¹ Ak ye kingotomo koit igortab Paska, Konai Jeiso kole kagoit sainyi ne wendi eng ngweny kwo ole mi kwanda. Ko kagocham chechik che mi ngweny, kocham anyun agoi betutab let. ² Ak eng saitab amitwogikab lagat , kogagonde oindet ngwektaet muguleltab Judas Iskariot ne bo kap Simon. ³ Koganai Jeiso kole kagonde tuguk tugul eunekyi ak kole kibunu Jehovah ak kowendi ole mi Jehovah. ⁴ Kongeet eng amitwogik ak konde taban ngoroikyi ak konam anget ne kiusegei kogermenegei. ⁵ Ak korongji beek sanit ak kotoi koun kelyekab alamalyet ak kouuse anganato kiga kermenege. ⁶ Konyo ole mi Simon Petero, ago kilenji Petero, "Kiptaiyandani, tos iuni inye kelyekyu?" ⁷ Kowolji Jeiso inendet kolenji, "kito ne ayae ko menget nguno, ago tatun inae." ⁸ Kolenji Petero, "magoi iun kelyekyu." Kowolji Jeiso kolenji, "ngo maunin, komagitingege kiy." ⁹ Koleji Simon Petero inendet, "Kiptayandani, ma kelyekyu kityo, ago eunekyu ak metinyu." ¹⁰ Koleji Jeiso inendet, "ne kagounge ko ma komache kounge kogeny kobate kelyekyi amu iunot inne; ounotin akwe ago ma akwe tugul." ¹¹ (Amu kiinget ne kimachei kongwekta inendet ak kimwa amu noto kole "maounotin tugul.") ¹² Ak ye kingo kagoun anyun kelyekwai ak konem ngoroikyi ak kotebi ngweny kogeny, koleji icheget, "tos ongen ne kaiyaiwok? ¹³ Ogureno 'konetindet' ak 'Kiptaiyat', ak omwae anyun komie, amu a inendet. ¹⁴ Ngo ane anyun ne a Kiptaiyat ak Konetindet, ne kaun kelyekwok, ko kanyoljok ak akwe ounjige kelyek. ¹⁵ Amu kaboruok si oyai ak akwe kou ne kayaiwok. ¹⁶ Amwowok iman, iman, ale, ma o otwogindet kosir Kiptaiyandenyi; Ama o inendet ne kigiyok kosiir inendet ne kiiyoku. ¹⁷ Ngonai tuguchuto ko oboiboien ngoyai. ¹⁸ Ma mwae agobo akwe tugul, anget che kialewen ago si kobiit kosulda sirutiet ne kile inendet: 'Ne amei magatiandenyu ko kagonget kwariandenyi koyaiwo ne ya.' ¹⁹ Kasib amwowok kongete nguno kotomo kosulda si ngosulda oyan ole a inendet. ²⁰ Amwowok, iman, iman, akwe ale, inendet ne taachei age tugul ne ayogu, ko kataacha, ak inendet ne taacha ko kataach inendet ne kiiyokwo." ²¹ Kingo kagomwa Jeiso kou noto, konyor nyalilda eng tamirmiryenyi ak kobaorian kole, "amwowok iman, iman, ale, ngwengta age eng akwe." ²² Kogeerotgei anyun alamalyet ama nai kole ngo, mwae agobo ngo. ²³ Ak kimi meset agenge ne bo alamalyet ne kitiegei tegetab Jeiso ne ki chamat eng Jeiso. ²⁴ Kongwech Simon Petero inendet ak kolechi, "tebe ilechi, tos mwae agobo ngo?" ²⁵ Kolenji anyun noto kitiegei tegetab Jeiso, "Kiptaiyandani, ngo noto?" ²⁶ Kowolji Jeiso anyun kole, "inendet ne agochini kererutiet ye kaaburburte, ak ye kingo kagoburburto kererutiet, kogochi Judas ne bo kap Simon Skariot. ²⁷ Ak ye kingo gagotaach kererutiet kochut Setani inendet, kolenji Jeiso anyun, "yai chokji ne imache iyai." ²⁸ Kimanai chi eng che kimi amisiet kole kamwachi inendet agobo nee. ²⁹ Amu kilen alak eng icheget, kaleji Jeiso ial tuguk che kimachei eng igorta amu kitingoti Judas lolet, anan ko kaleji igochi kiy kibananok. ³⁰ Kingo kagotaach anyun inendet kererutiet, komanda ngunoto. Ki kemoi. ³¹ Ye kingo kagomanda sang, komwa Jeiso kole, "kagitoror nguno weritab chi, ak kagitoror Jehova eng inendet. ³² Ak tun itorori Jehovah inendet eng orinyi ak kotorori inendet eng sainato. ³³ Lagochu mengechen, ta atebye kobotok ne matia. Tun ochengo ak ko u ye kiamwachi Yahudik aleji, 'ole awendi, komomuchi obga.' amgowok nguno ak akwe kou noto. ³⁴ Agonok ngatutiet ne leel, ale ochamye ak akwe. ³⁵ Eng nito anyun, konae biko kole, oi alamalyenyu ngochamsoti." ³⁶ Kileji anyun Simon Petero, "Kiptayandani, iwendi ano?" Kowolji Jeiso koleji, "ole awendi, komemuchi irupga nguno, ago tatun irupgo." ³⁷ Koleji Petero, "Kiptayandani, kalya si mamuchi arubun mbo raa? Agoitoi sobondanyu agobo inye." ³⁸ Kowolji Jeiso koleji, "igoitoi sobondangung agobo ane? Amwaun iman, iman, ale, kotom kochei kipsoiywet, ieisioa konyil somok."