¹ Kimian chito age ne keguure Lasaro ne bo Betania Nganaset ne bo Maria ak chepto ne tupcho ak Marta. ² Nito ko Maria ne kiil Kiptayat ak kouuse kelyekyi sumeekyi ne kimiani tupchenyi Lasaro. ³ Kiiyokyi tipchoto tupcho inendet ngolyot kolenji, "Kiptayandani, keero, imiani inendet ne ichame." ⁴ Ago kingogas Jeiso nito, komwa kole, "ma bo meet mianito ago bo torornatetab Jehovah ak kilosune noto weritab Jehovah." ⁵ Ak anyun kichamei Jeiso Marta koboto Maria ne tupcho tuwa ak Lasaro. ⁶ Kingogas kole miani kota kotebi betusiek aeng eng ole kimi. ⁷ Kingobata nito, kolenji alamalienyi, "ongebe anyun Judea kogeny." ⁸ Kolenji alamalyet, "Rabbi, kochenge yahudik kolachin eng koik ak iwendi olindo kogeny?" ⁹ Kowolji Jeiso kolenji, "tos mami saisiek tamanu ak aeng eng betut? Ngo wendot chi eng bet ko makinachi amu keerei lapkeiyetab ngonyuni. ¹⁰ Ago ngo wendot chi kemoi kinachi amu mami lapkeiyet eng inendet." ¹¹ Komwa tuguchu ak ye ibata kolenji icheket, "inuchu chorwenyo Lasaro, ago awendi angeeti inendet eng ruondo." ¹² Kolenji anyun alamalyenyi inendet, Kiptaiyandani, ngot konuuchi ko kaga takosobei." ¹³ Ago kimwaei Jeiso agobo meenyi, nga kilen iche alen mwaei agobo ruondo ne kagonuuch. ¹⁴ Kimwachi anyun Jeiso ichek komie kolenji, "kagome Lasaro. ¹⁵ Ago abaibai agobo akwe amu kima ami olindo si kobit oyan. Ago ongebe ole mi inendet." ¹⁶ Kolenji anyun Tomas ne keguure Didumo alamalyet chun alak, "ongebe ak achek si kobit kebegu ak inendet." ¹⁷ Ye kingoit Jeiso anyun, konyor kole kiga kotebe kirerit betusiek angwan. ¹⁸ Betania ko kilegite Jerusalem, ki olo bo mailisiek aeng. ¹⁹ Ak kigabwa che chang che bo Yahudik kogaigai Marta ak Maria agobo ngetab kamet. ²⁰ Kingogas anyun Marta kole nyonei Jeiso, kwo kotorokta inendet ago kita kotebi Maria eng got. ²¹ Kolenji Marta anyun Jeiso, "Kiptaiyandani, nda kiimi yu ta kima komeei werit ne ketubche. ²² Ako anget mbo raa ale, kito age tugul ne isome Jehovah kogonin Jehovah." ²³ Kolenji Jeiso inendet, "ta kongeetei tupchengung." ²⁴ Kolenji Marta inendet, "anget ale ngeetei eng ngeetyet ne bo betutab let." ²⁵ kolenji Jeiso, "A ngeetyet ak sobondo; inendet ne iyana agot ngome, ko ta kosobei; ²⁶ Ak chi age tugul ne sobei agoyana, ko ma meei matiny. Tos iyani inye nito?" ²⁷ Kolenji "wei, Kiptaiyandani, ayani ale i Kristo weritab Jehovah ne nyonei ngweny." ²⁸ Ak ye kingo kagomwa nito cheboto, kwo koguur Maria chepto ne tupcho eng ungot kolenji, "mi yu konetindet ago kuurin." ²⁹ Ak ye kingogas nito, kongeet kochakta kwo ole mi inendet. ³⁰ Ago kitomo koit Jeiso nganaset ago ki kitagomi ole kigatuiyechi ak Marta. ³¹ Kiirub anyun Yaudik, cheboto che kimi tugul eng go kogoigoi, ye kingogeer kongeet Maria kochakta komanda sang, kolen wendi kererit korire eng oloto. ³² Kingoit anyun Maria ole mi Jeiso ak kogeer inendet, kobutyi kelyekyi ak kolenji, "Kiptaiyandani, nda kiimi yu nda kimakomee werit ne ketupche." ³³ Kingogeer Jeiso anyun inendet korire ak korirtos agiche Yahudik che kigabwa koboto inendet, kogas kongwan mising eng Tamirmiriet ak koarogen; ³⁴ Kole, "kionde ano?" Kolnji, " Kiptaiyandani nyo keer." Korir Jeiso. ³⁶ Kole anyun Yahudik, "ogeer anyun o, ole kiichamdoi inendet Lazaro." ³⁷ Ago kile alak eng ichek, kigatemene nee chichi ne kiyatei konyekab chito ne ki korat koger si mame agine chichi? ³⁸ Kogas anyun Jeiso kongwan kogeny eng orinyi, konyonei kererit. Ki kebenet ne kiga kigere koita kurget. ³⁹ Kole Jeiso, "oiste koita." Kolenji Maria chepto ne tupcho ak Lazaro, "Kiptaiyandani, kogobul amu kongetege ngome, ko betusiek angwan. ⁴⁰ Kolenji Jeiso inendet, "kama amwaun ale ngiyani, igeere torornatetab Jehovah?" ⁴¹ Koisto anyun koita ak kinget met Jeiso ak kole, "Baba, amwaun kongoi ale kaigasa. ⁴² Ak kaanai ale igasa eng ui tugul ago kaamwa ni amu tuiyoni tononi eng yuto si kobiit koyan kole kiiyokwo." ⁴³ Ak ye kingo kagomwa ko u noto, komwa eng ne o kole, "Lazaro, mongu!" ⁴⁴ Komong anyun inendet ne kiga kome ko rototin eunek ak kelyek eng ngoroik che bo kererit, ak kigakirate togenyi anget. kolenji anyun Jeiso bichoto, "otiach ak ounde kwo." ⁴⁵ Kiyan anyun inendet che chang che bo Yahudik che kigabwa ole mi Maria ak kogeer tuguk che kiyai Jeiso. ⁴⁶ Ago kiba alak ole mi Parisaik ak komwachi ichek tuguk che kagoyai Jeiso. ⁴⁷ Kiguur anyun kiruoget tisiik che eechen ak Pharisaik ak kole "kiyai nee? Amu yae chichi kaborunaik che chang. ⁴⁸ Ngot kebagakte inendet ko u ni koyani inendet biko tugul asi kobwa Romanik kosarenech emenyo ak bororyenyo." ⁴⁹ Ak age eng icheget ne kigiguure Kaiapa ne ki tisiindet ne o kenyinoto kolenji, "monget akwe kiy age tugul. ⁵⁰ Monget ole mieitu eng akwe ngomechi chito agenge biko si ma bet bororiet komugul." ⁵¹ Kima komwaei inegei nito. Ago kimaoten amu ki tisiindet neo inendet eng kenyinoto, kole kanyol komechi Jeiso bororiet; ⁵² Ma agobo bororiet nito inegei, ako si kobiit koyum lagokab Jehovah che yestootin si kobiit koek agenge. ⁵³ Kongetege betunoto anyun ak kwo tai, koruogot agobo ole bortoi inendet. ⁵⁴ Mata kowendot Jeiso anyun eng ole toogu eng Yahudik ago kiwo eng oloto agoi emet ne legite surkwen eng nganaset ne kiguure Epraim ak kitebi eng oloto koboto alamalyenyi. ⁵⁵ Kigarik Paska ne bo Yahudik ak kiba che chang eng emet kotogosta Jerusalem kotomo koit Paska koba koanyinyige. ⁵⁶ Ak kichenge anyun icheget Jeiso, ago ngalalchinige ichegei eng ichegei kotononsot eng hekalut ago len, "obwati nee akwe? Tos olen manyoni inendet igorta?" ⁵⁷ Kiga ngat tisiik che eechen ak Parisaik kole ngonai chi age tugul ole mi inendet, komwoi si kobiit konam icheget inendet.