¹ "A ketit ne bo iman, ne bo sabibuk ak semberindet Baba. ² Tilei temenet age tugul ne mi eng ane ne maiyi logoek ak kotilili temenet age tugul ne yiei logoek si koi logoek alak. ³ O tililen nguno amu ngalek che kaamwowok. ⁴ Omenya, ak amenyok, ko u ye maimuchi temet koi logoek inegei ngot go mamenyei ketit, ko momuchi ak akwe ngot ko momenyo. ⁵ A ketitab sabibuk, ko o temenik. inendet ne menya ak amenye inendet, ko noto ne yiei logoek che chang amu momuchi oyai kiy akwege ngo mami ane kobotok. ⁶ Ngo mamenya chi, kewirtoi inendet ko u temet si koyam ak koyum biko ak kowirji ma ak kololyo. ⁷ Ngot omenyo, ak komenyok ngalekyu, osom anyun kiy age tugul ne omache si keyaiwok. ⁸ Kigonyiti Baba eng nito ye oiyie logoek che chang si oegu alamalyenyu. ⁹ Kou ye kichama Kwanda, ko u noto kiachamak agine. Otebi eng chamnyenyu. ¹⁰ Ngot oribe ngatutikyu, otebye anyun eng chamnyenyu ko u ye kiarib ngatutik che bo Baba ak atebye eng chamnyenyi. ¹¹ Kaamwowok tuguchu si kotebi eng akwe boiboiyenyu si kobiit kosulda boiboiyengwong. ¹² Ngatutienyu ni ale, ochamnye kou ye kiachamak. ¹³ Matinye chi chamnyet ne siirei ni, ale kogoito chi sobondanyi agobo choronokyi ¹⁴ Oi choronokyu ngot oyai tuguk che angatok. ¹⁵ Ma aguurenok otwogik amu manaei otwogindet kit ne yaei Kiptayandenyi, ago agurenok choronok, amu kangangwok tugul che kiagase Baba. ¹⁶ Kima olewena, ago kialewenok ak kiandeak ale obe ak oii logoek si kobiit kotebi logoekwok si kobiit kogonok Kwanda kit age tugul ne osome eng kainenyu. ¹⁷ Angatwok tuguchu ale ochamnye akwe engakwe. ¹⁸ Ngo wechok ngweny, onai ole kigowecha kotomo kowechok. ¹⁹ Nda o bo ngweny, nda ka chamei ngweny chechi, ago amu mobo ngweny, ago kialewenok eng ngweny, kowechok ngweny anyun amu noto. ²⁰ Onan ngolyot ne kiamwowok, 'masiirei otwogindet kiptaiyandenyi.' Ngot ko kigiuso ane, kousok ak akwe; ngot ko kinam ngolyondenyu, konamei nengwong agine. ²¹ Ago yaiwok tuguchu tugul agobo kainenyu amu manai inendet ne kiiyokwo. ²² Nda kima anyo angalalji acheket, nda matinye tengek, ago nguno komatinye kito ne itiagege agobo tengektongwai. ²³ Inendet ne wecha, ko kawech Baba agine. ²⁴ Nda kima ayai eng kwenungwai boisionik che kima yai chito age, nda kima kotinye tengek, ago nguno ko kagonerech ak kowechech ane ak Baba ²⁵ Ago si kosulda ngolyot ne kigisir eng ngatutikwai kele, 'kigowecha buch.' ²⁶ Ago ye kagoit kagaigaindet ne tun ayokwok kobunu Kwanda, Tamirmiriet ne bo imanda ne bunu Kwanda konyo kobaoryanja. ²⁷ Ak obaoriani ak akwe amu kiomi koboto kongete taunet.