¹ Ak ye kingo siirtoi Jeiso, kogeer chito ne ki korat kongetee ko kagisich. ² Ak kiteebe alamalyenyi koleji, "Rabii, ng'o ne kiyai tengekto, chichi anan sikikyi, si kesich ko korat?" ³ Kowolji Jeiso koleji, "kimayai chichi tengekto anan sikikyi ago si kobit kotook boisionikab Jehovah eng inendet. ⁴ Kanyol ayai boisionikab inendet ne kiiyokwa ko ta kobeet. Amu nyoni kemout ne ma komuchi chi kobois. ⁵ Kote ko ta ami ng'weny ko a lapkeiyet ab ng'weny." ⁶ Ye kingo kagomwa ko u noto, kongutyi ngungunyek ak kotangwar ak koiile konyekyi ngungunyechoto. ⁷ Ak kolenji inendet, "ui iunde eng tamboiyot ab Siloam" (ye kiweech kele "kiyokto"). kiwa anyun koun ak kowechge kokagogerto. ⁸ Kimwa anyun bikab kokwet ak biko che kigageer eng tai ko korat ak kole "tos ma inendet ni ne kicham kotebyei ak kosomsei?" ⁹ Kole alak, "inendet". Kole alage, "achicha ago kergei ak inendet." Ako kile chichoto "a inendet." ¹⁰ Kolenji anyun ichek inendet, "kogiyatita ano koyekuk?" ¹¹ Kowol kole, "kotangwar ngungunyek chi ne kegure Jeiso ak koilie konyekyu ak kolenja 'ui Siloam ak iunde .' Aawe anyun aun ak ageerte." ¹² Kilenji, "mi ano inendet?" kowolji kolenji, "mongen." ¹³ Kiimut anyun ichek chichoto ki korat eng tai kwo ole mi Parisaik. ¹⁴ Ki sabato betut noto kitangwari Jeiso ngungunyek si koyaate konyekab chichoto. ¹⁵ Kotebe Parisaik kogeny kole katebto ano si igeerte, kowolji icheget kolenji, "kaiile konyekyu ngungunyek che katangwar, ak kaun, ak agerte." ¹⁶ Kole alak che bo Parisaik anyun, "mabunu Jehovah chichi amu mariibei Sabato." kole alage, "imuktoi ano chi kiptengekyo koyai kaborunoik che u chu?" Ak kibiit toiyet eng kwenungai. ¹⁷ Kigilenji kogeny chito ne korat , "imwae nee agobo inendet, amu kayaat konyekuk?" Ak kiwol kole, "maotio." ¹⁸ Maiyan anyun Yahudik agobo inendet kole kogorat ago kagogeerto agoi koguur sikiikab chichoto. ¹⁹ Ak kotebe kolenji, "tos weringwong ni ne omwae ole kigisich ko korat? Ko katebto ano si kogeertoi ng'uno?" ²⁰ Kowol sikikyi kole, "werinyo nito ak kinget kele kigisich ko korat. ²¹ Ago makinget ole katepto si kogeerto nguno ak makinget chito ne kayatei konyekyi, oteebe amu kagoeet inendet, ingomwa inegei." ²² Kimwa ngalechu sikikyi amu kiiywei Yahudik. Kigagosib kochamnyeji Yahudik kole ngong'aany chi age tugul kole inendet ko Kristo, kibeetoi eng sunagogit. ²³ Amu eng nito anyun, komwa sikikyi kole, "otebe amu kagoet." ²⁴ Kiguur ne bo aeng bichoto, chichoto ki korat ak kolenji, "igochi Jehovah kalasunet, amu kinget kele kiptengekyo chichi." ²⁵ Kowol anyun inendet kole, "ngo kiptengekyo chichoto ko mangen, kit agenge ne angen ko koa korat ago ageertoi nguno." ²⁶ Kolenji anyun ichek inendet, "kayaun nee? Kayatita ano konyekuk?" ²⁷ Kowolji inendet icheget kolenji, "kamwawok ama ogas, kalya si omache ogas kogeny? Omache oegu ak okwek alamalyenyi, tos?" ²⁸ Kongemji kut ichek inendet kolenji "i alamalyenyi, ago ki ache alamalyetab Musa. ²⁹ Kingen kele kingalalji Jehovah Musa ago magingen ole bo chichi." ³⁰ Kowolji chichoto icheget kolenji, "kwongut nito anyun amu mongen ole bunu ano, ago kagoyaat konyekyu." ³¹ Kingen kele magasei Jehovah kiptengekinik, ago ngolosu chi age tugul Jehovah, ak koyae magenyi kogasei inendet. ³² Kongete ngetoi ngweny ko ma kigas kele kiyat chi konyekab chi ne kigisich kogorat. ³³ Nda ma bunu Jehovah chichi ko magoi imuch koyai kiy. ³⁴ Kowolji inendet kolenji, "kigisikten ima tengekwogik ak iyaege inetech?" Ak kitoorta inendet kwo sang. ³⁵ Kigas Jeiso kole kagetorta inendet kwo sang, ak ye kingo nyor inendet kolenji, " tos iyani weritab Jehovah?" ³⁶ Ak kiwol kole "ngo noto Kiptaiyandani, si kobit ayan inendet?" ³⁷ Kolenji Jeiso "kaigeer inendet, ago inendet ni ngalalun." ³⁸ Ak kile, "Kiptaiyandani, ayani," ak kigutungji kolos inendet. ³⁹ Ak kile Jeiso, "kianyo ngonyuni amu kiruoget si kobiit kogeerto che magertoi ak kogorio che keertoi." ⁴⁰ Kigas tuguchuto alak che bo Parisaik che kimi koboto inendet ak kolenji, "kigoryotin agiche?" ⁴¹ Kolenji Jeiso, "nda kiogoryotin akwe, nda motinye tengek, ago amu nguno omwae ole kigeertoi, kotebyei anyun tengektongwong."