak kiwo malaikayat kobagakta inendet. ³⁹ Kitonon anyun Maria eng' betusiechoto kwo kochakta emetab tulondok , agoi emetab Judea. ⁴⁰ Ak kichut gotab Sakaria ak kogaat Lisabet. ⁴¹ ak kingogas Lisabet kagatetab Maria ak kobiren chereret eng' moet ak kinyi Tamiririet ne Tilil Lisabet. ⁴² Ak king'alal eng' kutit ne o kole iberurot inye eng' chepyosok tugul ak iberurot inendet ne isiche. ⁴³ Kagikonyito ane ne tia kot kocho kametab Kiptayandenyu? ⁴⁴ Amu geero kingoit kagatisiet itikchu, kobiren chereret eng' moenyu eng' boiboiyet ne o. ⁴⁵ Ak baibai chepyosonoto iyani amu tun kiotitoi tuguk che kigemwachi inendet che bunu Kiptaiyat. ⁴⁶ Ak kile Maria , "ilosu sobondannyu Kiptaiyat," ⁴⁷ ak kigasge tamirmiriennyu eng' Jehovah Kiptaiyandenyu. ⁴⁸ Amu kigagogeer nyalulnatetab kiboitiondenyi ne chepto: Amu ogeer anyun kong'ete rani koguureno ebenwek tugul ne iberurot. ⁴⁹ Amu kagoyaiywa inendet ne tinye kamuktaet tuguk che echen, ak tilil kainenyi. ⁵⁰ Ak nyoru nyoetab gaat icheget che konyiti inendet kong'ete ibindo age agoi age. ⁵¹ Kigobor kimnatet eng eunyi; ak kiyesta che menyotin eng' kabkatutikab mugulelwekwai. ⁵² Kigowir ng'weny bounik eng' ng'echerokwai, ak kagosor che nyerotin. ⁵³ Kagobae che ame rubet tuguk che kororon, ak kagoon makorek koba buch. ⁵⁴ Kagotoret kiboitiondenyi Israel , si konam rirenetabge ⁵⁵ (ko u ye king'alalji kwanisiekcho) eng' Abraham ak iyotenyi agoi koigeny." ⁵⁶ Ak kimeng'iis ak Maria Lisabet arawek che legit somok ak koweektage kwo gaa. ⁵⁷ . Ago kiit anyun betut ne sigisie Lisabet kosich werit. ⁵⁸ . Ak kigas bikab orenyi ak kokwet kole kagotesyi Kiptaiyat kaberuret kwonyoto ak kibaibait koboto inendet. ⁵⁹ Ak kingoit betut ne bo sisiit kobka icheget kimuratan lekwet. Ago kimache koguure Sakaria kosubge ak kainetab kwandanyi. ⁶⁰ Ak kiwol kamet kole, "olo. Kiguure Johana." ⁶¹ . Ak kileji icheget inendet, "mami chi eng' oreng'wong' ne keguure kainanato." ⁶² King'alajige icheget eng' eunek ak kwanitab lekwet kotebee kainet ne mache kemunji. ⁶³ Kisom kito ne kisire ak kosir kole "Johana kainenyi," ak kikwong'io tugul . ⁶⁴ Koyatak anyun kutinyi eng' kasarata ak kotiagak ng'elyeptanyi ak kong'alal kolos Jehovah. ⁶⁵ Ak kichut icheget nyogoryet tugul che kimenye komoswechoto ak kigimwaita ng'alechuto tugul eng' emetab tulondok che bo Judea. ⁶⁶ kinde mugulelwekwai icheget tugul che kigas ng'alechu ,"tos eegu lekwa ne ne nito?" Amu kimi koboto inendet eutab kiptaiyat. ⁶⁷ Ak kinyi inendet kwandanyi Sakaria Tamirmiriet ne Tilil ak kimaoten kole, ⁶⁸ "iberurot Kiptaiyat Jehovah ne bo Israel amu kirutochech ak kosoor bikchi." ⁶⁹ Kagong'etwech kuinetab sarunet eng' gotab Daudi kiboitiondenyi, ⁷⁰ (ko u ye kimwa eng' kutuswekab maotickchi che tililen che kimi kong'ete eng keny,) ⁷¹ si kosorwech eng' bunikcho ak eng' eunekab tugul che saseech. ⁷² Asi korire kwanisiekcho, ak konaam kayamisenyi ne tilil, ⁷³ murtoetab ne kibokokchi kwandannyo Abram. ⁷⁴ Si komuch kogoneech ko kagosaruech eng' eunekab bunikyo, keboisiechi inendet ama eng nyokoret, ⁷⁵ eng imanda ak tililindo eng' taitanyi eng' betusiekyo tugul. ⁷⁶ Wei, lekwani, keguure maotiotab inendet ne toror ne bo iman , amu iwendi eng' taitab Kiptaiyat indoi si imuch ichob ortinwekab chi, ⁷⁷ asi kogochi bikchi naet ne bo sarunet eng' nyoetab kaat nebo tengekwogikwai. ⁷⁸ Amu eng' rirenosiekab Jehovah nenyo, si kochonjech lapkeiyet ne bunu barak si ko toretech , ⁷⁹ si koluuchi icheget che tebsot eng' tuindo ak che mi urwetab meet si kondochi kelyekcho kotoit oretab kalyet. ⁸⁰ Ak kiet lekwanato ak kinyor kimnatet eng' Tamirmiriet , kimeng'ot tumoo agoi betut ne kiborjige Israel.