¹ . Kimwachi anyun kalewenet ole nyolu kosa betusiek tugul ama meiyo mugulel, ² koleji, "kimi kirwogindetab ng'atutik eng' kokwet age , ne ki ma ko konyiti Jehovah ak kimeiti chi. ³ Ak kimi mosog eng' kokwonoto ak kinyor inendet ak koleji yoktowo mogetut eng' bunyondenyu. ⁴ Ak kitai eng' betusiek che chang', ago eng' let komwa eng' muguleldanyi orit , agot ngo maiywei Jehovah, amaitii chi, ⁵ ago amu inyolilo mosoget ni, kole ayoktoji mogetut, ngot ko konyil kochoni atkai kora,si mako choni konyil age koimo. ⁶ Ak kile kiptaiyat ogas kito ne kimwa kirwogindet ne kunuur. ⁷ Tos mayaji Jehovah imanda che lewenotin che rirjini inendet bet ak kemoi? Igaige iman inendet eng' icheget? ⁸ Amwowok ale yachini inendet icheget imanda kochokchini, ago tun ngo wechge weritab chi, kotos nyoru kayanet eng' ng'weny? ⁹ Ak kimwoji kalewenet eng' icheget che ki yonige kole, kibo imanda, ak kochoos biko tugul. ¹⁰ koleji kiba biko aeng' kotogosta kotokchige kapkorosut ko bo kosa, agenge ko ki Parisaindet, ko age ko ki togindetab aisurut. ¹¹ kitonon parisaindet kosa, komwa inegei ko u ni kole, Jehovah amwaun kongoi amu ma kikerge ak biko alak, che chorik, che mobo iman, che ibege, nda ko togindoni bo koti. ¹² Arue kut konyil aeng' eng' egosiek tisap, ak aiti kebebertab taman eng' tuguk chu che anyoru.' ¹³ Ak kitonon tagindetab aisurut eng' ole loo ago macham kochil kipsengwet, kobir tegenyi kolen , 'Jehovah, nyoiwo kaat lelutikchu.' ¹⁴ Amwawok, ak kirekto chichi kwo gonyi ak koek ne bo iman kosiir nin age, amu age tugul ne itororige kemining'iti, ak age tugul ne imining'itige kotun ketorori. ¹⁵ Kigimutyi inendet chererok si ko tiny, ak kingogeer kayoktoikchi koger kong'. ¹⁶ Ago kiguur Jeiso icheget kobwa ak koleji, "ochamji leguk che mengech kobwa ama to tae amu bo che u chu bounatetab Jehovah. ¹⁷ Amwawok iman ale age tugul ne mataache baunatetab Jehovah ko u lekwet ne mining' ko magoi kochut oloto ne matiny. ¹⁸ Ak kiteebe bounindet age kole, "kanetindoni makaat ayai ne ane si anyor sobondab koigeny." ¹⁹ Ak kileji Jeiso, "amu nee si iguureno ne kararan, mami age ne kararan kobate agenge noto ko Jehovah. ²⁰ Inget ng'atutik, amoipge, amerumisie, amechorse, amemwa lembech, tegis kon ak komet." ²¹ Ak kile kiarib tuguchuto tugul kong'ete amining'. ²² Ak kingogas Jeiso koleji, "ta ko betot kito agenge eng' inye, alde tugul che itinye ak iropchi che banansot si inyoru konorwet eng' kipsengwet, ak irupka." ²³ Ak kingokas inendet tuguchu kochol mising' amu ki mogorio kosob. ²⁴ Ak kingogeer Jeiso inendet, komwa kole korom ne tia eng' che tinye magornandit kochut bounatetab Jehovah! ²⁵ Amu nyumnyum eng' tambesiet kochut kondab katet kosiir kochut magoriot bounatetab Jehovah." ²⁶ kimwa anyun che kigase kole, ara ng'o anyun ne kesoru? ²⁷ Kiwolji Jeiso anyun kole, tuguk che koromen eng' biko komugakse eng' Jehovah. ²⁸ Kowol Petero kole, "geero, kagebagakte tugukcho tugul ak kerubin." ²⁹ Ak kileji Jeiso icheget, "amwawok iman ale mami chi ne kimeto got nda ko sigiik nda ko che tupcho, nda ko chepyoset nda ko leguk agobo sobondab koigeny, ³⁰ ne manyoru che chang' kosiir eng' betusiechu, ak sobondab koigeny eng' betusiek che bkani." ³¹ Kimut taman ak aeng' koba ole mi ak koleji, "ogeero , kibendi agoi Jerusalem, ak kosulda tuguk tugul che kisiir maotik agobo weritab chi. ³² Amu kindeni inendet eunegab bororiosiek si kechub, ak kitewer, ak kesingilji. ³³ Ago kibire kipchoritit ak kebar ak kong'et kogeny eng' betutab somok." ³⁴ Ak ki manai icheget tuguchoto mbo agenge, ak kiung'akis ngalechuta eng' icheget ak ki ma ibesio tuguk che kikamwa. ³⁵ Ak kingorikta Jeiso Jeriko, kotepche ng'weny eng' oret taban kipkoratia ak kosomse, ³⁶ ak kingogas kosirtoi tuiyet koteeb kole ne chu. ³⁷ Ak kimwochi icheget koleji , Jeiso ne bo Nasaret ne sirtoi. ³⁸ Ak kiwaach kole, "Jeiso weritab Daudi rirena." ³⁹ Ak kiger kong' inendet anyun che kiindoi, kole kosis, ago kiteshi kowaach mising' kole, "weritab Daudi rirena." ⁴⁰ Ak kitonon Jeiso ak kong'at kimutyi inendet kwo ole mi. Ak kingo rikta koteebe inendet, ⁴¹ kole, "imache ayaun nee?" Ak kile, "Kiptaiyandani, amache ageerto." ⁴² Ak kileji Jeiso, "keerte. Kagosobin kayaneng'ung'." ⁴³ Kigeerto anyun kasarata ak korub inendet kolosunoti Jehovah. Ak kingogeer tuiyet komugul, ko konyit Jehovah.