¹ Kingobata tuguchu, kwo Jeiso bitet age ne bo Araraitab Galili, noto ko Araraitab Tiberia. ² Ak kisub inendet ne o amu kigeer kaborunoik che kiyachi che miandos. ³ Ak kitogosta Jeiso Tulwet kwo kotebi ngweny ak alamalyenyi. ⁴ (Ak kigarik Paska, igorta ne bo yahudik.) ⁵ Kingonyal barak ak ko geer tuiyet ne o, konyonjini inendet, koleji Pilipu, "kiale ano makatinik che ome bichu?" ⁶ (Kimwae kotieme inendet, amu kinget kito ne kimache koyai.) ⁷ Kowolji Pilipu inendet koleji, "mayame icheget tugul magatinik che bo denarisiek bogol aeng si konyor agetugul kitigin." ⁸ Koleji inendet Andrea ne tupcho ak Simon Petero ne agenge eng alamalyenyi, ⁹ "Mi yu werit age ne tinye Magatinik mut che bo sairi ak injirenik aeng, ago tos eme nee anyun chuto eng biko che tee chu?" ¹⁰ Kimwa Jeiso kole "ochob bik kotebi ngweny." Ak kimi suswek che chang oloto. Kitebi ngweny anyun ak ki olobo elfusiek mut murenjoto. ¹¹ Kinam anyun Jeiso magatinik ak ye kingo kagogoito kongoi, kopchechi alamalyenyi ak kiropchi icheget che kitepyei ng'weny ak kou noto agiche injirenik che tee che kimachei. ¹² Ak ye kingo biyongso, koleji alamalyenyi, "oyum katuganik che kang'et si mabet kiy." ¹³ Koyum anyun katuganichoto ak konyit kerebonik taman ak aeng, choto ko katuganikab makatinik mut che bo sairi che kangetune icheget che kiamisiei. ¹⁴ Ye kingogeer anyun bichoto kabarunet ne kiyai, kole "ni maotiot iman ne nyonjini ngweny." ¹⁵ Kingonai Jeiso kole legit kobwa si konam inendet eng kimnatet, koyai inendet koek Laitoriat, kwo kogeny tulwet inegei. ¹⁶ Ak ye kingoek lagat, kochortage alamalyenyi koba araraita. ¹⁷ Ak kilany moingetab beek kolandae araraita koba Kapernaum ak kigagoimen ak kotom koit Jeiso ole kimi icheget. ¹⁸ Kiwasege araraita amu kiuse usonet neo. ¹⁹ Kingogakoba anyun eng araraita olo bo mailisiek somok anan somok ak kebeber, kogeer Jeiso kowendoti eng araraita barak ak konyo korikyi moinget koyweis. ²⁰ Ago kileji icheget, "ane, amoiyweisie." ²¹ Kocham anyun kotaach inendet eng moinget, ak kiit moinget ngunoto emet ole kibendi ²² Ki betut ne kirube noto kogeer tuiyet ne kimi eng araraita bitonin; kole mami moinget age oloto kobate agenge noto kiga lany alamalyenyi ichegei ago kimalany Jeiso koboto alamalyenyi. ²³ Ago kibwa moingonik alak kobunu Tiberia ole legite koret ole kiame makatinik ye kingo kagogoito Kiptaiyat kongoi. ²⁴ Ye kingogeer tuiyet anyun kole mami Jeiso oloto anan alamalyenyi, kolany ichek moingonik ak koba kapernaum kochengati Jeiso. ²⁵ Ak ye kingonyor inendet eng bitet age nebo araraita, koleji, "Rabbi, koinyoni au oli?" ²⁶ Kowolji Jeiso icheget koleji, "Amwawok komie iman ale, ochengo ma amu kogeer kaborunoik ako amu koam makatinik ak obiyongse. ²⁷ Amogiljige oboisie agobo amitwokik che begu,ako ogiljige ocheng amitwokik che tebyei agoi sobondab koigeny che konok weritab chi, amu kigongoch inendet Kwanda ne inendet ko Jehovah." ²⁸ Kileji anyun icheget inendet, "kiyai nee si kobit keyai boisinikab Jehovah?" ²⁹ Kowolji Jeiso koleji, "ni boisietab Jehovah, ale oyan inendet ne kiiyogu Jehovah." ³⁰ Koleji icheget inendet, "ne kaborunet ne iyae si kegeer ak keyanin? Nee ne iyae? ³¹ Kiam kwanisiekyo Mana eng ongatet ko u ye kigisir kele 'kiigochi icheket Makatiat ne bunu Kipsengwet koam."' ³² Koleji anyun Jeiso icheget, "amwowok iman komie ale, kima ko Musa ne kigonok Magatiandanoto kibunu Kipsengwet, ago konok Baba Makatiat ne bo iman ne bunu Kipsengwet. ³³ Amu makatiat ne bo Jehovah ko noto choruge eng Kipsengwet ak kogochi ngweny sobondo. ³⁴ Koleji anyun ichek inendet, "Kiptayandani, si konech makatiandani eng kotugul." ³⁵ Koleji Jeiso icheget, "A makatiat ne bo sobon, inendet ne nyonjina ko magase rubet ago, ak inendet ne iyano ko maame melel agoi. ³⁶ Ago amwowok ale koogero amoyan. ³⁷ Bwanjina tugul che kona Kwanda ak inendet ne nyonjina ko mone matiny. ³⁸ Amu kiachoruge eng Kipsengwet ma si ayai magenyu ago magetab inendet ne kiyokwa. ³⁹ Ak ni magetab inendet ne kiyokwa ale eng tugul che kigona inendet ko mabetena agot agenge ago tatun angeti eng betab let. ⁴⁰ Amu ni magetab Baba, ale chi age tugul ne keerei werit ak koyan inendet konyoru sobondab koigeny ak angeeti inendet eng betutab let." ⁴¹ Kingungngungso anyun Yahudik agobo inendet amu kimwa kole "A makatiat ne kichorge eng Kipsengwet." ⁴² Ak kimwa kole, "tos ma Jeiso nito weritab Joseph ne kinget Kwandanyi ak Kamet? Kotepto ano anyun si komwa kole 'kiachoruge eng Kipsengwet'?" ⁴³ Kowolji Jeiso anyun koleji "amongungungnye akwege eng akwege. ⁴⁴ Maimuji chi konyonja ama ichuut Kwanda ne kiyokwo, ak angeeti inendet eng betutab let. ⁴⁵ Kigisir eng maotik ak kineeti tugul eng Jehovah, age tugul ne kagogas eng Kwanda ak kagonetge konyonjina. ⁴⁶ Molen kigogeer chi age tugul Kwanda, kobate inendet ne bunu Jehovah, kigogeer inendet Kwanda. ⁴⁷ Amwowok komie iman ale inendet ne iyani kotinye sobondab koigeny ⁴⁸ A makatiat ne bo sobon. ⁴⁹ Kiam kwanisiekwok Mana eng ongatet ak kibek. ⁵⁰ Ni makatiat ne choruge eng Kipsengwet ne ngoam chi ko mameei. ⁵¹ A makatiat ne sobei ne kichogei eng Kipsengwet, ngoam chi age tugul makatiandani kosobei koigeny, ee, ak bortanyu makatiat ne agoitoi agobo sobondo ne bo ngweny. ⁵² Kiborio anyun Yahudik ichegei kole "imuktoi ano chichi kogonech bortanyi keam?" ⁵³ Koleji Jeiso anyun icheget, "amwowok komie iman ale, 'ngoto moam bortab weritab chi ak oee korotikyi ko motinye sobondo eng eng oringwong. ⁵⁴ Inendet ne amei bortanyu ak koe korotikyu kotinye sobondab koigeny ak angeeti inendet eng betutab let. ⁵⁵ Amu omdit iman bortanyu ak korotikyu ko che kiee iman. ⁵⁶ Inendet ne ame bortanyu ak koee korotikyu, komnya ak amenye inendet. ⁵⁷ Kou ye kiyokwo Kwanda ne sobe, ak asobe amu Kwanda, kou noto inendet ne amo, ko sobe agine amu ane. ⁵⁸ Ni makatiandanato ne kichorge eng Kipsengwet, ma kou ye kiam Kwanisiek ak kobek, inendet ne ame makatiandani kosobe koigeny." ⁵⁹ Kimwa tuguchu eng sunagogit kota konetisiei eng kapernaum. ⁶⁰ Ye kingogas ni che chang eng alamalyenyi, komwa kole, "uui ngolyondoni, imuchi ngo koguiyo?" ⁶¹ Ago kina Jeiso eng oritinyi kole ingunygungjini alamalyenyi ng'olyondonito, koleji echeket, "tos kagonachak nito?" ⁶² Ara tos teptoi ano anyun ngot go tun ogeer weritab chi kotogostoi ole kimi atkinye? ⁶³ Tamirmiriet ne igoitoi sobondo, matile kiy borto, tamirmiriet ak sobondo ngalek che kamwowok. ⁶⁴ Ago mito alak eng akwe che maiyani. Amu kinai Jeiso koboch taunet icheget che maiyani ak inendet ne kimache kongwekta inendet. ⁶⁵ Ak kile, "amu nito anyun' kamwowok ale, magoi imuch chi konyonja kobate ne igochini Kwanda." ⁶⁶ Kongete yoto, kochuchuige che chang che bo alamalyenyi amata kobendat ak inendet. ⁶⁷ Kileji anyun Jeiso choto taman ak aeng, "ara obendi ak okwe?" ⁶⁸ Kowolji anyun Simon Petero koleji, "Kiptaiyandani, kibendi ole mi ngo? Itinye ngalek chebo sobondab koigeny, ⁶⁹ ako kigiyan ak kenget kele I ne tilil ne bo Jehovah." ⁷⁰ Kowolji Jeiso icheget koleji, "kima alewenok taman ak aeng, ago oindet age eng akwe?" ⁷¹ Kimwae anyun agobo Judas ne bo kap Simon Iscariot, amu ine ne kimache kongwekta inendet nganda ki agenge eng taman ak aeng.