¹ Amwawok komie man ale, chorin ak ko rebin inendet ne mabunu kurget ak kochut biutab kechirek, ago sirei kerwa. ² Ago mestowotab kechirek inendet ne bunei kurget. ³ Yatyin inendet ribindetab kurget ago kasei kechirek kutinyi ak koguur kechirekyi eng kainaikwai ak kondoe ichek. ⁴ Ye kagomanda tugul koba sang, kondoe ak kosub kechirek inendet amu ingen kutinyi. ⁵ Ak maisubi toondet ago mwee, amu manaei kutitab toek. ⁶ Ak kimwachi Jeiso ichek kalewenoni ago maiguiyo ichek kole nee tuguchoto kiga mwachi. ⁷ Kolenji anyun Jeiso ichek kogeny, "amwawok komie iman ale, a kurgetab kechirek. ⁸ Chorik ago rebik tugul che kindounena ago ma kas kechirek ichek. ⁹ A kurget.Ngwo chi age tugul go ne buna ane, kesoru ak kwo ak komanda sang ak konyor ole kiyage. ¹⁰ Nyonei chorindet si kochor ak kobar ak kongem. Kianyo si kobit konyor sobondo ak kotebto sobondo inne. ¹¹ A mestowot ne mie, igoitoi mestowot ne mie sobondanyi agobo kechirekyi. ¹² Ago inendet ne otwogin ne ma mestowot ama chitab kobo kechirek kogerei konyonei kimaget, kobakoktoi kechirek ak komwei ak konyo kimagetiet ak konam ichek ak koyesta. ¹³ Komweei inendet amu otwogin ak mamage kiy kechirek. ¹⁴ A mestowot ne mie ak anget kechirekyu ak kongena chechuk. ¹⁵ Kou ye ingena Kwanda ak angen Kwanda ak agoitoi sobondanyu agobo kechirek. ¹⁶ Ak atinye kechirek alak che ma bo biuni, kanyol aget choto agichek si kogas kutinyu ak koek akwet agenge ak mestowot agenge. ¹⁷ Chama anyun Kwanda amu noto, amu agoitoi sobondanyu si kobit anam kogeny ¹⁸ Marebena chi ago agoitoi anege, atinye kimnatet agoito ak atinye kimnatet anam kogeny, kiataach ngatutioni eng Baba." ¹⁹ Ak kibiit toiyet kogeny eng Yahudik agobo ng'alechuto. ²⁰ Ak kile che chang eng ichek, "tinyei oindet ago amei iywek, kalya si agas inendet?" ²¹ Kole alage, "ma bo ngalechu chi ne tinyei oindet. Tos imuchi oindet koyat konyekab chito ne korat?" ²² Ak kimi igortab katabanet eng Jerusalem ak ki betusek ab katitindo, ²³ Ak kiwendot Jeiso eng hekalut eng keterut ne bo solomon. ²⁴ Kibwa anyun Yahudik koyiem inendet ak kolenji "igonech ketebi eng saget kot kotianit? Ngot i Kristo imwaiwech komie." ²⁵ Kowolji Jeiso kolenji, "kiamwowok amoyani boisiosiek che ayae eng kainetab Baba ko choto che baoryianjina. ²⁶ Ago moyani amu mo bo kechirekyuk ²⁷ Kasei kutinyu kechirekyu ak angen ichek ak kosuba. ²⁸ Ak agochini ichek sobondab koigeny ak magoi lusyo amarebena chi eng eunyu. ²⁹ O Baba ne kigona ichek kosiir tugul ama mi chi ne imuchi koreb ichek eng eutab Baba. ³⁰ Ane ak Kwanda ko ki agenge. ³¹ Konam anyun Yahudik koik kogeny kolen kolach inendet. ³² Kowolji Jeiso kolenji, "koabarwok boisiosiek che chang che miach che bunu Kwanda, olacha agobo boisio nee eng choto? ³³ Kowolji Yahudik inendet kolenji, "makilachin amu boisiet mie ago amu mulset, inye ne i chi iyaege iegu Jehovah." ³⁴ Kowolji Jeiso bichoto kolenji, "tos ma sirat eng ngatutiengwong kele kiamwa ale o cheptailelisiek? ³⁵ Ngo kigoguure inendet ichek cheptailelisiek, icheket che kinyonji ngolyotab Jehovah, (ako ma imukagsei kebut ngatutiet), ³⁶ Tos omwae agobo inendet ne kitaban Kwanda ak koyokto kwo ngweny olenjini 'imulsei amu kiale a weritab Jehovah'? ³⁷ Ngot ko mayai boisiosiekab Kwandanyu, ko mat oyana. ³⁸ Ago ngot ko kiayai, ko agot ngo moyana, oyan boisiosiek si kobit onai ak ayan ole mi Kwanda eng ane ak ane eng Kwanda." ³⁹ Kicheng anyun kogeny konam inendet ago kichilile eng eunekwai. ⁴⁰ Ak kiwa kogeny Jordan komosin ole kibatisanisie Johana eng tai ak kitebi eng oloto. ⁴¹ Ak kibwanji inendet che chang ak komwa kole "kima yai Johana kabarunet ago tuguk alak tugul che kimwa Johana agobo chichi ko bo iman." 42 Ak kiiyan inendet che chang eng oloto.