¹ Kingobata tuguchu kobiit igorta ne bo Yahudik ak kotogosta Jeiso Jerusalem. ² Ak kimi Jerusalem tamboiyot ne kainenyi ko Betesta eng kutitab Hebranik, ole legite ormarichetab kechirek ne kitinye keterusiek mut. ⁴ Amu kichorchige Malaikayat ne bo kiptaiyat tamboiyot betusiek alak kowendi kowasei beek eng miondo age tugul ne kitinye. ⁵ Ak kimi yoto chito age ne kiga komian kenyisiek sosom ak sisit. ⁶ Ako kingogeer Jeiso chichoto koruei, ak konai kole kiu noto eng betusiek che chang, koleji "imache kisoobin?" ⁷ Kowolji chichoto kimiani koleji, "Kiptaiyandani, matinye chi ne indea Tamboiyot ko kawasge beeko amu ngotanyoni kosib kochorge age." ⁸ Koleji Jeiso anyun, "ng'eet ib kitokungung ak iwechige." ⁹ Ak kisob chichoto ngunoto ak koib kitogunyi ak kwo ak ki sabato betunoto. ¹⁰ Kileji anyun Yahudik inendet ne ki kisob, "betutab Sabato rani, ma chamdaat eng ng'atutik iib kitokungung." ¹¹ Ago kiwolji icheget koleji, "inendet ne kagosoba, ko kamwaiywo kolecho 'ib kitogungung ak iwe."' ¹² Kotebe anyun bichoto inendet kole, "ng'o chichoto kamwaun kole 'ib kitogungung ak iwe'?" ¹³ Ago inendet ne kigagisoob ko kima nai kole ng'o inendet ne kisoobi, amu kiga kwo Jeiso ago kimi biko che chang oloto. ¹⁴ Kingobata noto, konyorji Jeiso inendet Hekalut, ak koleji, "keer, kagisobin, amatata iyai tengek si manyonjin kito age ne ya ne sirei ni." ¹⁵ Kiwo anyun chichoto ak komwachi Yahudik kole koga ko Jeiso ne kikaisoob inendet. ¹⁶ Kigius anyun Jeiso Yahudik amu ng'olyondonoto amu kiyai tuguchu eng betutab sabato. ¹⁷ Ak kiwolji Jeiso icheget koleji, "boisiei Baba agoi kora, ak aboisiei agane." ¹⁸ Kiicheng anyun Yahudik mising kole kobar inendet amu ma kele kityo kibistoe ng'atutik, ago kimwachi kole Jehovah ko Kwandanyi, koyaege kogergeit ak Jehovah. ¹⁹ Kiwolji anyun Jeiso ichek koleji, "amwowok komie iman ale mayae kiy werit inegei, ago ne keerei koyae Kwanda, amu tuguk che yaei inendet koyaei agine werit." ²⁰ Amu chamei Kwanda werit ak koborjini tuguk tugul che yaei inendet, ak ta koborjini boisionik che eechen che sirei chu, si kobiit okwongie. ²¹ Amu kou ye ingeeti kwanda che kigobek ak kosoobi, isoobi werit kou noto agine che machei. ²² Amu mairuokyini Kwanda chi age tugul, ago kigogochi werit kiruoget tugul. ²³ Si kobit koteegis tugul werit ko u ye teegisi Kwanda. inendet ne ma teegisi Werit ko ma teegisi Kwanda ne kiyok inendet. ²⁴ Amwowok iman komie ale, ale, inendet ne kasei ng'olyondenyu ak koyani inendet ne kiyokwo, kotinye sobondab koigeny, ama wendi ole mi kiruoget, ago kagomong eng meet komongji sobondab koigeny. ²⁵ Amwowok iman komie ale, nyonei sait, ak kagoit sait ne kase che kigobek kutitab weritab Jehovah ak sabtos icheget che kasei. ²⁶ Amu kou ye tinyei Kwanda sobondo inegei, ko u noto kigogochi Werit konom sobondo, ²⁷ Ak kigochi kimnatet koyai kiruoget amu inendet ko weritab chi. ²⁸ Amokwonge nito, amu nyone sait ne tun kasei kutinyi tugul che mi kererisiek, ²⁹ Ak komong: ng'eetyini sobondo che kiyai ne mie, ak kongeetyi kiruoget icheget che kiyai ne ya. ³⁰ Mamuchi ayai kiy anegei, aruochi kou ye agase, ako bo iman kiruogenyu amu machenge ayai magenyu ago magetab inendet inendet ne kiyokwo. ³¹ Ngotgabaorionjige ko ma bo iman baornatenyu. ³² Mi age ne baorianjina ak anget ale bo iman baornatet ne baorinjina. ³³ Kiyokyi ng'olyot Johana ak kibaoryanji imanda. ³⁴ Ago mataache baornatet kobun chi, ago amwae tuguchu si kobit kesoruok. ³⁵ Ki tait inendet ne kilalei kokwengisiei ak kiocham oboiboitune lapkeiyenyi eng betusiek che matia. ³⁶ Ago baornatet ne atinye ko O kosir ne bo Johana, amu boisionik che kigona Kwada ages ko choto che ayae, ago choto che baorianjina kole kiyokwa kwanda. ³⁷ Ak kibaorianja Kwanda inendet ne kiyokwa, tomo ogas kutinyi kongete ole kiigoi anan ogeer itondanyi. ³⁸ Ama tebyei eng akwe ng'olyondenyi amu maoyan inendet ne kiiyogu Jehovah. ³⁹ Osiachi sirutik olen otinye sobondab koigeny eng choto kobate choto che baorianjina. ⁴⁰ Ago mochame obwanja si kobit onyoru sobondo. ⁴¹ Mataache kalosunet nebunu biko ⁴² Ago angenok ale motindoi chamyetab Jehovah eng oritingwong. ⁴³ Kianyo eng kainetab Baba, ama otacha, ng'onyo age eng kainenyi otoche inendet. ⁴⁴ Omuktai ano oyan che otaagege kalosunet ne bunwok akweget, amochenge kalosunet ne bunu Jehovah ne inegei? ⁴⁵ Amobwat ole angangtok eng Kwanda, mi age ne ngongtok, noto ko Musa ne omongu. ⁴⁶ Amu nda kikoyan Musa ko nda ko yanna, amu kisir agobo ane. ⁴⁷ Ago ngomoyani sirutikyi, omuktoi ano oyan ng'alekyu?"