¹ "Kaamwowok tuguchu si ma kinachak. ² Onok eng sunagogisiek. Ee nyonei sait ne ibwati chi tugul ne barok kole yachini Jehovah boisiet. ³ Ak yaei tuguchu amu ma nai Kanda anan ane. ⁴ Ago kamwowok tuguchu si ngo nyo saingwai, omuchi onan ole kiamwowok agobo chuto ago kima amwowok tuguchu eng taunet amu kiami kobotok. ⁵ Ago kawe nguno ole mi inendet ne kiiyokwa ama mi chi age eng akwe ni tebeena kole iwendi ano? ⁶ Amu kaamwowok tuguchu ko kanyi mugullelwekwok arogenet. ⁷ Ago amwowok ne bo iman, mie eng akwe ngawe amu ngomawe, ko manyonjinok kagaigaindet, ago ngot awe, ayokwok inendet. ⁸ Ak ye kagonyo inendet, kogikyi ngweny agobo tengekto ak imanda ak kiruoget. ⁹ Agobo tengekto ko amu ma iyana; ¹⁰ Agobo imanda ko amu awendi ole mi Kwanda, ama ogeero kogeny; ¹¹ Agobo kiruoget ko amu kigiruokyi ne o nebo ngwenyuni. ¹² Ta atinye tuguk che chang che kata ta amwowok ago ma omuchi omuite raa. ¹³ Ago ye tun kagonyo inendet tamirmiriet ne bo imanit, kondoiwok agoi oit imanda tugul, amu ma mwae inegei. Ago mwae tuguk tugul che kasei ak kongangwok tuguk che bwanei. ¹⁴ Itorora amu namei chechu ak kongangwok. ¹⁵ Chechu tuguk tugul che tinyei Kwanda. Noto kamwowok ale namei chechuk ak koboruok. ¹⁶ Tomo ngatigin si ma ogeero kogeny ak mi ngatigin kogenysi ogeero." ¹⁷ Kongalaljige anyun alak eng alamalyenyi kole "nee ni kamwawech kole mi ngatigin si ma ogeero ak mi ngatigin kogeny si ogeero ak amu 'awendi ole mi Kwanda'?" ¹⁸ Kole anyun "nee ni kamwa kole, 'mi ngatigin'? Ngo maginget kito ne mwaei." ¹⁹ Kinai anyun Jeiso kole machei kotebe bichoto inendet, ak koleji, "tos otebege akwe agobo ngolyondoni kaamwa ale, 'mi ngatigin si maogeero ak mi ngatigin kogeny si ogeero'? Amwowok iman, iman, ale, ²⁰ orirsoti ak oteisoti, ago baibai ngweny. Oarogensoti ago kiweechi arogenengwong koek boiboiyet. ²¹ Arogeni tamonet ye machei kosigis amu kait sainyi, ago ye kagosich lakwet, ko ma konani ngwanindo kogeny eng boiboiyet amu kagesikyi chi ngweny. ²² Noto anyun otinye arogenet raa, ago ta ageerok kogeny ak boiboien mugulelwekwok ama sarenok chi boiboiyengwong . ²³ Ama otebena kiy eng betunoto. Amwowok iman, iman, ale, ngot osom kwanda kiy age tugul eng kainenyu, kogonok. ²⁴ Agoi raa ko tomo osom kiy eng kainenyu. Osom si onyoru, si kobiit kosulda boiboiyengwong. ²⁵ "Kaamwowok tuguchu eng kalewenaik ago nyoni saitb ye ma angalalwok eng kalewenaik ago aboruok komie agobo Kwanda. ²⁶ Osome betunoto eng kainenyu ago mamwowok ale ateebe Kwanda kiy agobo akwe, ²⁷ Amu Kwanda inendet ko chomok amu kiochama ak kioyan ole kiabunu Kwanda. ²⁸ Kiabunu Kwanda, ak anyonji ngweny. Abagaktoi ngweny kogeny ak awektege ole mi Kwanda." ²⁹ Koleji alamalyenyi inendet, "keero, ingalali raa komie kotook, ama imwae kalewenet. ³⁰ Kinget nguno kele, inget tuguk tugul , amanyoljini chi kotebenen kiy, kiyani eng nito, kele kiibunu Jehovah." ³¹ Kowolji Jeiso koleji, " Ara oyani raa? ³² Ogeero, nyoni sait, ee, kagonyo raa, ye kiyestook kwo chi tugul oldanyi ak obagakta anege, ago mami anege amu mi Kwanda koboto. ³³ Kaamwowok tuguchu si kobiit onyoruneno kalyet. Eng ngweny onyoru nyalilda, ago onyiganitu amu kaaterter ngweny."