¹ Ak kingota komi betusiek lo si koit Paska, konyo Jeiso Betania ole kimi Lasaro ne kigingeeti komong eng che kibek. ² Kiichopchi ichek inendet eng oloto amitwogik che bo lagat, koboisiechi Marta, ago kimi Lasaro koboto ichek che kiamisiei. ³ Kiinem anyun Maria mwaita ne bo kamanutiet neo ne kibo ratilit agenge ak koile kelyekab Jeiso ak kouuse sumeekyi kelyekyi ak kinyi got nyamdutiet ne bo mwaita. ⁴ Ago kile Judas Skariot ne ki agenge ne bo alamalyenyi ne kimachei kongwekta inendet. ⁵ "Ko amu nee si ma kialdae mwai denarisiek bogol somok si kigochi kibananok?" ⁶ Kimwa ni anyun ma amu kirire kibananok ago amu ki chorin ago kitinyei lolet ak koibei tuguk che mi orit. ⁷ Kole Jeiso, "Obagakte kogonorji betutab tubenyu. ⁸ Amu mi kibananok kobotok kotugul ago mami ane ak akwe kotugul." ⁹ Kinai anyun biko che chang che bo Yahudik kole mi oloto, ak kibwa ma agobo Jeiso inegei ago si kobiit kogeer Lasaro agine ne kiga kongeet inendet eng che kibek. ¹⁰ Ago kiruoch tisiik che eechen kole kobar Lasaro agine; ¹¹ Amu kitabange che chang che bo Yahudik koba koyan Jeiso amu inendet. ¹² Ak eng betut ne kiisubi noto, kogas tuiyet ne o ne bo biko che kigabwa igorta kole nyonei Jeiso Jerusalem, ¹³ Konam temenik che bo sosik ak koba kotorokta inendet ak komwa eng kutit ne o kole Hosana! iberurot inendet ne nyonei eng kainetab kiptaiyat noto Laitoriatab Israel." ¹⁴ Ak ye kingo kagonyor Jeiso moitab Sigiriet; kolany ko u ye kigisir kele, ¹⁵ "A meiywei inyee cheptab Sion; keer o, nyonei Laitoriadengung kobunu moitab Sigiriet." ¹⁶ Kima iguiyo alamalyenyi eng tai tuguchuto ago kingo kagitoror Jeiso, kobwat anyun ichek kole kigisir tuguchuto agobo inendet ak kiga keyachi inendet tuguchuto. ¹⁷ Kibaorian anyun tuiyet ne kimi koboto inendet ye kiguure Lasaro eng kererit ye kingeeti inendet eng che kibek. ¹⁸ Kiba anyun tuiyet kotorokta inendet amu noto kigagogas kole kiyai kaborunouni. ¹⁹ Kimwachige anyun Parisaik ichege kole, "ogeero, ma oterter amu; ogeero, kagosub inendet biko tugul che bo ngweny." ²⁰ Ak kimi Yunanik alage eng che kiba kotogosta koba kosa eng igorta. ²¹ Kibwa bichoto anyun ole mi Pilipu ne bo Betsaida ne bo Galili ak kotebe inendet kole, "Kiptaiyandani, kimache kegeer Jeiso." ²² Kinyo Pilipu komwachi Andrea ak kobwa tuwai Pilipu ak Andrea komwachi Jeiso. ²³ Ak kiwolji Jeiso kolenji, "kait sait ne kitorore weritab chi. ²⁴ Amwowok komie iman ale, ngo ma me baywat ne ibutyini ngungunyek, kotebyei inegei; ago ngome, koiyiei che chang. ²⁵ Inendet ne chamei sobondonyi kobeeti ak inendet ne wechei sobondanyi eng ngonyuni koribei kot koit sobondab koigeny. ²⁶ Ngo boisiewa chi age tugul, ko nyolu kosuboto ak si ole ami komi oloto agine kiboitiondenyu. Ngoboisiewa chi, koteegisi inendet Kwanda. ²⁷ Nyalili nguno sobondanyu ago amwae nee anyun? Baba, sorua eng saini'? Ago kianyonji saini amu ngolyondonito. ²⁸ Baba itoror kainengung, kimong anyun tuget eng Kipsengwet kole, kiatoror ak ta atorori kogeny." ²⁹ Kimwa anyun tuiyet ne kitononi eng oloto kogasei kole katul, kole alak "kangalalji malaikayat." ³⁰ Kowolji Jeiso kolenji, "kama nyo kutini agobo ane, ago agobo akwe. ³¹ Kabiit nguno kiruogetab ngonyuni: Ak kagitoorta anyun nguno ne o ne bo ngweny komanda. ³² Ak ye kiuita eng ngweny, amutyige biko tugul." ³³ Ago kimwa ni kobortoi meet ole meitoi. ³⁴ Ak kiwolji anyun tuiyet inendet kolenji, "kigegas eng ngatutik kele tebyei Kristo koigeny. Teptoi ano anyun si imwa ile kanyol keuto Weritab chi? Ngo weroto bo chi?" ³⁵ Kolenji Jeiso anyun, "ta komi lapkeiyet eng kwenungwong eng betusiek che matia. Obendate eng lakeiyet ye ta otinye lapkeiyet si manamak mesundeito. Ak inendet ne wendoti eng mesundeito ko manaei ole wendi. ³⁶ Ye ta otinye lapkeiyet, oyan lapkeiyet si kobiit oegu werikab labkeiyet." Kimwa Jeiso tuguchu ak kwo kounyege icheket. ³⁷ Ago nga kiga koyai kaborunoik che chang che te cho eng taingwai, koma iyan ichek inendet. ³⁸ Si kobiit kosulda ngolyotab maotiot Isaia ne kimwa kole, "Kiptayandani, kiiyan ngo ngalekyo? Ak kigengonji ngo eutab Kiptaiyat?" ³⁹ Ma imuch anyun koyan amu ngolyondonito amu kimwa Isaia kogeny kole, ⁴⁰ "Kigotuch inendet konyekwai ak kogochi mugulelwekwai kouegitu si me keere konyekwai anan konai eng mugulelwekwai ak koweek ak asoob icheget." ⁴¹ Kimwa tuguchu Isaia amu kigeer torornatenyi ak kingalal agobo inendet. ⁴² Ago kiiyan inendet che chang agot eng bounik ago ma ngany inendet si ma oon icheget Parisaik eng sunagogit. ⁴³ Amu kichamei kalosunetab bik kosir kalosunetab Jehovah. ⁴⁴ Ago kimwa Jeiso eng kutit ne o kole, "inendet ne iyana koma iyana ane ago kaiyan inendet ne kiyokwa, ⁴⁵ Ak inendet ne keero, kogeere inendet kiiyokwo. ⁴⁶ Kianyo aegu lapkeiyet eng ngweny, si ma kotebyei eng mesuindeito chi age tugul ne iyana. ⁴⁷ Ak ngo kas chi age tugul ngalekyu, ama rib komaruokyini inendet amu kima anyo aruokyi ngweny ago kianyo asoru ngweny. ⁴⁸ Inendet ne esio ama taachei ngalekyu, kotinyei ne iruokyini. Ngolyot ne kiamwa ko noto ne iruokyini inendet eng betutab let. ⁴⁹ Amu kima amwae anege, kigona Kwanda ne kiiyokwa ngatutiet ne kanyol aamda. ⁵⁰ Ak anget ale sobondab koigeny ngatutienyi, tuguk che amwae anyun, ko ko u ye kimwawa Kwanda amwae kou noto.