¹ Amogochi mugulelwekwok kimgei. Oyani Jehovah; oyana agane. ² Mi gorik che chang gotab Baba, nda kima kou noto, ta kiamwawok, awendi achobwok koret. ³ Ak ye awe achobwok koret, anyoni kogeny amutok, si ole ami omite ak akwe. ⁴ Ak ole awendi onget oret." ⁵ Koleji Tomas, "Kiptayandani, maginget ole iwendi, kinaitoi ano anyun oret?" ⁶ Koleji Jeiso, "A oret ak iman ak sobondo; Manyonjini chi Kwanda ama eng ane. ⁷ Nda kionaa, nda kionai Baba agine. Ak kaonai inendet anyun kongete nguno ak kaogeer inendet." ⁸ Koleji Pilipu, "Kiptaiyandani, iboruech Kwanda, si koemech." ⁹ Kolenji Jeiso, "kigetebi tugul ak akwe betusiek che chang ako tomo inaa wee Pilipu? Inendet ne kigogeero, kogigogeer Kwanda. Amunee anyun asimwa ile, 'iboruch Kwanda'? ¹⁰ Tos meyani ile ami eng Kwanda ak Kanda eng ane? Ngalek che amwowok ko mamwae anege, ago Kwanda ne menya ne yaei boisionikyi. ¹¹ Iyana amu ami eng Kwanda ak Kwanda eng ane, anan oyana agobo boisionik icheget. ¹² Amwowok, iman, iman, ale, inendet ne iyana, koyaei agine boisionik che ayae ak koyae boisionik che eechen che sirei chuto amu awendi ole mi Kwanda. ¹³ Ak kito age tugul ne osome eng kainenyu, ayae si kegonyit Kwanda eng Werit. ¹⁴ Ngot osom kiy age tugul eng kainenyu, ayae kioto. ¹⁵ Ngot ochama, oribe ngatutikyu, ¹⁶ Ak osome Kwanda , ak kogonok kagaigaindet age si kotebi kobotok koigeny, ¹⁷ Noto Tamirmiriet ne bo imanda ne maimuchi ngweny kotaach amu mageerei inendet ago onget akwe inendet amu tebyei kobotok ak tun tebyei eng oritingwon. ¹⁸ Mabagaktook kou kibananok; ago anyonjinok kogeny. ¹⁹ Ta komi ngatigin si ma kogeero ngweny, ago ogeero akwe, amu asobe, osabsoti ak akwe. ²⁰ Eng betunoto, onai ole ami eng Baba, ak akwe eng ane, ak ane eng akwe. ²¹ Inendet ne tinyei ngatutikyu ak koribei, ko noto ne chamo, ak inendet ne chamo, ko chamat eng Baba, ak achame inendet ak angangjinige inendet." ²² Koleji Judas (ma Skariot) "Kiptayandani, kalya si ingangwechge ama ingangjige nweny?" ²³ Kowolji Jeiso kolenji, ngo chama chi, korib ngolyondenyu. Ak kocham Baba inendet, kebwanjini ak kemeny koboto inendet. ²⁴ Inendet ne machama ko maribei ngalekyu ak manenyu ngolyot ne ogase ago bo Kwanda ne kiiyokwa. ²⁵ Kaamwowok tuguchu, kota ami kobotok. ²⁶ Ago inetok tuguk tugul kagaigaindet, Tamirmiriet ne Tilil ne iyogu Kwanda eng kainenyu ak kobwatwok tugul che kamwawok. ²⁷ Abagakwok kalyet; agonok kalyenyu. Magonok kou ye konu ngweny. Amokany koimgei mugulelwekwok anan koiyweis. ²⁸ Kaogas ko u ye kaamwowok ale "awendi ak anyoni ole omi'. Ngot ochama, ko oboiboitu amu awendi ole mi Kwnda amu o Kwanda eng ane. ²⁹ Ak kamwowok nguno kotom koyaak si ye kagoyaak oyan. ³⁰ Makotangalalwok che chang mising, amu nyonei ne bounindetab ngweny, ama tinye kiy eng ane, ³¹ ago si konai nweny kole achame Kwanda, ak ko u ye kigona Kwanda ngatutiet, ayae ko u noto. Ongetye kebe."