¹ Ak kingobata tuguchu kowendot Jeiso eng Galili, amu macham kowendot eng Judea amu kichenge Yahudik kobar inendet. ² Ak kiga rik igortab Yahudik ne bo keriosiek. ³ Kileji anyun tupchosiekyi inendet "ui eng oli agoi Judea si kogeer alamalyengung agiche boisionikuk che iyae. ⁴ Amu mami chi ne yae kiy eng ungot ak kocheng kobartage ak kotok, ngiyai tuguchu ibartege eng ingweny." ⁵ Amu agot tupchosiekyi agiche ko kima iyan inendet. ⁶ Koleji anyun Jeiso icheget, "tom koit betunyu ago mi betungwong kotugul. ⁷ Maimuchi ngweny kowechok, ago wecha ane amu abaoriani agobo ng'weny ale yaachen boisionikyi. ⁸ Otogoste akwe oba igorta; ma togostoi ane awendi igorta amu tomo kosulda betunyu." ⁹ Ak kingo kagomwa tuguchu, kota kotebi eng Galili. ¹⁰ Ago ye kingokagotogosta tupchosiekyi igorta, kotogosta agine ago ma ibartage ago kiwo ku yo ungotege. ¹¹ Kichenge anyun Yahudik inendet eng igorta ak koteeb kole "mi ano inendet?" ¹² Ak kimi kangunygunyet ne o eng tuiyosiek agobo inendet amu kile alak "kararan chichi." kole alak "achicha imaasi biko koba taban." 13 Ago ma mwa chi ng'olyo kotook agobo inendet amu kiiywei Yahudik. ¹⁴ Ago ye kingo kagoit kwenutab igorta, kotogosta Jeiso kwo hekalut ak konetis. ¹⁵ Kokwongio anyun Yahudik kole "kinaita ano chichi sirutik? Ago tomo konetge." ¹⁶ Kowolji Jeiso anyun koleji, "konetisienyu ko ma nenyu ago bo inendet ne kiyokwo. ¹⁷ Ngo mache chi age tugul koyai magetab Jehovah, konai konetisioni ngo bo Jehovah anan amwae anege. ¹⁸ Inendet ne mwaei chechi inegei kochenge torornatenyi ago ne chenge torornatetab ne kiiyoku ko bo iman, ama mi kiy ne ma bo imanda eng inendet. ¹⁹ Tos kima konok Musa ng'atutiet? Nga mami chi eng akwe ne yae ng'atutiet. Amu ne si ochenge obara?" ²⁰ Kowol tuiyet kole, "itinye oindet. Ng'o ne chenge kobaarin?" ²¹ Kowolji Jeiso koleji, kiayai boisiet agenge okwongie akwe tugul. ²² Kigonok Musa kamuratanet (amu noto ko mabun Musa kamuratanet ago bo kwanisiek), ak omuratani chi eng sabato. ²³ Ng'eyotitoi chi eng betutab sabato si mabutok ng'atutietab Musa, kotos onerekyina amu kasoob chi komie eng betutab sabato? ²⁴ Amoruoch ko u ye ogeere ago oruoch kiruoget ne bo imanda." ²⁵ Kimwa alak eng bichoto bo Jerusalem kole, "ma inendet ni ne kochenge ichek kobar? ²⁶ Ogeero, mwaitoti kotook, ama mwoji kiy ichek inendet. Tos inget bunik komie kole nito ko Kristo? ²⁷ Kinget ole bunu chichi, ago ngo nyo Jeiso Kristo ko manae chi ole bunu." ²⁸ Kingalal anyun Jeiso eng kutit ne o konetisyei eng hegalut ak komwae kolen, "ongeto ak onget ole abunu, ako kima nyo anegei ago bo iman inendet ne kiiyokwo ne monget akwe. ²⁹ Anget inendet amu abunu ole mi inendet, amu kiiyokwo." ³⁰ Kicheng anyun bichoto konam inendet ago manam chi amu kitom koit betunyi. ³¹ Ak kiiyan inendet che chang che bo tuiyet ak kole, "ngo nyo Kristo kotos yai kaborunaik che siirei chu yae chichi?" ³² Kigas Parisaik kongungungjini tuiyet tuguchuto agobo inendet, kiiyok tiisik che eechen, Parisaik ak Kiptainik kobwa konam inendet. ³³ Koleji Jeiso icheket anyun, "ta ami kobotok ne matia, si awa ole mi inendet ne kiiyokwa. ³⁴ Tun ochengo amonyorwo, ak ole ami ko momuji obwa." ³⁵ Komwachige anyun Yahudik kole, "tos wendi ano chichi ole makinyoru? Tos wendi ole mi ichek che kigoyestochi Yunanik konet icheket? ³⁶ Nee anyun ng'olyondoni kamwa kole ochenga amonyorua ak ole ami komomuchi obga?" ³⁷ Eng betut ne o ne kibo let eng igorta, kotonon Jeiso ak komwa eng kutit ne o kole ngo amei chi melel ko ingonyonja ak koee. ³⁸ "Inendet ne iyana, ko u olemwoitoi sirutiet, ko bunu moenyi ainosiekab beeko che saptos." ³⁹ Kiwae nito agobo tamirmiriet ne tun taachei icheget che iyani inendet, amu kitomo kegon tamirmiriet, amu kitomo ketoror Jeiso. ⁴⁰ Kingogas alak che bo tuiyet ng'alechuto, komwa kole, "nito anyun maotiot iman." ⁴¹ Ako kimwa alak kole, "nito ko Kristo." kole alage, tos bunu Kristo Galili?" ⁴² "Ma mwae sirutiet kole mongune Kristo oretab keswek ab Daudi ak kobun nganasetab Betlehem ole kimi Daudi?" ⁴³ Kibiit anyun toiyet eng tuiyet agobo inendet. ⁴⁴ Ak kimachei alak konam inendet ago ma nam chi inendet. ⁴⁵ Kiwechge anyun kiptainik kobwa ole mi tisiik che eechen ak Parisaik, kotebe koleji, kalya si momutu inendet?" ⁴⁶ Kowol kiptainichoto kole, "kitomo kongololi chi age tugul ko u ni." ⁴⁷ Kowolji anyun Parisaik ichek koleji, "kagibeetok ak akwe? ⁴⁸ Kiioyan inendet akwe tugul eng bounik ak Parisaik? ⁴⁹ Ago chubotin bichu manaei ng'atutiet. ⁵⁰ Kileji Nikodemo (agenge eng parisaik, ne kigakwo kemoi atkinye eng tai ole mi Jeiso, ⁵¹ "Tos iruokyini chi ng'atutienyo kotomo kogas ng'alekyi ak kenai kito ne yae?" ⁵² Kowolji anyun inendet koleji, "ibunu akinye Galili? Cheng ak igeer ile mamangune Galili maotiondo." ⁵³ Kiwechige anyun chi tugul gonyi.