¹ Ak kileji Jeiso kayoktoichi, "imuchi ko memugakse, age anyun ko bwani kaimutik ne matiny, mutyo eng' inye ne bunun! ² Ki ta ko keigei eng' inendet keratyi koitab bai katinyi ak kewirji ainet ne o , kosir kotachtach che mengechen kobutyo. ³ Oripge akweget, ngot ko lelun ne otupche ikergong', ak ngot ko siik inyochi gaat. ⁴ Ak ngot ko lelun konyiil tisap eng' betut agenge ak kowechke konyil tisap ak kole kaasiku, inyochi kaat. ⁵ Ak kileji che kiyoktoi, "Kiptayandani, teswech kayanenyo." ⁶ Ak kile Kiptaiyat, "ngot ko itinye kayanet ne kerge ak kesuekab karandila, imuchi imwoji mogoiywoni ile keng'usun imang'une tikitik ak keminjin ainet ne o, ak kogasak iit. ⁷ Ago mi ng'o eng' akwe ne tinye otwogindet ne ibatisie nda kobae tuga, ne leji yo kait kobunu mbar, nyo tebi ng'weny ak iamisie? ⁸ Tos maleji inendet, keigei ichobko tuguk che ame ak igona, ngo kaamisie ak aeise si ngaitie, imuchi iamisie ak ieise aginye? ⁹ Tos wekji kongoi otwogindenyi amu kayai tuguk che kagerorji? ¹⁰ Ara u noto eng' akwe, ngaoyai tuguk tugul che karorwok, omwa ole kii otwogik che matilei kiy, kagiyai kityo tuguk che kikakiororwech keyai. ¹¹ Ak kingo mi oret kowendi Jerusalem, kobunu kwenutab Samaria ak Galili. ¹² Ak kingo it suktet age kotuyo ak murenik taman che kiame kerenganik, kinondos eng ole loo ¹³ ak kigurso eng' kimnatet neo, kole "Jeiso Kiptaiyat rirenech." ¹⁴ Ak kingogeer icheget koleji "oba bonyoru tisiik." Ak kingobendi kotililitu. ¹⁵ Ak kingogeer agenge eng' icheget kole kagosob, kowektage ak kotienot eng' kutiit ne o kolasunoti Jehovah. ¹⁶ Ak kibutyi kelyekab Jeiso komwachini kongoi. Ak ki Samarindet chichoto. ¹⁷ Ak kimwa Jeiso kole, "tos ma ka taman che kakisoob? Mi ano cho alak sogolu? ¹⁸ Tos mi mbo alak che kawechge kolos Jehovah nda kipsirtoyondoni kityo." ¹⁹ Ak kileji inendet, "ng'eet ak iwechige kagonyain kayaneng'ung'. ²⁰ Ak kingo teebe Parisaek koleji tos choni au bounatetab Jehovah, kiwolji icheget koleji, machoni kegeronu, ²¹ Ama kimwoe kele geero mitei oli, nda komi olin! ogeero mito bounatetab Jehovah kwenung'wong'. ²² Ak kimwoji kayoktoikchi koleji, "tatun bkani betusiek che omache ogeer betut agenge ne bo weritab chi, ago ma komuchi ogeer. ²³ Ak tun kelejinok 'ogeer mi yu, nda ogeer mi yun!' amait obe , nda orub icheget, ²⁴ amu kerge ak kaweket ne ilyelune kebeberta age eng' kipsengwet ak kokwenyi agoi komoswek alak che bo kipsengwet, tun u noto weritab chi agine eng' betunyi. ²⁵ Ago ite konyalil inendet eng' tuguk che chang' ak kesas eng' ibini. ²⁶ Ak ko u ye ki u eng' betusiekab Noa, ko u noto agine eng' betusiekab weritab chi. ²⁷ Kiamis, koeiso ak kiib chepyosok che chang', kigoito ketun, agoi betut ne kichut Noa maingenyi ak kinyo chemurwambei ak kibar icheget tugul. ²⁸ Kerge ak betusiek che kibo Lot, kiamisie , kieise, kialisie, kioldoi, kigolso ak kitekso. ²⁹ Ago betut ne kimanda Lot eng' Sodom, ak kirobon maat ak koik che lalsot kobun kipsengwet ak kobar icheget tugul. ³⁰ Ak ko u noto anyun tun ngoit betut ne kiboru weritab chi. ³¹ Eng' betunoto, chi age tugul ne mi got barak matiwalu, chisut tugukuk che mi got orit, ko u noto matiwechge mbo inyo ne imite mbar kot ko mewechge. ³² Onaan chepyosetab Lot. ³³ Age tugul ne tieme kosor sobondanyi kobeeti, ak age tugul ne ibeti sobondanyi kesoru ³⁴ Amwawok ale eng' kembounoto, kenyoru bik aeng' eng' kitogut agenge, kimuti agenge kemeto age. ³⁵ Tun ng'oisei chepyosok aeng'u beka kibagenge, kimuti age kemeeto age. ³⁶ Tun mi biko aeng'u mbar, kimuti age kemeto age. ³⁷ Ak kiteebe inendet koleji, "ano Kiptayandani?" Ak kileji iche, "ole mi musyot, korurukchinige oloto motong'wek agiche."